អ្នកនាំពាក្យ ថា រាជរដ្ឋាភិបាល«មានរបង៥ជាន់» ដើម្បីការពារព្រំដែន

កម្ពុជា មានរបងដ៏រឹងមាំចំនួន៥ ដើម្បីការពារអធិបតេយ្យភាពជាតិ និងបូរណភាពទឹកដី ពិសេសកិច្ចការពារព្រំដែន។ នេះជាលើកឡើងរបស់អ្នកនាំពាក្យរាជរដ្ឋាភិបាល លោក ប៉ែន បូណា។ យុទ្ធសាស្ត្រដែលជារបងដ៏រឹងមាំទាំង ៥នេះ រួមមាន ជំហរដ៏ម៉ឺងម៉ាត់របស់ថ្នាក់ដឹកនាំ ការបោះបង្គោលព្រំដែន ការកសាងផ្លូវក្រវាត់ព្រំដែន ការកសាងប៉ុស្តិ៍ការពារព្រំដែន និងការប្រែក្លាយព្រំដែនជាតំបន់អភិវឌ្ឍន៍។

ការលើកឡើងនេះ គឺស្របពេលថ្មីៗនេះ មានសាធារណមតិមួយចំនួនបានស្នើឱ្យរាជរដ្ឋាភិបាលកសាងរបងព្រំដែនជាមួយប្រទេសជិតខាងកម្ពុជា ពិសេសរបងព្រំដែនរវាងកម្ពុជា និងវៀតណាម ដោយសារមានក្ដីព្រួយបារម្ភថា ខ្លាចបាត់បង់ទឹកដីទៅប្រទេសជិតខាងនោះ។

តាមការគូសបញ្ជាក់របស់លោក ប៉ែន បូណា គឺរាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា​ មានយុទ្ធសាស្ត្រប្រកបដោយចក្ខុវិស័យវែងឆ្ងាយក្នុងបុព្វហេតុការពារអធិបតេយ្យភាពជាតិ និងបូរណភាពទឹកដី ដែលចាត់ទុកថា ជារបងដ៏រឹងមាំបំផុត ដើម្បីការពារព្រំដែន ដោយមិនចាំបាច់កសាងរបងព្រំដែន។

យុទ្ធសាស្ត្រការពាររបស់រាជរដ្ឋាភិបាល គឺទី១ ចាប់ផ្ដើមចេញពីជំហរដាច់ខាត ម៉ឺងម៉ាត់ក្នុងការការពារអធិបតេយ្យភាពជាតិ និងបូរណភាពទឹកដីរបស់ថ្នាក់ដឹកនាំ ដែលមានសម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន។ លោក ប៉ែន បូណា បានគូសរំលេចថា ថ្នាក់ដឹកនាំទាំងពីរតែងប្រកាសជំហរមិនយកអធិបតេយ្យភាពជាតិទៅដោះដូរជាមួយនឹងជំនួយបរទេស ឬភាពអនុគ្រោះណាមួយជាដាច់ខាត ហើយក៏មិនអនុញ្ញាតឱ្យបាត់បង់ដីសូម្បីតែមួយមីលីម៉ែត្រឡើយ។

ទី២ គឺការបោះបង្គោលព្រំដែនជាមួយប្រទេសជិតខាង ដែលជាទស្សនវិស័យច្បាស់លាស់ ស៊ីជម្រៅ និងជាយុទ្ធសាស្ត្រវែងឆ្ងាយរបស់សម្ដេចតេជោ ហ៊ុន សែន ដែលការបោះបង្គោលព្រំដែនជាអន្តរជាតិជាមួយប្រទេសជិតខាង ប្រៀបដូចជាប្លង់រឹង ការពារទឹកដីរបស់កម្ពុជា។ ដូច្នេះហើយ ទើបរដ្ឋាភិបាលខំចរចាជាមួយប្រទេសជិតខាង ដើម្បីបោះបង្គោលព្រំដែន ដែលទទួលស្គាល់ជាអន្តរជាតិឱ្យមានចប់ទាំងស្រុងឱ្យលឿនជាទីបំផុត។

បន្ទាប់ពីមានបង្គោលព្រំដែន គឺរាជរដ្ឋាភិបាលកសាងផ្លូវក្រវាត់ព្រំដែន ដែលនេះជាយុទ្ធសាស្ត្រមួយយ៉ាងស៊ីជម្រៅ ដែលសម្ដេចតេជោ បានគិតគូ ហើយសម្ដេចធិបតី ក៏ជាប្រតិបត្តិករមួយរូបក្នុងការកសាងផ្លូវតាមព្រំដែននេះដែរ តាំងពីសម្ដេច ជាមេបញ្ជាការរងកងទ័ពជើងគោក។ ខណៈពេលនេះ ជានាយករដ្ឋមន្ត្រី សម្ដេចធិបតី នៅតែបន្តប្ដេជ្ញាចិត្តកសាងផ្លូវក្រវាត់ព្រំដែនឱ្យបានលឿន។

របងទី៤ គឺការកសាងប៉ុស្តិ៍នគរបាលការពារព្រំដែន។ តាមការរៀបរាប់របស់លោក ប៉ែន បូណា កន្លងទៅ ក្នុងដំណើរអមសម្ដេចធិបតីចុះទៅពិនិត្យស្ថានភាពនៅតាមព្រំដែន គឺមានប៉ុស្តិ៍នគរបាលជាហូរហែតាមផ្លូវក្រវាត់ព្រំដែន ដើម្បីការពារបូរណភាពទឹកដីផង និងការពារសន្តិសុខ សុវត្តិភាពជូនប្រជាពលរដ្ឋផង។

ចំណែក របងដ៏រឹងមាំទី៥នោះ គឺការអភិវឌ្ឍនៅតំបន់ព្រំដែន ដោយត្រូវប្រែក្លាយតំបន់ព្រំដែន ឱ្យទៅជាតំបន់សន្តិភាព មិត្តភាព សហប្រតិបត្តិការ និងការអភិវឌ្ឍ។ អ្នកនាំពាក្យរាជរដ្ឋាភិបាល ចាត់ទុកថា យុទ្ធសាស្ត្រទី៥នេះ ពិតជាសំខាន់ណាស់ ទាំងនយោបាយការទូតផង និងទាំងកិច្ចការពារបូរណភាពទឹកដីផង។ លោក គូសបញ្ជាក់ថា នៅពេលព្រំដែនមានសន្តិភាព មានកិច្ចសហប្រតិបត្តិការល្អជាមួយប្រទេសជិតខាង ទើបមានពលរដ្ឋទៅរស់នៅ ហើយការអភិវឌ្ឍនៅព្រំដែនក៏នឹងកាន់តែរីកចម្រើន ហើយពលរដ្ឋ គឺជារបងដ៏រឹងមាំបំផុត៕