សម្រេចឃុំខ្លួនស្ត្រីម្នាក់បង្ហោះហ្វេសប៊ុក​ថាចាក់វ៉ាក់សាំងចិនធ្វើឲ្យពិការ និងស្លាប់

តុលាការនៃសាលាដំបូងរាជធានីភ្នំពេញ បានសម្រេចឃុំខ្លួនស្ត្រីម្នាក់ឈ្មោះ ថត គឹមសាន អាយុ៥១ ឆ្នាំ ដាក់ពន្ធនាគារបណ្តោះអាសន្ន ក្រោមការចោទប្រកាន់ពីបទ «ញុះញង់បង្កឲ្យមានភាពវឹកវធ្ងន់ធ្ងរដល់សន្តិសុខសង្គម» តាមមាត្រា៤៩៤ មាត្រា៤៩៥ នៃក្រមព្រហ្មទណ្ឌ។

សមត្ថកិច្ចនៃការិយាល័យប្រឆាំងបទល្មើសបច្ចេកវិទ្យា សហការជាមួយអធិការខណ្ឌទួលគោក បានចាប់ខ្លួនស្ត្រីរូបនេះ កាលពីថ្ងៃទី ១៤ ខែមីនា បន្ទាប់ពីស្រាវជ្រាវរកឃើញ គណនីហ្វេសប៊ុក ឈ្មោះ គឹមសាន អូក្រា បានបង្ហោះខ្លឹមសារថា អ្នកទទួលវ៉ាក់សាំងការពារកូវីដ-១៩ របស់ចិន គឺធ្វើឲ្យមានអ្នកស្លាប់ច្រើន ដោយមានអាការៈ ពិការដៃ ពិការជើង ក្តៅ និងស្លាប់។

អ្នកនាំពាក្យអយ្យការអមសាលាដំបូងរាជធានីភ្នំពេញ គុជ គឹមឡុង បានប្រាប់ថា តំណាងអយ្យការបានបើកការសាកសួរស្ត្រីរូបនេះពាក់ព័ន្ធការបង្ហោះសារមិនពិតតាមបណ្ដាញសង្គមហ្វេសប៊ុក ថាការចាក់វ៉ាក់សាំងប្រឆាំងជំងឺកូវីដ១៩ របស់ចិនបានធ្វើឲ្យស្លាប់មនុស្សហើយ ជនសង្ស័យត្រូវបានតំណាងអយ្យការធ្វើការចោទប្រកាន់ជាផ្លូវការហើយ ហើយបានចាត់បញ្ជូនទៅខាងចៅក្រមស៊ើបសួរដើម្បីសម្រេចតាមនីតិវិធី៕

អត្ថបទ៖ មករា