សម្ដេចតេជោ ឧបត្ថម្ភថវិកាជិត២ម៉ឺនដុល្លារ ដល់យុវជនម្នាក់ដែលមានជម្លោះជាមួយថៅកែ រហូតជាប់ពន្ធនាគារ

នៅព្រឹកថ្ងៃព្រហស្បតិ៍ នេះ សម្ដេចតេជោ ហ៊ុន សែន បានសម្របសម្រួលបញ្ចប់ជម្លោះរវាង បុគ្គលឈ្មោះ ណន សុខហេង ដែលជាប់ឃុំ ក្រោយមានជម្លោះជាមួយថៅកែ រហូតជាប់ពន្ធនាគារ។ ក្នុងពេលនោះ សម្ដេចតេជោ ហ៊ុន សែន បានឧបត្ថម្ភថិវកាជិត២ម៉ឺនដុល្លារសហរដ្ឋអាមេរិកដល់លោក ណន សុខហេង ព្រមទាំងបើកអាជីវកម្មឡដុតនំប៉័ងមួយនៅក្នុងខេត្តក្រចេះ ដើម្បីប្រកបរបចិញ្ចឹមជីវិតទៅថ្ងៃក្រោយ។ 

តាមសំណេរលើទំព័រហ្វេស​ប៊ុកផ្លូវការរបស់សម្ដេចតេជោ នាថ្ងៃទី៣១ ខែតុលា សរសេរដូច្នេះ៖[សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឲ្យចៅ ណន សុខហេង អាយុ២២ឆ្នាំរស់នៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ ដែលមានជម្លោះជាមួយ ឈ្មោះ គា ចន្ធូ ម្ចាស់ក្រុមហ៊ុន«ស៊ាង ឡង មីងស៊ូ» លក់ និងផ្គត់ផ្គង់សម្ភារៈការពារជម្រាបទឹក ដែលមានទីតាំងនៅផ្លូវភ្នំពេញ ហាណូយ ភូមិឈ្មួញ សង្កាត់ឈ្មួញ ខណ្ឌសែនសុខ ចូលជួបដើម្បីសម្របសម្រួលបញ្ចប់ជម្លោះក្រៅប្រព័ន្ធតុលាការ ដោយមានការចូលរួមសម្របសម្រួលដោយ ប្រធានគណៈកម្មាធិការនីតិកម្មព្រឹទ្ធសភា ស្នងការនគរបាលរាជធានីភ្នំពេញ នៅវិមានព្រឹទ្ធសភា រាជធានីភ្នំពេញ ] ។

នៅក្នុងការសម្របសម្រួលនេះ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានស្នើសុំឱ្យភាគីជម្លោះ និងបានណែនាំទៅ គណៈកម្មាធិការនីតិកម្មព្រឹទ្ធសភា ក្រុមមេធាវីស្ម័គ្រចិត្តសម្ដេច និងស្នងការនគរបាលរាជធានីភ្នំពេញ ធ្វើការសម្របសម្រួលបញ្ចប់ជម្លោះនេះនៅក្រៅប្រព័ន្ធតុលាការ ដោយកុំឲ្យបន្តដេញដោលរកខុសត្រូវអ្វីបន្ថែមទៀត ពិសេសកុំមានការគុំគួនគ្នា និងសុំឲ្យប្រព័ន្ធផ្សព្វផ្សាយសង្គមនានាបញ្ឈប់ការផ្សាយ អ្នកនេះខុស អ្នកនេះត្រូវបន្តទៀត។

តាមសំណេរដដែល បានឱ្យដឹងថា៖[បន្ទាប់ពីបញ្ចប់ សម្ដេចតេជោ បានអនុញ្ញាតឲ្យ ចៅ ណន សុខហេង បានថតរូបអនុស្សាវរីយ៍ និងបានឧបត្ថម្ភថវិកាចំនួន ១០,០០០ដុល្លារសហរដ្ឋអាមេរិក និង ៣៥លានរៀល ព្រមទាំងបានបង្កើតអាជីវកម្មឡដុតនំប៉័ងមួយនៅក្នុងក្រុងក្រចេះ ខេត្តក្រចេះ ដល់ចៅប្រុស ដើម្បីប្រកបរបរចញ្ចឹមគ្រួសារ]។

លើសពីនេះឧបត្ថម្ភថវិកា ដើម្បីបង្កើតមុខរបរ សម្ដេចតេជោ បានណែនាំលោក ណន សុខហេង ត្រូវយកចិត្តទុកដាក់ក្នុងការប្រកបអាជីវកម្មដែល សម្ដេចបានផ្ដល់ឱ្យពេលនេះ ពិសេសត្រូវចេះយកលុយបង្កើតលុយ ហាមលេងល្បែង និង ស្មោះត្រង់ជាមួយប្រពន្ធ៕