រដ្ឋាភិបាលដាក់ឱ្យដំណើរការសាកល្បងកម្មវិធី កំណត់​អត្តសញ្ញាណសហគ្រាស

លោក តាំង ចួនលី នាយកប្រតិបត្តិមជ្ឈមណ្ឌលបណ្តុះ​ធុរកិច្ចថ្មី “តេជោ” ជាមួយ​នឹង​តំណាងនៃក្រសួង ស្ថាប័នគោលចំនួន ៣ គឺក្រសួងពាណិជ្ជកម្ម, អគ្គនាយកដ្ឋាន​ពន្ធដារនៃក្រសួងសេដ្ឋកិច្ច ក្រសួងការងារនៅថ្ងៃទី ០៦ ខែកញ្ញា ឆ្នាំ ២០២៤ បានប្រ​កាស​ដាក់ដំណើរការសាកល្បង​នូវប្រព័ន្ធ​កំណត់​អត្តសញ្ញាណសហគ្រាស (e-KYB) នៅ​មជ្ឈ​មណ្ឌលបណ្តុះធុរកិច្ចថ្មី “តេជោ” ដោយមានការចូលរួមពី​សមាជិកដោយ​ការស្នើសុំរបស់​ថ្នាល​ផ្លាស់ប្តូរទិន្នន័យ​កម្ពុជា (CamDX) ផងដែរ។

ជាក់ស្តែង ប្រព័ន្ធ e-KYB គឺជាប្រព័ន្ធផ្ទៀងផ្ទាត់អត្តសញ្ញាណ ស្ថានភាព អនុលោម​ភាព​ច្បាប់របស់ក្រុមហ៊ុន សហគ្រាស ភាពពាក់ព័ន្ធនឹងបុគ្គល ឬក្រុមហ៊ុន សហគ្រាសដទៃ និងគ្របដណ្តប់ដល់ការចុះបញ្ជីពាណិជ្ជកម្ម ការចុះបញ្ជីពន្ធដារ និង ការស្នើសុំសេចក្តីប្រកាសជូនដំណឹងបើកសហគ្រាស។

កន្លងមក សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា បានផ្តល់ការគាំទ្រយ៉ាងពេញទំហឹងលើការងារអភិវឌ្ឍប្រព័ន្ធ e-KYB នេះនៅក្នុងប្រព័ន្ធអេកូឡូស៊ីនៃថ្នាល CamDX ដើម្បីលើកទឹកចិត្ត និងបើកផ្លូវឱ្យក្រសួង ស្ថាប័នដទៃដែលមានទិន្នន័យគោលពាក់ព័ន្ធ ចូលរួមចែករំលែកមកក្នុងថ្នាល CamDX សម្រាប់គាំទ្រដល់ប្រព័ន្ធ e-KYB បន្ថែមទៀត​សំដៅធ្វើឱ្យការងារកំណត់​អត្តសញ្ញាណ​សហគ្រាសឌីជីថល កាន់តែមានភាពសុក្រឹត្យ។

ប្រព័ន្ធ e-KYB មានលក្ខណៈស្រដៀងទៅនឹងប្រព័ន្ធសម្គាល់អត្តសញ្ញាណអតិថិជន ឌីជីថល (Electronic Known Your Customer ឬ e-KYC) ដែលវិស័យឯកជនបាន និង កំពុង​ប្រើ​ប្រាស់​កន្លងមក, ពោលប្រព័ន្ធ e-KYB នឹងអនុញ្ញាតឱ្យមានការផ្ទៀងផ្ទាត់ជាពិន្ទុ (Scoring Verification) អនុលោមភាពលើ ទិន្នន័យដែលមានស្រាប់ របស់ក្រុមហ៊ុន សហគ្រាស។

ប្រព័ន្ធ e-KYB នឹងផ្តល់អត្ថប្រយោជន៍ជាច្រើនដល់វិស័យ សាធារណៈ ជាពិសេសប្រព័ន្ធ​បច្ចេកវិទ្យា​ព័ត៌មានផ្សេងទៀតនៃរាជរដ្ឋាភិបាល ដូចជា ប្រព័ន្ធវិក្កយបត្រ អេឡិចត្រូនិក (E-invoicing), ប្រព័ន្ធលទ្ធកម្មសាធារណៈ, ប្រព័ន្ធដាក់ពិន្ទុឥណទាន​ទៅលើសហគ្រាស ជាដើម ហើយវិស័យឯកជន ដូចជាគ្រឹះ​ស្ថានហិរញ្ញវត្ថុ និងធនាគារ និងក្រុមហ៊ុនធានារ៉ាប់រងជាដើម អាចធ្វើការងារ​ប្រទាក់ក្រឡាជាមួយគ្នា និងជាមួយវិស័យសាធារណៈបានឱ្យទៅជាចង្កោមនៃ​អង្គតែមួយ​នៅក្នុងប្រព័ន្ធអេ កូឡូស៊ីឌីជីថលសម្រាប់ធុរកិច្ច តាមរយៈថ្នាល CamDX៕

សេចក្ដីប្រកាសព័ត៌មានរួមខាងក្រោម៖