ឯកឧត្តម ហ៊ុន ម៉ានី៖ សន្ទុះនៃការចូលរួមមូលនិធិកសាងផ្លូវតាមព្រំដែន បង្ហាញពីការទុកចិត្តចំពោះការដឹកនាំរបស់សម្តេចធិបតី

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្ត្រីក្រសួងមុខងារសាធារណៈ បានលើកឡើងលើបណ្តាញសង្គមហ្វេសប៊ុក ព្រឹកថ្ងៃទី២៨ ខែសីហា ថា ការគាំទ្ររបស់ប្រជាជនខ្មែរគ្រប់ស្រទាប់វណ្ណៈលើមូលនិធិកសាងផ្លូវតាមព្រំដែន គឺជាសេចក្តីសាទរមួយរបស់កម្ពុជា និងបង្ហាញថា ប្រជាជនខ្មែរទុកចិត្តលើការដឹកនាំរបស់រដ្ឋាភិបាលកម្ពុជា ដែលមានសម្តេចធិបតី ហ៊ុន ម៉ាណែត ជាថ្នាក់ដឹកនាំកំពូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសំណេរនោះ ឯកឧត្តម ហ៊ុន ម៉ានី បង្ហាញពីការសាទរជាមួយសម្តេចតេជោ និងសម្តេចធិបតី  និងប្រជាពលរដ្ឋទូទាំងប្រទេស ចំពោះលទ្ធផលដ៏អស្ចារ្យនៃយុទ្ធនាការកៀរគរមូលនិធិកសាងហេដ្ឋារចនាសម្ព័ន្ធតាមខ្សែបន្ទាត់ព្រំដែន ដោយផ្តោតលើផ្លូវក្រវាត់ព្រំដែន ដែលជាគំនិតផ្តួចផ្តើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា។ ត្រឹមរយៈពេល ២ថ្ងៃប៉ុណ្ណោះ សន្ទុះនៃការគាំទ្រកើនឡើងខ្លាំងក្លា មិនថាពលរដ្ឋក្នុងស្រុក ឬក្រៅស្រុក គ្រប់វ័យសុទ្ធតែបានចូលរួមចំណែក ទោះតិច ឬច្រើនក្តី។

ឯកឧត្តម ហ៊ុន ម៉ានី បញ្ជាក់ថា៖ “ចលនាមហាសាមគ្គីជាតិដ៏ធំធេងនេះសរបញ្ជាក់ឱ្យឃើញថា ខ្មែររួបរួមគ្នាជាធ្លុងមួយ ស្រលាញ់ជាតិ ស្រលាញ់ទឹកដី និងចង់ឃើញអនាគតប្រទេសជាតិមានការរីកចម្រើន។ ម្យ៉ាងទៀត ការចូលរួមចលនាជាតិដ៏មានសារៈសំខាន់មួយនេះក៏ជាការបញ្ជាក់សារជាថ្មីម្តងទៀតថា ប្រជាពលរដ្ឋម្ចាស់ឆ្នោតគាំទ្ររាជរដ្ឋាភិបាល ដែលខ្លួនបានផ្តល់សេចក្តីទុកចិត្តតាមរយៈការបោះឆ្នោត និងបានផ្តល់ក្តីសង្ឃឹម ១០០% មកលើរាជរដ្ឋាភិបាលក្នុងការដឹកនាំនាវាកម្ពុជាឆ្ពោះទៅកាន់ត្រើយសុភមង្គល”។

តាមរយៈការគាំទ្រ និងសាមគ្គីភាពរបស់ពលរដ្ឋនេះ ឯកឧត្តម ហ៊ុន ម៉ានី មានសុទិដ្ឋិនិយមខ្ពស់ចំពោះការកសាងជាតិក្រោមការដឹកនាំរបស់គណបក្សប្រជាជនកម្ពុជា ដែលធ្វើឱ្យប្រទេសមានសន្តិភាព និងការអភិវឌ្ឍកាន់តែរីកចម្រើនទៅមុខទៀត។

សូមបញ្ជាក់ថា កាលពីថ្ងៃទី២២ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសបង្កើត “មូលនិធិកសាងហេដ្ឋារចនាសម្ព័ន្ធតាមព្រំដែន” ដើម្បីកៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធតាមបណ្តោព្រំដែន ផ្តោតលើការកសាងផ្លូវក្រវាត់ព្រំដែន និងដើម្បីឱ្យពលរដ្ឋគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមជាមួយរដ្ឋាភិបាលក្នុងការកសាងជាតិ។ ជាមួយគ្នានេះ នាយករដ្ឋមន្ត្រីកម្ពុជា ក៏បានអំពាវនាវឱ្យប្រជាពលរដ្ឋខ្មែរទាំងអស់ ចូលរួមវិភាគទានឱ្យបានច្រើនតាមការស្ម័គ្រចិត្តក្នុងមូលនិធិនេះ ដើម្បីសាមគ្គីគ្នា និងជំរុញការអភិវឌ្ឍតាមព្រំដែនកាន់តែរឹងមាំ និងប្រកបដោយចីរភាព៕

ដោយ៖ អុន ស្រីមាន