សម្ដេចធិបតី ឱ្យពលរដ្ឋតំបន់បឹងជង្រុកក្នុងស្រុកម៉ាឡៃ ថែរក្សាសន្តិភាព ទប់ស្កាត់កុំឱ្យមានសង្គ្រាមដូចអតីតកាល

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អំពាវនាវឱ្យប្រជាពលរដ្ឋភូមិបឹងជង្រុកតេជោ ឈ្នះ ឈ្នះ  ក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ ទប់ស្កាត់កុំឱ្យមានជម្លោះបង្កជាសង្គ្រាម មិនថាសង្គ្រាមពាក្យសម្ដី ឬសង្គ្រាមប្រដាប់អាវុធឡើយ។ សម្ដេចធិបតី ថ្លែងអំពាវនាវដូច្នេះ តាមរយៈពិធីសម្ពោធសមិទ្ធផលនានា ក្នុងភូមិបឹងជង្រុកតេជោឈ្នះ ឈ្នះ ក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ នាព្រឹកថ្ងៃទី២៩ ខែវិច្ឆិកា ឆ្នាំ២០២៤ បន្ទាប់ពីមានក្រុមដែលមាននិន្នាការប្រឆាំងជ្រុលនិយមមួយក្ដាប់តូចនៅក្រៅប្រទេស បានកំពុងញុះញង់ឱ្យពលរដ្ឋធ្វើចលនាបះបោប្រឆាំងរាជរដ្ឋាភិបាលស្របច្បាប់។

សម្ដេចធិបតី ហ៊ុន ម៉ាណែត អំពាវនាវទៅកាន់ប្រជាពលរដ្ឋដូច្នេះ៖« ពលរដ្ឋនៅទីនេះ​អាចចូលរួមបានទេ? ទប់កុំឱ្យមានសង្គ្រាមទៀត ទាំងសង្គ្រាមវ៉ៃគ្នា ទាំងសង្គ្រាមរវាង​ប្រជាជន និងប្រជាជន តាមការញុះញង់របស់អ្នកមួយចំនួនដូចមុន។ ធ្វើបានទេ? អ៊ំពូមីង អត់ចង់ឱ្យនរណាមកឃោសនាអី មកតស់ងើបគ្នាទៅដុតអគាររដ្ឋបាល​ចោល អត់ទេមែនហ្អេ៎? បាន(ការអភិវឌ្ឍ)ប៉ុណ្ណេះហើយ? ត្រូវហ្អេ៎? ព្រោះឥឡូវមានគេកំពុងស្រែកកោកៗពីខាងក្រៅ​បង្កើតចលនាតស៊ូ កំពុងហៅប្រជាជនងើបឡើងបះបោរ! ឥឡូវកសាង(ហេដ្ឋារចនាសម្ព័ន្ធ)បានប៉ុណ្ណឹងហើយកុំស្ដាប់!​ ជឿលើរដ្ឋាភិបាលរួមគ្នាកសាងភូមិយើងបន្ថែមទៀត។»។

គួរឱ្យដឹងថា កាលពី៣០ឆ្នាំមុន ភូមិបឹងជង្រុកតេជោ ឈ្នះ ឈ្នះ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ គឺជាទីតាំងសមរភូមិសង្គ្រាមក្ដៅគគុកមួយរវាងក្រុមខ្មែរក្រហម និងកងទ័ពរបស់រដ្ឋាភិបាល។ បើតាមលោក ប៉ាន់ ខែមប៊ុនថន ប្រធានក្រុមការងារដោះស្រាយ និងអភិវឌ្ឍន៍តំបន់អភិវឌ្ឍន៍បឹងជង្រុកតេជោឈ្នះ ឈ្នះ ឱ្យដឹងថា ក្រោយពេលកម្ពុជា ទទួលបានសន្តិភាពពេញលេញ ទីតាំងនេះ ត្រូវជួបបញ្ហាវិវាទដណ្ដើមដីធ្លី។ វិវាទដីធ្លីកាន់តែរីកធំទៅៗ ដោយសារតែក្រុមបក្សប្រឆាំងដឹកនាំដោយទណ្ឌិត សម រង្ស៊ី ចាក់សាំងលើភ្លើងបន្ថែម ដោយថែមទាំងកៀរគ​ពលរដ្ឋ៦នាក់ ឱ្យមកធ្វើបាតុកម្មនៅរាជធានីភ្នំពេញ ក្នុងឆ្នាំ២០១៣។

 

ប៉ុន្តែដោយសារកិច្ចខិតខំប្រឹងប្រែងរបស់រាជរដ្ឋាភិបាល ក្រុមការងារបានដោះស្រាយ និងបញ្ចប់វិវាទទាំងស្រុង និងបានកសាងហេដ្ឋារចនាសម្ព័ន្ធ ជូនពលរដ្ឋដែលរស់នៅតំបន់អភិវឌ្ឍន៍បឹងជង្រុក ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។

តាមរយៈពិធីសម្ពោធនាព្រឹកថ្ងៃសុក្រ នេះ សម្ដេចធិបតី ហ៊ុន ម៉ាណែត បានធានាថា ដរាបណាភូមិបឹងជង្រុកតេជោ ឈ្នះ ឈ្នះ មានសន្តិភាព រដ្ឋាភិបាលកម្ពុជា កើតចេញពីគណបក្សប្រជាជនកម្ពុជា នឹងបន្តអភិវឌ្ឍន៍តំបន់នេះ កសាងហេដ្ឋារចនាសម្ព័ន្ធបន្ថែមទៀត ដើម្បីភាពសុខសាន្តរបស់ប្រជាពលរដ្ឋ៕

ដោយ៖ ង៉ិល ណារ៉ាត់