ព័ត៌មានជាតិ

ទីប្រឹក្សាពិសេសអាមេរិក ផ្នែកសិទ្ធិជនពិការ មកកម្ពុជាដើម្បីស្វែងយល់សិទ្ធិជនមានពិការភាព

បានផុស

២ years មុន

នៅ

ថ្ងៃសុក្រ ២ សីហា ២០២៤

ដោយ

លោកស្រី Sara Minkara ទីប្រឹក្សាពិសេសរបស់សហរដ្ឋអាមេរិក ផ្នែកសិទ្ធិអន្តរជាតិ និងសិទ្ធិជនពិការ បានបំពេញទស្សនកិច្ចនៅព្រះរាជាណាចក្រកម្ពុជា នៅថ្ងៃទី ១-២ ខែសីហា ឆ្នាំ ២០២៤ ដើម្បីស្វែងយល់អំពីការងារ និងការអប់រំប្រកបដោយបរិយាបន្នសម្រាប់ជនមានពិការភាព និងការកសាងសមត្ថភាពជាមួយភាគីពាក់ព័ន្ធពីខាងរដ្ឋាភិបាល វិស័យឯកជន និងសង្គមស៊ីវិល ក្នុងការបង្កើនការចូលរួមជាទូទៅនៅក្នុងសង្គម។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសបំពេញទស្សនកិច្ចនេះ លោកស្រី Minkara បានជួបពិភាក្សាជាមួយមន្ត្រីក្រសួងទេសចរណ៍ ក្រសួងពាណិជ្ជកម្ម និងក្រសួងការបរទេស បន្ទាប់ពីបានទៅទស្សនានៅរោងចក្រដំឡើងរថយន្ត Ford ដែលមានការចូលរួមវត្តមានពីក្រសួងការងារ និងបណ្តុះបណ្តាលវិជ្ជាជីវៈ ដើម្បីស្វែងយល់ដោយផ្ទាល់នូវការអនុវត្តការងារប្រកបដោយបរិយាបន្ននៅកម្ពុជា។ លោកស្រី ក៏បានទស្សនាផងដែរនូវសាលាសម្រាប់កុមារដែលមានតម្រូវការពិសេស ហើយបានជួបជាមួយសង្គមស៊ីវិល ដើម្បីស្វែងយល់ពីបញ្ហាប្រឈម និងឱកាសសម្រាប់ការចូលរួមរបស់ជនមានពិការភាព។

លោកស្រីទីប្រឹក្សាពិសេស Minkara បានមានប្រសាសន៍ថា ៖ «យើងត្រូវធានាថា ជនមានពិការភាព ជាផ្នែកមួយក្នុងការចូលរួមកិច្ចពិភាក្សា ហើយត្រូវធ្វើយ៉ាងណាឱ្យពួកគេអាចទទួលសិទ្ធិចូលរួមនោះ។ នៅពេលសង្គមបើកឱ្យមានការចូលរួមរបស់ជនមានពិការភាព សក្តានុពលរបស់យើងគ្មានព្រំដែនកំណត់ទេ»។

គួរជម្រាបថា រាជរដ្ឋាភិបាលកម្ពុជាតែងតែយកចិត្តទុកដាក់លើជនមានពិការភាព ដោយក្នុងនោះបានជំរុញ និងលើកទឹកចិត្តដល់វិស័យឯកជន និងស្ថាប័នរដ្ឋ ជ្រើសរើសជនមានពិការភាពឱ្យបម្រើការងារនៅអង្គភាពរបស់ខ្លួនឱ្យបានច្រើន។ រាជរដ្ឋាភិបាល ក៏បានខិតខំកែលម្អជីវភាពរស់នៅធានាដល់ការកាត់បន្ថយភាពក្រីក្រ របស់ជនមានពិការភាពតាមរយៈការលើកកម្ពស់អាជីពមុខរបរសមរម្យ ការងារ និងការផ្តល់ប្រាក់របបគោលនយោបាយផ្សេងៗ។

យោងរបាយការណ៍ក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងឆ្នាំ ២០២៣ ជនមានពិការភាពចូលបម្រើការងារក្នុងក្រសួងស្ថាប័នរដ្ឋចំនួន ៣៩ ដែលមានចំនួន ៣ ៧៧៦ នាក់ ក្នុងនោះស្ត្រីមានពិការភាពចំនួន ៨៦៩ នាក់,ជនមានពិការភាពកម្រិតធ្ងន់ចំនួន ២ ៣៥១ នាក់៕

Related Topics:ជនពិការភាព