សាកលវិទ្យាល័យវិទ្យាសាស្ត្រសុខាភិបាលគាំទ្ររដ្ឋាភិបាលលើកិច្ចសហប្រតិបត្តិការ CLV-DTA

ថ្នាក់ដឹកនាំ មន្ត្រីរាជការ បុគ្គលិកនិងនិស្សិតនៃសាកលវិទ្យាល័យវិទ្យាសាស្ត្រសុខាភិបាល បានប្រកាស គាំទ្រយ៉ាងពេញទំហឹង ចំពោះរាជរដ្ឋាភិបាលកម្ពុជាលើកិច្ចសហប្រតិបត្តិការ តំបន់ត្រីកោណអភិវឌ្ឍ កម្ពុជា-ឡាវ-វៀតណាម (CLV-DTA) ដែលបាននាំមកនូវការរីកចម្រើនជាច្រើន រួមចំណែក ដល់ការពង្រឹងសេដ្ឋកិច្ច ពង្រឹងឯករាជ្យភាព និងបានលើកកម្ពស់ជីវភាពប្រជាជនដែលរស់នៅខេត្តទាំងបួន មិនដូចការញុះញង់អុចអាលរបស់ក្រុមជនអគតិមួយចំនួន ដែលមានចេតនាបង្កភាពវឹកវរជាឈ្នាន់ ឈានទៅរកបដិវត្តន៍ពណ៌ ដែលអាចនាំឱ្យប្រទេសជាតិជួបគ្រោះមហន្តរាយជាថ្មី។

នៅក្នុងពិធីជួបជុំថ្នាក់ដឹកនាំមន្ត្រីរាជការបុគ្គលិក និងនិស្សិត នៅព្រឹកថ្ងៃទី២២ ខែសីហា ឆ្នាំ២០២៤ នេះ សាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការ សាកលវិទ្យាល័យវិទ្យាសាស្ត្រសុខាភិបាលបានអានញាតិគាំទ្រថា យើងខ្ញុំទាំងអស់គ្នា ជាថ្នាក់ដឹកនាំ មន្ត្រីរាជការ បុគ្គលិក និងនិស្សិត នៃសាកលវិទ្យាល័យ​វិសទ្យាសាស្ត្រសុខាភិបាល សូមប្រកាស គាំទ្រយ៉ាងពេញទំហឹង ចំពោះរាជរដ្ឋាភិបាលកម្ពុជា ក្នុងកិច្ចសហប្រតិបត្តិការ តំបន់ត្រីកោណអភិវឌ្ឍ កម្ពុជា-ឡាវ-វៀតណាម (CLV-DTA) ដែលបានផ្តួចផ្តើមឡើងដោយ សម្តេចអគ្គមហាសេនាបតី តេជោ ហ៊ុន សែន តាំងពីឆ្នាំ១៩៩៩ និងបន្តដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សំដៅអភិវឌ្ឍខេត្តទាំង៤ របស់កម្ពុជា ឱ្យមានការរីកចម្រើន លើគ្រប់វិស័យ ក្លាយជាតំបន់មានសន្តិភាព មិត្តភាព និងការអភិវឌ្ឍ។

សាស្ត្រាចារ្យបានបន្តថា យើងខ្ញុំទាំងអស់គ្នា សូមប្រកាសប្រឆាំងដាច់ខាត ចំពោះក្រុមជ្រុលនិយម ដែលបានញុះញង់ បំផ្លើសព័ត៌មាន បង្កចលាចល មានបំណងធ្វើបដិវត្តន៍ពណ៌ ប៉ុនប៉ងផ្តួលរំលំរាជរដ្ឋាភិបាលស្របច្បាប់។ យើងខ្ញុំទាំងអស់គ្នា សូមប្តេជ្ញាចិត្ត រួមគ្នារក្សាសន្តិភាព ស្ថិរភាពនយោបាយ និងសុខសុវត្ថិភាពសង្គម ដើម្បីបន្តអភិវឌ្ឍប្រទេសយើង ឱ្យកាន់តែរីកចម្រើនថែមទៀត»៕

អត្ថបទ៖ សំអឿន