កម្ពុជាវ៉ាដាច់ហ្វីលីពីន លើការទទួលភ្ញៀវទេសចរបរទេសច្រើនបំផុតនៅឆ្នាំ២០២៤

យោងតាមការចេញផ្យាយរបស់ VN Express កម្ពុជាបានទទួលភ្ញៀវទេសចរបរទេសប្រមាណ ៦,៧ លាននាក់ ក្នុងឆ្នាំ ២០២៤ ដោយវ៉ាដាច់ប្រទេសហ្វីលីពីន ដែលទទួលបានភ្ញៀវប្រមាណ ៥,៤ លាននាក់ ក្នុងរយៈពេលដូចគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងទេសចរណ៍កម្ពុជាបានឱ្យដឹងថា តួលេខរបស់កម្ពុជាបានបង្ហាញពីកំណើនប្រមាណ ២៣ ភាគរយ ឆ្នាំលើឆ្នាំ និងខ្ពស់ជាងកម្រិតមុនវិបត្តិកូវីដ១៩។

មន្រ្តីរបស់ក្រសួងទេសចរគូសភ្ជាប់សមិទ្ធផលនេះ ទៅនឹងគោលនយោបាយផ្សព្វផ្សាយទេសចរណ៍ប្រកបដោយប្រសិទ្ធភាព ការលើកកម្ពស់ផលិតផលទេសចរណ៍ និងការកែលម្អបដិសណ្ឋារកិច្ច និងសេវាកម្ម។ នេះបើតាមការចុះផ្សាយរបស់កាសែតខ្មែរថែមស៍។ ថៃ វៀតណាម ចិន ឡាវ និងសហរដ្ឋអាមេរិក នាំមុខគេលើប្រភពភ្ញៀវទេសចរបរទេសសម្រាប់កម្ពុជា។

ផ្ទុយទៅវិញ ហ្វីលីពីន បានខកគោលដៅទាក់ទាញភ្ញៀវបរទេស ៧,៧ លាននាក់នៅឆ្នាំ២០២៤ របស់ខ្លួន ប៉ុន្តែកើបចំណូលពីវិស័យទេសចរណ៍រហូតដល់ ១៣ ប៊ីលានដុល្លារ ដែលជាចំនួនខ្ពស់ក្នុងកំណត់ត្រាមួយ។

ការណ៍គួរឱ្យកត់សម្គាល់នោះ គឺថា មុនវិបត្តិកូវីដ១៩ ហ្វីលីពីនទទួលបានភ្ញៀវបរទេសប្រមាណ ៨,២ លាននាក់ ពោលគឺច្រើនជាងកម្ពុជា ដែលទទួលត្រឹម ៦,៦ លាននាក់។

ឆ្នាំ២០២៥ នេះ កម្ពុជាមានគោលដៅទាក់ទាញភ្ញៀវទេសចរអន្តរជាតិចំនួន ៧ លាននាក់ ហើយដើម្បីសម្រេចបានគោលដៅនេះ រដ្ឋាភិបាលកម្ពុជាគ្រោងនឹងសម្រួលនីតិវិធីនៃការស្នើសុំទិដ្ឋាការតាមប្រព័ន្ធអេឡិចត្រូនិក និងកាត់បន្ថយថ្លៃសេវាទិដ្ឋាការតាមអេឡិចត្រូនិកជាដើម៕