បញ្ជាក់​ច្បាស់​ពី​ក្រសួង វិរុស​កូវីដ​បម្លែង​ខ្លួន​ថ្មី អាច​ចម្លង​មនុស្ស ៧ នាក់​ជា​មធ្យម

លោក​ជំទាវ ឱ វណ្ណឌីន រដ្ឋលេខាធិការ​និង​អ្នក​នាំ​ពាក្យ​ក្រសួង​សុខាភិបាល​បាន​ថ្លែង​បញ្ជាក់​ថា វីរុស​បម្លែង​ខ្លួន​ថ្មី អាច​មាន​លទ្ធភាព​ចម្លង​មនុស្ស​ជា​មធ្យម ៧ នាក់ ជាង​​វីរុស​ធម្មតា។

មន្ត្រី​ក្រសួង​សុខាភិបាល​រូប​នេះ​បន្ត​ថា វីរុស​ធម្មតា​អាច​ចម្លង​បាន​ត្រឹម ៣ ទៅ ៤ នាក់ បាន​តែ​វិរុស​ថ្មី​មាន​លទ្ធភាព​ចម្លង​លឿន និង​កាច​សាហាវ។

លោកជំទាវ​បាន​ថ្លែង​ព្រមាន​ថា វីរុសកូវីដ-១៩​ បម្លែងថ្មី​ កំពុងតែចរាចរយ៉ាងសកម្មខ្លាំងក្លាជាពិសេសនៅរាជធានីភ្នំពេញនេះតែម្តង​ និងបាន​ឆ្លងបន្តទៅខេត្ត​មួយចំនួនរួចទៅ​ហើយ។

“បើ​ចាំបាច់​សូម​នៅផ្ទះ​និងកុំធ្វេីការចល័តពីកន្លែងមួយទៅកន្លែងមួយ​ ពីធីមង្គលការ​ ឡេីងផ្ទះ​ បុណ្យសាសនាផ្សេងៗ​ សូម​ថ្លឹងថ្លែង​បើ​ត្រូវ​ពន្យាពេលបាន​ ក៏ត្រូវពន្យាពេល​សិនដែរ កុំ​ឲ្យពិធី​សប្បាយ​​ទៅ​ពិធី​សោកសង្រេង​”។

លោក​ជំទាវ​បន្ត​​ថា ពេលនេះជាពេល​ចាំបាច់បំផុត​ ការបញ្ឈប់ការជួបជុំ​ ឫការពន្យាពេលនៃការរៀបចំពិធីនានា​ ល្អប្រសេីរជាជាងការឆ្លងហេីយអាចស្លាប់បានគ្រប់ពេលវេលា។ វីរុសបម្លែងថ្មីនេះ​ សាហាវជាង​ និងខ្លាំងជាងវីរុសនាពេលមុនៗ​ ដែលអាចធ្វេីឱ្យបុគ្គលស្លាប់បានគ្រប់ពេលវេលា​ ដូច​ថ្មីៗនេះ​មានករណីស្លាប់មួយនាក់រួចទៅហេីយៗ និង​ក៏នៅមានអ្នកដែលស្ថិតក្នុងសភាពធ្ងន់ធ្ងរមួយចំនួនទៀតដែរដែលក្រុមគ្រូពេទ្យកំពុងតែជួយសង្រ្គោះ៕

អត្ថបទ៖ ប៊ុណ្ណារ៉ា