ចក្រភពអង់គ្លេស ប្រកាសបង្កើន​កិច្ចសហប្រតិបត្តិការ​បង្រ្កាប​​ឧក្រិដ្ឋ​ឆ្លងដែន ជាមួយកម្ពុជាថែមទៀត

ចក្រភពអង់គ្លេស​ បានប្រកាសពីការបន្តបង្កើនកិច្ចសហប្រតិបត្តិការបន្ថែមទៀតពាក់ព័ន្ធលើកិច្ចការបង្ការ ទប់ស្កាត់ និងបង្ក្រាបបទល្មើសឧក្រិដ្ឋកម្មឆ្លងដែន ជាមួយនឹងភាគីកម្ពុជា ក្នុងគោលបំណង​ធានាបាននូវ​សន្តិសុខជូនពលរដ្ឋ​ប្រទេស​ទាំង២​ ក៏ដូចជា​ក្នុងតំបន់​ និងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់ភាគីចក្រភពអង់គ្លេស បានធ្វើឡើងតាមរយៈលោកស្រី Barbara Woodward ឯកអគ្គរាជទូត និងជាតំណាងអចិន្ត្រៃយ៍ចក្រភពអង់គ្លេសប្រចាំអង្គការសហប្រជាជាតិ ក្នុងគ្រាដែលលោកស្រី ជួបសម្ដែងការគួរសម និងពិភាក្សាការងារជាមួយលោក កែវ ឈា ឯកអគ្គរាជទូត និងជាតំណាងអចិន្ត្រៃយ៍កម្ពុជាប្រចាំនៅអង្គការសហប្រជាជាតិ នាទីក្រុងញូយ៉ក កាលពីថ្ងៃទី២ ខែមករា ឆ្នាំ២០២៥។

លោកស្រី Barbara Woodward បានគូសបញ្ជាក់ពីការប្ដេជ្ញាចិត្តរបស់ចក្រភពអង់គ្លេសចំពោះការបង្កើនកិច្ចសហប្រតិបត្តិការបន្ថែមទៀតជាមួយភាគីកម្ពុជា ក្នុងការដោះស្រាយបញ្ហារួម ជាពិសេសបញ្ហាឧក្រិដ្ឋកម្មឆ្លងដែន និងស្ថានការណ៍នយោយបាយនៅមីយ៉ាន់ម៉ា។

ជាការឆ្លើយតប លោក កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានបញ្ជាក់ទៅកាន់លោកស្រី តំណាងអចិន្ត្រៃយ៍ចក្រភពអង់គ្លេស អំពីកិច្ចខិតខំប្រឹងប្រែងរបស់កម្ពុជាក្នុងការងារប្រយុទ្ធប្រឆាំងនឹងឧក្រិដ្ឋកម្មឆ្លងដែន តាមរយៈយន្តការអាស៊ាន និងកិច្ចខិតខំប្រឹងប្រែងថ្នាក់ជាតិ។ សម្រាប់បញ្ហានៅមីយ៉ាន់ម៉ា លោក កែវ ឈា បានសង្កត់ធ្ងន់លើតួនាទីស្នូលរបស់អាស៊ាន ក្នុងការដោះស្រាយវិបត្តិនៅមីយ៉ាន់ម៉ា។

ជារួម មន្ត្រីការទូតទាំងពីរ បានបញ្ជាក់អំពីការត្រៀមខ្លួនរួចជាស្រេច ដើម្បីធ្វើការជាមួយគ្នាឱ្យបានជិតស្និទ្ធ សំដៅបង្កើនកិច្ចសហប្រតិបត្តិការនៅក្នុងក្របខ័ណ្ឌពហុភាគី។ តាមរយៈជំនួបនេះ​ លោកស្រី Barbara Woodward ក៏បានសម្តែងការអបអរសាទរដល់កម្ពុជា ដែលបានជាប់ឆ្នោតជាសមាជិកនៃគណៈកម្មាធិការចាត់តាំង នៃគណៈកម្មាធិការកសាងសន្តិភាពអង្គការសហប្រជាជាតិ សម្រាប់អាណត្តិ២០២៥-២០២៦ ផងដែរ។

រាជរដ្ឋាភិបាលកម្ពុជាមានការប្ដេជ្ញាចិត្តខ្ពស់ក្នុងការប្រយុទ្ធប្រឆាំងទៅនឹងឧក្រិដ្ឋកម្មឆ្លងដែនគ្រប់ប្រភេទ ជាពិសេសគឺបទល្មើសពាក់ព័ន្ធទៅនឹងការជួញដូរមនុស្ស និងគ្រឿងញៀនខុសច្បាប់ដែលបញ្ហានេះ គឺជាបញ្ហាមួយមានភាពស្មុគស្មាញ ហើយដែលកម្ពុជាត្រូវតែបន្តកិច្ចខិតខំប្រឹងប្រែង ដើម្បីដោះស្រាយបញ្ហាធំៗទាំងនេះ។ 

ការងារប្រយុទ្ធប្រឆាំងនឹងឧក្រិដ្ឋកម្មឆ្លងដែន កម្ពុជាតែឯងមិនអាចធ្វើបានទេ គឺទាមទារចាំបាច់នូវកិច្ចសហប្រតិបត្តិការទាំងក្នុងកម្រិតតំបន់ និងសកលលោក។ ក្នុងន័យនេះ កម្ពុជា ប្រកាស​ស្វាគមន៍​ក្នុងការបន្ត​បង្កើន​កិច្ចសហការ​ប្រតិបត្តិការ​បង្ការ បង្រ្កាប​បទ​ល្មើស​គ្រប់​ប្រភេទ ពិសេស​បទ​ល្មើស​ឧក្រិដ្ឋ​ឆ្លងដែន ជាមួយ​ភាគីជាមិត្ត ក្នុងគោលបំណង​ថែរក្សា​សន្តិសុខ និងសុវត្ថិភាពពិភពលោកទាំងមូល៕

ដោយ៖ ធឿន វ៉ាន់សុង