ផ្លូវជាតិលេខ ៧ ពង្រីក ៤ គន្លង ពី​ស្គន់​ដល់​ក្រុង​កំពង់ចាមសម្រេចបាន​ជាង ២៨%

គម្រោងពង្រីកផ្លូវជាតិលេខ៧ ជា ៤ គន្លង ចាប់ពីរង្វង់មូលស្គន់ ក្នុងស្រុកជើងព្រៃរហូតដល់រង្វង់មូលស្ពានគីហ្សូណា ទីរួមខេត្តកំពង់ចាម គិតត្រឹមដំណាច់ខែធ្នូ ២០២៤ សម្រេចបាន ២៨,៧៦%។ នេះបើ​តាម​មន្រ្តី​ក្រសួង​សាធារណការ​និងដឹកជញ្ជូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពី​ថ្ងៃ​ទី០៣ ខែមករា ឆ្នាំ២០២៥ លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន​គ្រប់គ្រងគម្រោងស្ថាបនាផ្លូវជាតិលេខ ៧ (រង្វង់មូលស្គន់ដល់រង្វង់មូលស្ពានគីហ្សូណា ក្រុងកំពង់ចាម) បានដឹកនាំក្រុមការងារបច្ចេកទេស និងក្រុមហ៊ុនម៉ៅការសាងសង់ (CRBC) ចុះត្រួតពិនិត្យវឌ្ឍនភាពការងារគម្រោងពង្រីក និងលើកកម្រិតផ្លូវជាតិលេខ៧ ជា៤គន្លង (ស្គន់-កំពង់ចាម) នៅកំណាត់ទី១ ដែលមានប្រវែង ១៩ គីឡូម៉ែត្រ ដើម្បីពិនិត្យវឌ្ឍនភាព និងដោះស្រាយបញ្ហាប្រឈមមួយចំនួន។

បើតាមការ​វាយតម្លៃ​និង​ពិនិត្យ​ជាក់ស្តែង​ គម្រោងពង្រីកផ្លូវជាតិលេខ៧ ជា៤គន្លង ចាប់ពីរង្វង់មូលស្គន់ ក្នុងស្រុកជើងព្រៃរហូត ដល់រង្វង់មូលស្ពានគីហ្សូណា ទីរួមខេត្តកំពង់ចាម ដែលមានប្រវែង ៤៥.៤៨គ.ម គិតត្រឹមដំណាច់ខែធ្នូ ២០២៤ សម្រេចបាន ២៨,៧៦%។

កាលពីអំឡុងខែមករា ឆ្នាំ២០២៣ រាជរដ្ឋាភិបាលកម្ពុជាបានបើកការដ្ឋានសាងសង់ ពង្រីក និងលើកកម្រិតគុណភាពកំណាត់ផ្លូវជាតិលេខ៧ ចាប់ពីរវង្វង់មូលស្គន់ស្រុកជើងព្រៃ ទៅទីរួមខេត្តកំពង់ចាម ក្នុងតម្លៃ ១១៧ លានដុល្លារ ក្រោមឥណទានសម្បទានពីរដ្ឋាភិបាលចិន។

គម្រោងពង្រីកផ្លូវជាតិលេខ ៧ មានប្រវែងប្រមាណ ៤៥,៤៨ គីឡូម៉ែត្រ ត្រូវស្ថាបនាជាប្រភេទផ្លូវក្រាលបេតុងកៅស៊ូ (AC) ហើយប្រើរយៈពេលនៃការសាងសង់ចំនួន ៤០ ខែ គ្រោងនឹងបញ្ចប់នៅក្នុងឆ្នាំ២០២៦៕