ព័ត៌មានជាតិ

មន្ត្រីជាន់ខ្ពស់ការងារ លើកទឹកចិត្តសហជីព និងកម្មករ ចូលរួមដំណើរទស្សនកិច្ច ដើម្បីស្វែងយល់តំបន់ត្រីកោណអភិវឌ្ឍន៍ CLV

បានផុស

២ years មុន

នៅ

ថ្ងៃអង្គារ ៣ កញ្ញា ២០២៤

ដោយ

មន្ត្រីជាន់ខ្ពស់ នៃក្រសួងការងារ និងបណ្ដុះបណ្ដាលវិជ្ជាជីវៈ បានជំរុញ និងលើកទឹកចិត្តដល់សហជីព និងកម្មករ-និយោជិតទាំងអស់ ចូលរួមដំណើរទស្សនកិច្ច ដើម្បីស្វែងយល់អំពីតំបន់ត្រីកោណអភិវឌ្ឍន៍ CLV ពិសេសបានឃើញដោយផ្ទាល់នូវការអភិវឌ្ឍជាក់ស្ដែងនៅតាមតំបន់ព្រំដែនកម្ពុជា-ឡាវ-វៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ០៣ កញ្ញា នេះថា «ខ្ញុំសូមលើកទឹកចិត្តដល់សហជីព ក៏ដូចជាកម្មករ-និយោជិត ត្រូវឆ្លៀតពេលវេលា ដើម្បីចូលរួមដំណើរទស្សនកិច្ចទៅកាន់ខេត្តទាំង ៤ ដែលជាតំបន់ត្រីកោណអភិវឌ្ឍន៍ CLV ដើម្បីមើលឃើញពីទិដ្ឋភាពជាក់ស្ដែងរួម នៃខេត្តទាំងនោះអំពីការរីកចម្រើន ភាពពិតជាក់ស្ដែងរបស់ខេត្តទាំង ៤ ដើម្បីឱ្យបានយល់កាន់តែច្បាស់ពីកិច្ចការពារព្រំដែនរបស់រាជរដ្ឋាភិបាល ការអភិវឌ្ឍតំបន់ព្រំដែនរបស់រដ្ឋាភិបាល ក៏ដូចជាបែបបទ នៃការរស់នៅការប្រកបការងាររបស់ប្រជាពលរដ្ឋ សុខសុវត្ថិភាពរបស់ប្រជាពលរដ្ឋ ក៏ដូចជាប្រទេសជាតិទាំងមូល និងចូលរួមគាំទ្រ និងចូលរួមអភិវឌ្ឍន៍នៅខេត្តទាំង ៤ នេះ ក្នុងផែនការរបស់រដ្ឋាភិបាលដែលកំពុងតែកៀរគរប្រជាពលរដ្ឋ និងមហាជន ចូលរួមអភិវឌ្ឍន៍ហេដ្ឋារចនាសម្ព័ន្ធ ក៏ដូចជាសេដ្ឋកិច្ចការលើកកម្ពស់ការរស់នៅប្រជាពលរដ្ឋ នៃខេត្តទាំង ៤»។

លោក គឹម ចាន់សំណាង សមាជិកសភាសម្ព័ន្ធសហជីពជាតិកម្ពុជា បានឱ្យដឹងថា ក្រុមការងាររបស់លោកត្រៀមនឹងរៀបចំសម្របសម្រួលអំពីរបៀប នៃការចុះឈ្មោះជូនដល់កម្មករ-និយោជិត ដែលមានបំណងចង់ចូលរួមការងារនេះជាមួយរាជរដ្ឋាភិបាលនាពេលខាងមុខនេះ ខណៈមានកម្មករ-និយោជិតបណ្តារោងចក្រ សហគ្រាសជាច្រើននាក់ បានកំពុងសួរនាំអំពីរបៀប នៃការចុះឈ្មោះដើម្បីផ្តល់ឱកាសកម្មករ-កម្មការិនី ក៏ដូចជាសហជីពមូលដ្ឋាន បានឃើញដោយផ្ទាល់នូវការអភិវឌ្ឍជាក់ស្តែងនៅតាមតំបន់ព្រំដែន ការកសាងហេដ្ឋារចនាសម្ព័ន្ធផ្លូវ ក្រវាត់ព្រំដែន និងការអភិវឌ្ឍជារួមរបស់ប្រជាពលរដ្ឋក្នុងភូមិភាគឦសាន។

គួរបញ្ជាក់ថា រាជរដ្ឋាភិបាល នឹងផ្តើមដឹកប្រជាពលរដ្ឋទៅលេងព្រំដែននៅភាគឦសានចាប់ពីថ្ងៃទី ៧ ខែកញ្ញា ឆ្នាំ ២០២៤ នេះ ដោយធ្វើឡើងនៅរៀងរាល់ថ្ងៃសៅរ៍ រហូតដល់ដាច់ឆ្នាំ ២០២៤។ ទស្សនកិច្ចនេះ ផ្តោតទៅព្រំដែនក្នុងខេត្តក្រចេះ ស្ទឹងត្រែង មណ្ឌលគិរី និងរតនគិរី។ ជាទស្សនកិច្ចតែមួយថ្ងៃដោយវិលល្ងាច តែមានតំបន់ខ្លះត្រូវសម្រាកមួយយប់ ដើម្បីផ្តល់ឱកាសដល់ប្រជាពលរដ្ឋបានឃើញដោយផ្ទាល់នូវការអភិវឌ្ឍជាក់ស្តែងតាមតំបន់ព្រំដែន ការកសាងហេដ្ឋារចនាសម្ព័ន្ធផ្លូវ ក្រវាត់ព្រំដែន និងការអភិវឌ្ឍជារួមរបស់ប្រជាពលរដ្ឋក្នុងភូមិភាគឦសាន៕

អត្ថបទ ៖ សំអឿន