មន្ទីរសាធារណការខេត្តរតនគីរី បានជួសជុល ថែទាំផ្លូវជាតិលេខ៧៨ រងការខូចខាតដោយសារទឹកភ្លៀង

មន្ទីរសាធារណការនិងដឹកជញ្ជូនខេត្តរតនគិរី កំពុងបន្តជួសជុល និងថែទាំកំណាត់ផ្លូវជាតិលេខ៧៨ ដែលរងការខូចខាតប្រេះស្រាំដូចជាសំបុកមាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅថ្ងៃទី១៤ ខែសីហា ឆ្នាំ២០២៤នេះ មន្ទីរសាធារណការនិងដឹកជញ្ជូនខេត្តបានធ្វើការជួសជុលកំណាត់ផ្លូវជាតិលេខ៧៨ ស្ថិតនៅក្នុងភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។

លោក សាយ សាមាន ប្រធានមន្ទីរសាធារណការនិងដឹកជញ្ជូនខេត្តរតនគិរី បានឲ្យដឹងថា  ជំនាញបានបន្តការងារជួសជុលកំណាត់ផ្លូវជាតិលេខ ៧៨ ដោយបន្តការងារស្រទាប់គ្រឹះសំខាន់ ចន្លោះ គ.ម ១៨៩+២០០ ដល់ គ.ម ១៨៩+៥៦៥ និងបន្តការងារថែទាំកំណាត់ផ្លូវជាតិលេខ៧៦ ដោយបន្តការងារបិទស្នាមប្រេះ និងលុបសំបុកមាន់ ចន្លោះ គ.ម ២៣៩+០០០ ដល់ គ.ម ២៤៦+០០០ ក៏ដូចជាបន្តការងារថែទាំកំណាត់ផ្លូវជាតិលេខ៧៨C ដោយបន្តការងារកៀរសម្រួល និងកិនបង្ហាប់ឡើងវិញ ចន្លោះ គ.ម ១០+០០០ ដល់ គ.ម ១៣+០០០។

លោកប្រធានមន្ទីរសាធារណការបានបញ្ជាក់ថា ដោយមួយរយៈនេះមេឃភ្លៀងធ្លាក់ជាបន្តបន្ទាប់ធ្វើឲ្យផ្លូវមួយចំនួនរងការខូចខាតដោយសារទឹកភ្លៀងធ្លាក់ខ្លាំង ហើយលោកនិងបន្តជួសជុលបន្ថែមទៀត នៅកន្លែងណាដែលមានបញ្ហាផ្លូវរងការខូចខាតមិនឲ្យទុកយូរឡើយ។

 តាមលោកប្រធានមន្ទីរ ផ្លូវមួយខ្សែរនេះ ជាផ្លូវសេដ្ឋកិច្ចដ៏សំខាន់ដែលប្រជាពលរដ្ឋដឹកកសិឧស្សាហកម្ម មកតាមបណ្ដាខេត្តផ្សេងៗឆ្លងកាត់ខេត្តរតនគីរីបន្តទៅលក់នៅប្រទេសវៀតណាម មិនពិបាកក្នុងការធ្វើដំណើរឡើយ៕

អត្ថបទ÷ វុទ្ធឦសាន