ព័ត៌មានជាតិ

ខេត្តកោះកុង មានជំងឺគ្រុនឈាម ជិត ២០០ ករណី តែមិនធ្ងន់ធ្ងរពេកនោះទេ

បានផុស

២ years មុន

នៅ

ថ្ងៃអង្គារ ៨ តុលា ២០២៤

ដោយ

មន្ទីរសុខាភិបាលខេត្តកោះកុង បានបង្ហាញថា ឆ្នាំនេះមានប្រជាពលរដ្ឋ ១៩៦ ករណី បានកើតជំងឺគ្រុនឈាមដែលបណ្តាលឱ្យស្លាប់កុមារម្នាក់ ទោះយ៉ាងណាមន្ត្រីសុខាភិបាលគ្រប់គ្រងព្យាបាលប្រកបដោយប្រសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃទី ៨ តុលា នេះ ខេត្តកោះកុងដែលជាខេត្តមួយនៅភាគនិរតី នៃប្រទេសកម្ពុជា រកឃើញអត្រាអ្នកកើតជំងឺគ្រុនឈាមចំនួន ១៩៦ ករណី ដោយកុមារម្នាក់រស់នៅសង្កាត់ស្ទឹងវែង ក្រុងខេមរភូមិន្ទ បានបាត់បង់ជីវិត ព្រោះអាការធ្ងន់ធ្ងរពេក គ្រាមានភាពយឺតយ៉ាវបញ្ជូនមកកាន់មន្ទីរពេទ្យ។

តាមរយៈសារព័ត៌មានកម្ពុជាថ្មី លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង គូសបញ្ជាក់នៅថ្ងៃទី ៨ តុលា នេះថា ថ្ងៃនេះ មន្ទីររបស់លោក និងអាជ្ញាធរខេត្តក្រុងសង្កាត់ បានរួមគ្នាធ្វើយុទ្ធនាការចុះដាក់ថ្នាំអាបែតដល់លំនៅឋានប្រជាពលរដ្ឋតំបន់ងាយប្រឈម នៃការកើតជំងឺគ្រុនឈាម និងផ្សព្វផ្សាយអប់រំយល់ដឹងបន្ថែមទៀតអំពីការទប់ស្កាត់ឱ្យបានទាន់ពេលវេលា។

បើតាមលោកវេជ្ជបណ្ឌិត ទៅ ម៉ឺង ជំងឺគ្រុនឈាមភាគច្រើនកើតមានចំពោះកុមារតូចៗ ហើយឈឺធ្ងន់ធ្ងរដោយសារតែអង់ទីគ័រខ្សោយជាងមនុស្សធំ។ បន្ថែមនេះ ដោយមើលឃើញពីបញ្ហាប្រឈមនេះ លោកវេជ្ជបណ្ឌិត ក៏ជំរុញដល់ប្រជាពលរដ្ឋគ្រប់រូប បោសសម្អាតស្មៅ សំបកឡានចាស់ និងថ្លុកទឹកឱ្យស្អាតល្អ ដើម្បីលុបបំបាត់ជម្រកសត្វមូសខ្លាឱ្យអស់។

លោកប្រធានមន្ទីរសុខាភិបាលខេត្តកោះកុង អះអាងថា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី លោកសាស្ត្រាចារ្យ ឈាង រ៉ា រដ្ឋមន្ត្រីសុខាភិបាល និងលោកស្រី មិថុនា ភូថង អភិបាលខេត្ត បានដាក់ចេញនូវគោលនយោបាយផ្នែកសុខាភិបាលជាអាទិភាពសំខាន់ៗ ពិសេសកត្តាអប់រំយល់ដឹងដល់ប្រជាពលរដ្ឋ ទើបវិស័យនេះត្រូវបានលើកកម្ពស់ និងធ្វើឱ្យពលរដ្ឋមានសុខភាពមាំមួនក្នុងមូលដ្ឋាន។

គួរជម្រាបថា មូលដ្ឋានខេត្តកោះកុង ជាសំណាងល្អមួយដែលមានអត្រាកើតជំងឺគ្រុនឈាមតិចតួច បើធៀបនឹងចំនួនប្រជាពលរដ្ឋសរុប ១៥ ម៉ឺននាក់។

ដោយឡែកអ្នកស្រី ខៀវ សុខុន និងលោក សំ វិចិត្រ ប្រជាពលរដ្ឋរស់នៅក្នុងសង្កាត់ស្មាច់មានជ័យ ក្រុងខេមរភូមិន្ទ សូមអរគុណដល់រដ្ឋបាលខេត្ត និងក្រុមមន្ត្រីសុខាភិបាលពាក់ព័ន្ធដែលបានចុះមកដាក់ថ្នាំអាបែតតាមខ្នងផ្ទះរបស់ពួកគាត់ ក្នុងគោលបំណងទប់ស្កាត់ការរីករាលដាលជំងឺគ្រុនឈាម។

តំណាងពលរដ្ឋដដែល លើកឡើងថា ពួកគាត់ពិតជាបារម្ភណាស់ដែរពីជំងឺគ្រុនឈាម តែទន្ទឹមនឹងការបារម្ភពួកគាត់បានធ្វើអនាម័យជុំវិញលំនៅឋានជាប្រចាំដោយមិនឱ្យមានស្មៅដុះច្រើនជុំជិត ពេលគេងត្រូវក្នុងមុង ពិសាទឹកឆ្អិន និងលុបបំបាត់ជម្រកសត្វខ្លាផងដែរ។ ចំពោះថ្នាំអាបែតដែលផ្តល់ដោយមន្ត្រីសុខាភិបាល ពួកគាត់នឹងយកទៅដាក់តាមការណែនាំក្នុងពាង ឬអាងទឹកនីមួយៗ៕

អត្ថបទ ៖ សិរីវឌ្ឍនៈ