ប្រធាននាយកដ្ឋានគ្រប់គ្រងសន្តិសុខឯកជន ឱ្យធ្វើបច្ចុប្បន្នភាពទិន្នន័យក្រុមហ៊ុនសន្តិសុខឯកជន

ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន នៃអគ្គស្នងការដ្ឋាននគរបាលជាតិ បានណែនាំឱ្យមន្ត្រីចំណុះធ្វើបច្ចុប្បន្នភាពទិន្នន័យឱ្យបានច្បាស់លាស់ទាំងក្រុមហ៊ុនសន្តិសុខឯកជន និងទិន្នន័យនៃការបើកវគ្គបណ្តុះបណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅបន្តរបស់នាយកដ្ឋានគ្រប់គ្រងសន្តិសុខឯកជន នារសៀលថ្ងៃទី២៣ ខែធ្នូ ឆ្នាំ២០២៤ ឧត្តមសេនីយ៍ឯក លឹម សុខារស្មី បញ្ជាក់ថា ទិន្នន័យទាំងអស់នេះ មានសារៈសំខាន់ក្នុងការប្រើប្រាស់ និងគ្រប់គ្រង។

ឧត្តមសេនីយ៍ឯក លឹម សុខារស្មី ក៏បានណែនាំកិច្ចការមួយចំនួនដល់មន្ត្រីចំណុះនាយកដ្ឋានទាំងអស់ត្រូវពង្រឹងវិន័យកងកម្លាំងនគរបាលជាតិ ក្នុងពេលបំពេញតួនាទីភារកិច្ចដោយទទួលខុសត្រូវចំពោះភារកិច្ចដែលថ្នាក់ដឹកនាំប្រគល់ជូន ដែលក្នុងនោះ ត្រូវមានសីលធម៌ និងអាកប្បកិរិយាសមរម្យ ការប្រើប្រាស់ពាក្យសម្តីទៅលើប្រជាពលរដ្ឋក៏ដូចជាមន្ត្រីក្នុងអង្គភាពត្រូវតែទន់ភ្លន់ និងម៉ឺងម៉ាត់។

ចំពោះការគ្រងឯកសណ្ឋានក្នុងនាមជាមន្ត្រីនគរបាលជាតិ ជាពិសេសពាក់ព័ន្ធការបង្ហោះរូបភាពទៅកាន់បណ្តាញសង្គមនានា លោកឧត្តមសេនីយ៍ឯក ប្រាប់ឱ្យត្រូវពិចារណាឱ្យបានត្រឹមត្រូវរាល់កំហុសដែលអាចធ្វើឱ្យបាត់បង់សេចក្តីថ្លៃថ្នូរ និងកិត្យានុភាពរបស់នគរបាលជាតិ។ រីឯការប្រើប្រាស់ស្លាកលេខរថយន្តនគរបាល ក៏ត្រួវប្រើឱ្យបានត្រឹមត្រូវ ចៀសវាងមានការប្រើប្រាស់មិនត្រូវតាមគោលដៅបម្រើឱ្យអង្គភាពមន្ត្រីនគរបាលជាតិ៕