ទូតខ្មែរនៅអាមេរិក ឱ្យពលរដ្ឋរស់នៅទីនោះ សាមគ្គី រក្សាវប្បធម៌ ប្រពៃណី កសាងសហគមន៍ខ្មែរឱ្យកាន់តែរឹងមាំ

ឯកអគ្គរាជទូតកម្ពុជា ប្រចាំសហរដ្ឋអាមេរិក លោក កែវ ឈា លើកទឹកចិត្តឱ្យពលរដ្ឋខ្មែរទាំងអស់ដែលរស់នៅលើទឹកដីសហរដ្ឋអាមេរិក បន្តរួបរួម សាមគ្គីគ្នាជាធ្លុងមួយ ថែរក្សាមរតកវប្បធម៌ និងប្រពៃណីជាតិខ្មែរ ដើម្បីកសាងសហគមន៍ខ្មែរឱ្យកាន់តែមានភាពរឹងមាំ។ នេះបើតាមលិខិតមួយច្បាប់ ចុះថ្ងៃទី១៧ ខែកញ្ញា ដែលលោក កែវ ឈា ប្រកាសជូនជនរួមជាតិដែលរស់នៅលើទឹកដីសហរដ្ឋអាមេរិក មុនពេលលោកបញ្ចប់អាណត្តិបេសកកម្មការងារជាឯកអគ្គរាជទូត នៃកម្ពុជាប្រចាំសហរដ្ឋអាមេរិក និងសហរដ្ឋម៉ិកស៊ិក។

កាលពីដើមឆ្នាំ២០២២ រាជរដ្ឋាភិបាលកម្ពុជា បានតែងតាំងលោក កែវ ឈា ជាឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំសហរដ្ឋអាមេរិក និងសហរដ្ឋម៉ិកស៉ិក។

តាមការកត់សម្គាល់ ក្នុងអាណត្តិបេសកម្មការទូតរបស់ខ្លួន លោក កែវ ឈា បានបំពេញការងារលើការលើកកម្ពស់ទំនាក់ទំនង មិត្តភាព និងកិច្ចសហប្រតិបត្តិការលើគ្រប់វិស័យរវាងព្រះរាជាណាចក្រកម្ពុជា-សហរដ្ឋអាមេរិក សំដៅការពារផល ប្រយោជន៍ជាតិ និងប្រជាជនកម្ពុជា ព្រមទាំងបានពង្រឹង និងពង្រីកទំនាក់ទំនងជាមួយសហគមន៍ខ្មែរនៅតាមរដ្ឋ និងក្រុងនានាក្នុងសហរដ្ឋអាមេរិក ស្របទៅតាមគោលនយោបាយរបស់រាជរដ្ឋាភិបាលកម្ពុជា។ ជាមួយគ្នានេះ លោក ក៏បានដើរតួនាទី ក្នុងកិច្ចការងារបញ្ជូនរតនសម្បតិជាតិ រូបសំណាកវត្ថុបុរាណ គ្រឿងអលង្ការ ដែលត្រូវបានជន លួចចេញពីប្រទេសកម្ពុជាក្នុងអំឡុងសម័យសង្គ្រាម។

នៅក្នុងលិខិតដដែល លោក កែវ ឈា ក៏បានអរគុណចំពោះជនរួមជាតិខ្មែរទាំងអស់ ដែលតែងតែផ្តល់កិច្ចសហការយ៉ាងជិតស្និទ្ធ ប្រកបដោយសាមគ្គីភាព នៅក្នុងសកម្មភាពការងាររបស់ស្ថានទូតក្នុងអាណត្តិរបស់លោក។

យ៉ាងណា គេនៅមិនទាន់ដឹងថា អ្នកការទូតរូបណា នឹងត្រូវទទួលភារកិច្ចជាឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំសហរដ្ឋអាមេរិក និងសហរដ្ឋម៉ិកស៉ិកជំនួសលោក កែវ ឈា ឡើយ។

ដោយហេតុ ក្នុងអាណត្តិការងារ ពលរដ្ឋខ្មែររស់នៅលើដីអាមេរិកបានចូលរួម និងគាំទ្រលើកិច្ចការរបស់ខ្លួននាពេលកន្លងមក លោក កែវ ឈា ដាក់ក្ដីរំពឹងថាពលរដ្ឋខ្មែររស់នៅអាមេរិក នឹងចូលរួម និងផ្ដល់កិច្ចគាំទ្រការងាររបស់ឯកអគ្គរាជទូតថ្មី ដែលនឹងចូលបំពេញភារកិច្ចជាឯកអគ្គរាជទូតកម្ពុជាប្រចាំសហរដ្ឋអាមេរិកនាពេលឆាប់ៗខាងមុខ៕

ដោយ៖ ង៉ិល ណារ៉ាត់