ក្រសួងការពារជាតិ៖ អ្នកប្រើរថយន្តផ្លាកលេខ «ខ.ម»ខ្លះក្រអឺតក្រទម មិនសមជាមន្ត្រីយោធា

ក្រសួងការពារជាតិ រកឃើញថា បុគ្គលជាអ្នកប្រើយានយន្តពាក់ផ្លាកលេខខេមរភូមិន្ទ «ខ.ម» ខ្លះក្រអឺតក្រទម មិនសមជាមន្ត្រីយោធា ខណៈបាតុភាពមួយចំនួន ក៏ត្រូវបានសង្កេតឃើញថា បង្កឡើងជាបន្តបន្ទាប់ពីយានយន្តដែលពាក់ផ្លាកលេខ «ខ.ម» នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ តាមរយៈសេចក្ដីជូនដំណឹងមួយ កាលពីថ្ងៃទី៣០ ខែសីហា ឆ្នាំ២០២៤ បានរៀបរាប់ឱ្យដឹងថា «ក្នុងរយៈពេលចុងក្រោយនេះ សង្កេតឃើញកើតមាននូវបាតុភាពមួយចំនួនដែលធ្វើឱ្យប៉ះពាល់ដល់សង្គម សាធារណៈ ដូចជា បញ្ហាគ្រោះថ្នាក់ចរាចរណ៍ បុគ្គលអ្នកប្រើប្រាស់មួយចំនួនមានភាពក្រអឺតក្រទម មិនសក្តិសមជាមន្ត្រីយោធា ធ្វើឱ្យមានការវាយតម្លៃ និងទទួលការរិះគន់ពីសាធារណជន ជាពិសេសប៉ះពាល់ដល់កិត្តិយសនៃកងយោធពលខេមរភូមិន្ទទាំងមូល»។

សេចក្ដីជូនដំណឹងរបស់អគ្គនាយកដ្ឋានសម្ភារៈបច្ចេកទេស ដែលផ្ញើទៅកាន់ស្ថាប័ន កងឯកភាពចំណុះក្រសួងការពារជាតិ អគ្គបញ្ជាការដ្ឋាន និងគ្រប់បណ្តាប្រភេទទ័ពជំនាញទាំងអស់ បានបញ្ជាក់បន្ថែមអំពីការប្រើប្រាស់យានយន្តពាក់ផ្លាកលេខចរាចរខេមរភូមិន្ទទាំងអស់ ដោយអនុវត្តតាមអនុក្រឹត្យលេខ៧៧ អនក្រ.បក ចុះថ្ងៃទី២៨ ខែវិច្ឆិកា ឆ្នាំ២០០៨ ពោលគឺអ្នកប្រើប្រាស់ត្រូវតែជានាយទាហានដែលមានសិទ្ធពេញលេញ ដោយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ។

អគ្គនាយកដ្ឋានសម្ភារៈបច្ចេកទេស បានសង្កត់ធ្ងន់ថា ការប្រើប្រាស់យានយន្តពាក់ផ្លាកលេខខេមរភូមិន្ទ ត្រូវស្របតាមការកំណត់របស់ក្រសួងការពារជាតិ ចំពោះក្រុមហ៊ុនសហការវិនិយោគវិស័យការពារជាតិនានា ក៏ត្រូវបានអនុវត្តដូចគ្នាដែរ។ អគ្គនាយកដ្ឋានសម្ភារៈបច្ចេកទេស ក្រសួងការពារជាតិ ក៏បានព្រមានចាត់វិធានការច្បាប់ជាធរមានចំពោះបុគ្គលជាអ្នកប្រើប្រាស់យានយន្តពាក់ផ្លាកលេខខេមរភូមិន្ទ​ ក្នុងករណីដែលអនុវត្តការប្រើប្រាស់ផ្ទុយខុសពីខ្លឹមសារនេះ។

ជាការកត់សម្គាល់ ជារឿយៗគេសង្កេតឃើញថា មានជនបរទេសបានប្រើប្រាស់រថយន្តពាក់ផ្លាកលេខ«ខ.ម» ហើយថែមទាំងបានបង្កឱ្យមានបាតុភាពមួយចំនួននៅក្នុងសង្គមផងដែរ ជាអាទិ៍ បង្កគ្រោះថ្នាក់ចរាចរណ៍នៅតាមដងផ្លូវ​ ការបើកបរមិនសមរម្យ ធ្វើឱ្យប៉ះពាល់ដល់សណ្ដាប់ធ្នាប់សាធារណៈ និងសុវត្ថិភាពសង្គម ជាដើម៕