ព័ត៌មានជាតិ

៧ ខែ ឆ្នាំនេះ មានមនុស្សស្លាប់-របួស ៣៥ នាក់ ដោយសារខ្យល់កន្ត្រាក់ ថយចុះជាង ៤ ដង

បានផុស

២ years មុន

នៅ

ថ្ងៃអង្គារ ២០ សីហា ២០២៤

ដោយ

រយៈពេល ៧ ខែ ឆ្នាំ ២០២៤ នេះ ខ្យល់កន្ត្រាក់បានកើតឡើងជាង ២០០ លើក នៅទូទាំងប្រទេស បណ្តាលឱ្យមនុស្សស្លាប់ និងរបួស ៣៥ នាក់ មានការថយចុះជាង ៤ ដង បើធៀបទៅនឹងរយៈពេល ៧ ខែដូចគ្នា ឆ្នាំ ២០២៣ កន្លងទៅដែលមានមនុស្សស្លាប់ និងរបួសជាង ១៥០ នាក់ និងខូចខាតផ្ទះសម្បែងជាង ១ ម៉ឺន ៤ ពាន់ខ្នង។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍នៅព្រឹកថ្ងៃទី ២០ សីហា នេះថា ចាប់ពីខែមករា រហូតដល់ខែកក្កដា ឆ្នាំ ២០២៤ នេះ ខ្យល់កន្ត្រាក់បានកើតឡើងចំនួន ២០៩ លើក បណ្តាលឱ្យខូចខាតផ្ទះធ្ងន់ធ្ងរចំនួន ៤៥៩ ខ្នង ខូចខាតផ្ទះមធ្យមចំនួន ៣ ៥៥២ ខ្នង របើកដំបូលសាលារៀនចំនួន ៣៧ អគារ របើកតូបផ្សារចំនួន ២៦ តូប អគាររដ្ឋបាលចំនួន ១៤ អគារ ស្លាប់មនុស្សចំនួន ៤ នាក់ និងរងរបួសចំនួន ៣១ នាក់។

លោកបានបន្តថា ក្នុងនោះនៅក្នុងខែកក្កដាឆ្នាំ ២០២៤ ខ្យល់កន្ត្រាក់បានកើតឡើងចំនួន ២៧ លើក នៅរាជធានី-ខេត្ត ចំនួន ១៧ បណ្តាលឱ្យខូចខាតផ្ទះធ្ងន់ធ្ងរចំនួន ៨២ ខ្នង ខូចខាតផ្ទះមធ្យមចំនួន ២៤១ ខ្នង ស្លាប់មនុស្សចំនួន ១ នាក់ និងរងរបួសចំនួន ៧ នាក់។

លោកបានបន្តទៀតថា ចំនួននេះបើធៀបទៅនឹង ៧ ខែ ឆ្នាំ ២០២៣ ឃើញថា មានការថយចុះគួរឱ្យកត់សម្គាល់ ដោយ ៧ ខែ ឆ្នាំមុន ខ្យល់កន្ត្រាក់បានកើតឡើងចំនួន ២២១ លើក បណ្តាលឱ្យខូចខាតផ្ទះធ្ងន់ធ្ងរចំនួន ១ ៨៨០ ខ្នង ខូចខាតផ្ទះមធ្យមចំនួន ១២ ២០៨ ខ្នង របើកដំបូលសាលារៀនចំនួន ៨៧ អគារ របើកតូបផ្សារចំនួន ៧៧ តូប អគាររដ្ឋបាលចំនួន ៣៨ អគារ ស្លាប់មនុស្សចំនួន ៨ នាក់ និងរងរបួសចំនួន ១៤៥ នាក់៕

អត្ថបទ ៖ សំអឿន