ព័ត៌មានជាតិ

សម្តេច ម៉ែន សំអន ៖ រួមគ្នាថែរក្សាសុខសន្តិភាព ដើម្បីចូលរួមចំណែកជំរុញល្បឿន នៃការអភិវឌ្ឍ

បានផុស

១ year មុន

នៅ

ថ្ងៃចន្ទ ២០ មករា ២០២៥

ដោយ

សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្ស បានថ្លែងថា ក្រុមការងារគណបក្សចុះមូលដ្ឋានគ្រប់ជាន់ថ្នាក់ ត្រូវរួមគ្នាបន្តថែរក្សាសុខសន្តិភាព ដើម្បីចូលរួមចំណែកក្នុងការជំរុញល្បឿន នៃការអភិវឌ្ឍទូទាំងប្រទេសបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈពេលអញ្ជើញដឹកនាំកិច្ចប្រជុំបូកសរុបលទ្ធផល នៃការអនុវត្តការងាររបស់ក្រុមការងារគណបក្សចុះមូលដ្ឋានខេត្តស្វាយរៀងប្រចាំឆ្នាំ ២០២៤ និងលើកទិសដៅអនុវត្តបន្ត ដែលបានរៀបចំឡើងនៅស្នាក់ការគណបក្សប្រជាជនខេត្តស្វាយរៀង មានសមាសភាពចូលរួម ៦៧០ នាក់ កាលពីរសៀលថ្ងៃអាទិត្យ ៦ រោច ខែបុស្ស ឆ្នាំរោង ឆស័ក ព.ស ២៥៦៨ ត្រូវនឹង ថ្ងៃទី ១៩ ខែមករា ឆ្នាំ ២០២៥។

សម្តេចកិត្តិសង្គហបណ្ឌិត បានពាំនាំប្រសាសន៍ផ្ដាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជា ប្រធានគណបក្សប្រជាជនកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ជូនដល់ថ្នាក់ដឹកនាំគណបក្ស និងមន្ត្រីគណបក្សគ្រប់លំដាប់ថ្នាក់ នៃខេត្តស្វាយរៀង ដោយក្តីនឹករលឹក។

សម្តេចកិត្តិសង្គហបណ្ឌិត បានថ្លែងនូវអំណរគុណ និងការវាយតម្លៃខ្ពស់បំផុតជូនដល់ ក្រុមការងារគណៈកម្មាធិការគណបក្សខេត្ត ក្រុង ស្រុក និងឃុំ សង្កាត់ទាំងអស់ ដែលបាន ខិតខំសម្រេចបាននូវជោគជ័យដ៏ធំធេងគួរជាទីមោទនក្រៃលែង ចំពោះសមិទ្ធផលជាច្រើនដែលបាននិងកំពុងរីកដុះដាលនៅទូទាំងខេត្ត។

សម្តេចកិត្តិសង្គហបណ្ឌិត បានផ្តល់ការណែនាំដល់ក្រុមការងារគណបក្ស និងគណបក្សមូលដ្ឋានគ្រប់លំដាប់ថ្នាក់ ត្រូវរួមដៃគ្នា និងប្រមូលកម្លាំង ឲ្យក្លាយជាកម្លាំងសរុប និងជាអង្គ តែមួយ ហើយរួមគ្នាគិត រួមគ្នាធ្វើ និងរួមគ្នាទទួលខុសត្រូវក្នុងទិសដៅរួមគ្នា ដើម្បីបម្រើ ប្រជាជន, ដោះស្រាយបញ្ហាជូនប្រជាជន, និងជំរុញការអភិវឌ្ឍសង្គម-សេដ្ឋកិច្ច ខេត្តស្វាយរៀង ពិសេសការលើកកម្ពស់ជីវភាពរស់នៅប្រចាំថ្ងៃរបស់ប្រជាជនឲ្យកាន់តែធូរធារ ដើម្បីចូលរួមចំណែកក្នុងការជម្រុញល្បឿន នៃការអភិវឌ្ឍ និងសំដៅដណ្តើម ការគាំទ្រពីប្រជាជន និងធ្វើឲ្យខេត្តស្វាយរៀង ក្លាយជាមូលដ្ឋានគាំទ្រដ៏រឹងមាំ របស់គណបក្ស។

សម្តេចកិត្តិសង្គហបណ្ឌិត ផ្ដាំផ្ញើដល់មន្ត្រីគណបក្ស បន្តធ្វើអំពើល្អ និងត្រូវបន្តខិតខំ បម្រើប្រជាជន ជាពិសេស ការផ្តល់សេវាសាធារណៈផ្សេងៗ ព្រមទាំងត្រូវយកចិត្តទុកដាក់ ដោះស្រាយភាពអសកម្មនានា លើកតម្កើងជីវភាពរបស់ប្រជាជន រួមទាំងការអនុវត្ត គោលនយោបាយភូមិ-ឃុំមានសុវត្ថិភាព ពិសេសការទប់ស្កាត់ និងបង្ក្រាបអំពើឆបោក ព្រមទាំងបញ្ហាទំនាស់ដីធ្លី និងបញ្ហាពាក់ព័ន្ធនឹងកសិកម្ម៕

អត្ថបទ ៖ វិមាន

Related Topics:សម្តេច ម៉ែន សំអន