ព័ត៌មានជាតិ

រដ្ឋមន្ត្រីការងារ ៖ ភាពជោគជ័យការអនុវត្តកម្មវិធីការងារសមរម្យ នៅកម្ពុជា ជាការព្រមទទួលយកដោយភាពឈ្នះៗ របស់គ្រប់ភាគី

បានផុស

២ ខែ មុន

នៅ

ថ្ងៃសុក្រ ២ សីហា ២០២៤

ដោយ

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអះអាងថា ភាពជោគជ័យពិតប្រាកដ នៃការអនុវត្តកម្មវិធីការងារសមរម្យនៅកម្ពុជា គឺជាការព្រមទទួលយកដោយភាពឈ្នះៗ របស់គ្រប់ភាគី ទាំងកម្មករ-និយោជិត និយោជក និងរាជរដ្ឋាភិបាលដែលជាអាណាព្យាបាល ដោយឈរលើកត្តា នៃភាពប្រាកដនិយម ជាក់ស្ដែង និងអនុវត្តបាន ដើម្បីភាពរីកចម្រើន វិបុលភាពឥតឈប់ឈរសម្រាប់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបើកសិក្ខាសាលាត្រីភាគីថ្នាក់ជាតិស្ដីពីការអនុវត្ត“កម្មវិធីការងារសមរម្យប្រចាំប្រទេសកម្ពុជា ឆ្នាំ ២០២៤-២០២៨» នៅសណ្ឋាគារ កាំបូឌីយ៉ាណា កាលពីព្រឹកថ្ងៃទី ២ សីហា លោករដ្ឋមន្ត្រី បានបន្តថា ការកសាងមូលធនមនុស្សចាំបាច់ត្រូវការពេលវេលាបណ្ដុះបណ្ដាល ហ្វឹកហ្វឺនជាបន្តបន្ទាប់ដល់កម្មករ-និយោជិត ឱ្យមានជំនាញបច្ចេកទេសវិជ្ជាជីវៈ និងសមត្ថភាព នៃការយល់ដឹងផ្នែកផ្លូវច្បាប់ និងទំនៀមទម្លាប់ និងកត្តាប្រយោជន៍រួម ដើម្បីភាពប្រសើរឡើងបន្ថែមទៀតក្នុងវិស័យ។

ដោយឡែកកត្តាសេដ្ឋកិច្ចវិញ លោករដ្ឋមន្ត្រី ក៏បានសង្កត់ធ្ងន់ឱ្យអង្គសិក្ខាសាលាគួរផ្តោត និងវាយតម្លៃលើកត្តា នៃការពង្រឹងផលិតភាព និងការប្រកួតប្រជែងទាំងក្នុងតំបន់ និងអន្តរជាតិ។

ជាមួយគ្នានេះ លោករដ្ឋមន្ត្រី ក៏បានអំពាវនាវដល់សហជីព និងអង្គការវិជ្ជាជីវៈ ជួយផ្សព្វផ្សាយ និងបន្តផ្សព្វផ្សាយអំពីកម្មវិធីថ្នាក់ជាតិស្តីពីការផ្តល់ការបណ្ដុះបណ្ដាលជំនាញបច្ចេកទេស និងវិជ្ជាជីវៈដោយឥតគិតថ្លៃ និងការផ្តល់ការថែទាំសុខភាពដល់បុគ្គលស្វ័យនិយោជន៍ និងអ្នកក្នុងបន្ទុក ប.ស.ស តាមរយៈរបបភាគទានស្ម័គ្រចិត្ត ដើម្បីកាត់បន្ថយការចំណាយ និងការធានាបាននូវសុខភាពល្អពេញលេញ។

សម្រាប់ចំណុចទំនាក់ទំនងវិជ្ជាជីវៈ លោករដ្ឋមន្ត្រី បានសង្កត់ធ្ងន់លើភាពរីកចម្រើនក្នុងសង្គមកម្ពុជារយៈពេល ១០ ឆ្នាំ ចុងក្រោយ ដែលធ្វើឱ្យបរិយាកាស នៃការវិនិយោគ ក៏ដូចជាភាពសុខដុមនីយកម្មក្នុងរោងចក្រក៏កាន់តែប្រសើរឡើងគួរឱ្យកត់សម្គាល់ បើទោះបីជាកម្ពុជានៅសល់បញ្ហាតិចតួចក៏ដោយ។

ត្រង់ចំណុចនេះ លោករដ្ឋមន្ត្រី បានស្នើឱ្យគ្រប់តួអង្គក្នុងទំនាក់ទំនងវិជ្ជាជីវៈ ជាពិសេសតំណាងសហជីព ត្រូវបង្កើនសមត្ថភាព និងត្រូវយល់ដឹងពីតួនាទីរបស់ខ្លួនឱ្យបានច្បាស់លាស់ ចៀសវាងការប្រតិបត្តិហួសតួនាទី ដើម្បីក្លាយជាភាគីមានភាពជាតំណាងសម្រាប់កិច្ចសន្ទនាជាមួយភាគីពាក់ព័ន្ធ។ បន្ថែមពីនេះ ក្នុងនាមជារដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលជាអាណាព្យាបាលក្នុងវិស័យការងារ លោក បានស្នើ និងអំពាវនាវកុំឱ្យមានការរើសអើងសហជីពនៅកម្ពុជាដែលបង្ហាញឱ្យឃើញពីភាពបែកបាក់ក្នុងសង្គមជាតិ៕

អត្ថបទ ៖ សំអឿន