ព័ត៌មានជាតិ

រោងម៉ាស៊ីនកិនស្រូវមួយនៅស្រុកថ្មគោល នាំចេញអង្ករបានជិត ៥ ម៉ឺនតោន ទៅទីផ្សារក្រៅប្រទេស

បានផុស

២ years មុន

នៅ

ថ្ងៃសុក្រ ២៥ តុលា ២០២៤

ដោយ

រយៈពេល ១០ ខែចុងក្រោយ ឆ្នាំ២០២៤ រោងម៉ាស៊ីនកិនស្រូវ ហ្គោលដេនស្ដារ ដែលស្ថិតក្នុងស្រុកថ្មគោល ខេត្តបាត់ដំបង មានសមត្ថភាពនាំចេញអង្ករទៅកាន់ទីផ្សារក្រៅប្រទេសបានជិត ៥ ម៉ឺនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រោងម៉ាស៊ីនកិនស្រូវ ហ្គោលដេនស្ដារ មានសមត្ថភាពផលិតកែច្នៃ និងវេចខ្ចប់អង្ករនាំចេញបាន ៥០០ តោនក្នុងមួយថ្ងៃ ខណៈនៅដូវប្រមូលផលស្រូវវស្សាឆ្នាំ២០២៤ រោងម៉ាស៊ីនមួយនេះបានបញ្ជាទិញស្រូវពីកសិករចំនួន ៣ ខេត្តជាគោលដៅ។

លោក រ៉ី រដ្ឋា ម្ចាស់រោងម៉ាស៊ីនហ្គោលដេនស្ដារបានឲ្យដឹងថា រោងម៉ាស៊ីនកិនស្រូវរបស់លោកបានប្រមូលទិញស្រូវពីប្រជាកសិករនៅក្នុងខេត្តបាត់ដំបង ពោធិ៍សាត់ និងខេត្តបន្ទាយមានជ័យបានប្រមាណ ១៥០០ តោន ក្នុងមួយថ្ងៃ ហើយស្រូវដែលប្រមូលទិញគឺជាប្រភេទស្រូវសែនក្រអូប និងស្រូវស្រង៉ែ ដែលជាប្រភេទស្រូវកំពុងមានទីផ្សារខ្ពស់ ធ្វើឲ្យកសិករមានប្រាក់ចំណូលគួរសមតាមរយៈទិន្នផលពូជស្រូវពីរប្រភេទនេះ។

ក្នុងនោះ រោងម៉ាស៊ីនរបស់លោក ក៏បាននាំចេញអង្ករប្រណិតបានជាង ៦ ម៉ឺនតោនក្នុងមួយឆ្នាំ ទៅកាន់ទីផ្សារ អឺរ៉ុប ចិន និងម៉ាឡេស៊ី ហើយក្រៅពីនេះលោកក៏កំពុងពន្លឿនការរៀបចំបែបបទនីតិវិធី ដើម្បីពង្រីកទីផ្សារនាំចេញអង្ករប្រណិត ទៅទីផ្សារសហរដ្ឋអាមេរិក ក្នុងរយៈពេលសមគួរណាមួយឆាប់ៗនេះផងដែរ។

លោកបញ្ជាក់ថា រោងម៉ាស៊ីនកិនស្រូវរបស់លោក កកើតឡើងតាំងពីឆ្នាំ១៩៨៥ និងបានពង្រីកសង្វាក់ផលិតកម្មនៅឆ្នាំ២០១៩។ រោងម៉ាស៊ីនកិនស្រូវមានយីហោថា “ហ្គោលដេនស្ដាររ៉ាយស៍មីល អេនអ៊ីមផតអិចផត” មានទីតាំងស្ថិតនៅ ភូមិកគោ ឃុំជ្រៃ ស្រុកថ្មគោល ខេត្តបាត់ដំបង។

បច្ចុប្បន្ននេះ រោងម៉ាស៊ីនកិនស្រូវរបស់លោក បានកំពុងរួមចំណែកយ៉ាងសកម្មលើការផលិត និងនាំចេញអង្ករប្រណិត ទៅកាន់ទីផ្សារអន្តរជាតិ ស្របតាមចក្ខុវិស័យរបស់រាជរដ្ឋាភិបាលកម្ពុជា ដែលកំពុងជំរុញការនាំចេញអង្ករទៅក្រៅប្រទេសផងដែរ។

ម្ចាស់រោងម៉ាស៊ីនកិនស្រូវរូបនេះបានអះអាងថា «សម្រាប់រយៈពេល ១០ខែ ឆ្នាំ២០២៤ នេះ រោងម៉ាស៊ីនកិនស្រូវរបស់លោក បាននាំចេញអង្ករទៅកាន់ទីផ្សារក្រៅប្រទេសបានជិត ៥ម៉ឺនតោន ស្របតាម ផែនការដាក់ចេញ ក្នុងការពង្រីកសង្វាក់ផលិតកម្ម ដើម្បីបង្កើនការនាំចេញនៅឆ្នាំបន្តបន្ទាប់ទៀត»។

បច្ចុប្បន្ន រោងម៉ាស៊ីនកិនស្រូវរបស់លោកបានបង្កើតការងារបានប្រមាណ ៣០០ នាក់ ដើម្បីទ្រទ្រង់សេដ្ឋកិច្ចគ្រួសារ របស់ពលរដ្ឋ ដែលជំនួសឲ្យការធ្វើសំណាកស្រុកដោយប្រថុយប្រថាននៅប្រទសជិតខាងផងដែរ ។

ទន្ទឹមនេះ លោកបានសំណូមពរថា ក្នុងនាមវិស័យឯកជន លោកបានស្នើដល់រាជរដ្ឋាភិបាលកម្ពុជា ពិនិត្យពិចារណាបន្តបញ្ចុះតម្លៃភ្លើងដើម្បីជំរុញការនាំចេញអង្ករ ជាពិសេសដើម្បីផ្ដល់ឱកាសឲ្យរោងម៉ាស៊ីនបានបង្កើនប្រាក់ចំណូលជូនកម្មករ និងបង្កើនតម្លៃការប្រមូលទិញស្រូវពីប្រជាកសិករ ឲ្យកាន់តែមានវិសាលភាពធំទូលាយបន្តទៀតផងដែរ៕

អត្ថបទ៖ សៅ សារិទ្ធ