កម្ពុជា ឈ្នះមេដាយចំនួន ២ ក្នុងពានរង្វាន់ឌីជីថលអាស៊ានឆ្នាំ ២០២៥

ក្រសួង​ប្រៃសណីយ៍ និង​ទូរគមនាគមន៍ (​ក​.​ប​.​ទ​.) បាន​ប្រកាស​ថា កម្មវិធី​ចំនួន ២ របស់ កម្ពុជា បាន​ឈ្នះ​មេដាយ​មាស និង​ប្រាក់ នៃ​ពានរង្វាន់​ឌីជីថល​អាស៊ាន​ឆ្នាំ ២០២៥ ដែល​រៀបចំ​នៅ​ព្រះរាជាណាចក្រ​ថៃ ក្រោម​ក្របខណ្ឌ​កិច្ចប្រជុំ​រដ្ឋមន្ត្រី​ឌីជីថល​អាស៊ាន​លើក​ទី ៥ ប្រព្រឹត្តិ​ទៅ​កាលពី​ថ្ងៃ​ទី ១៦ ខែ​មករា ឆ្នាំ ២០២៥។

បើតាម​ក្រសួង​ប្រៃសណីយ៍​កម្មវិធី​ចំនួន ២ របស់​កម្ពុជា​ដែល​បានឈ្នះ​មេដាយ​នោះ រួមមាន​ ៖ ១. កម្មវិធី​បកប្រែ​ភាសា​ប្រៃយ៍​ខ្មែរ (Machine Translation for Khmer Braille) ដែល​អភិវឌ្ឍន៍​ដោយ​បណ្ឌិត្យ សភា​បច្ចេកវិទ្យា​ឌីជីថល​កម្ពុជា (CADT) នៃ ក​.​ប​.​ទ​. ទទួលបាន​ជ័យលាភី មេដាយមាស (​លេខ​១)​និង ​២.កម្មវិធី Tenbox ដែល​អភិវឌ្ឍន៍​ដោយ​ក្រុមហ៊ុន Wave Asia Co., Ltd. ទទួលបាន​ជ័យលាភី មេដាយ​ប្រាក់ (​លេខ​២)។

ក្រសួង​ប្រៃសណីយ៍ បន្តទៀតថា នៅក្នុង​ការប្រកួតប្រជែង​ពានរង្វាន់​ឌីជីថល​អាស៊ាន​ឆ្នាំ ​២០២៥ នេះ ប្រទេស​សមាជិក​អាស៊ាន​ទាំង​ ១០ បាន​សម្រិតសម្រាំង​ផលិតផល និង​សេវា​ឌីជីថល (Digital Products and Services) ល្អៗ​ ចំនួន ១២០ មក​ធ្វើការ​ប្រកួតប្រជែង ដោយ​ត្រូវ​បែង​ចែក​ជា ៦ ​ផ្នែក រួម​មាន ៖ ១) ដំណោះស្រាយ​ឌីជីថល​ក្នុង​ការផ្តល់​សេវាសាធារណៈ ២) ដំណោះស្រាយ ឌីជីថល​ក្នុង​ការផ្តល់សេវា​វិស័យ​ឯកជន ៣) ដំណោះស្រាយ​សម្រាប់​បរិ​យាប​ន្ន​ឌីជីថល ៤) ដំណោះស្រាយ​សម្រាប់ មាតិកា​ឌីជីថល ៥) ដំណោះស្រាយ​សម្រាប់​ធុរកិច្ច​ថ្មី​ឌីជីថល និង ៦) ដំណោះស្រាយ​សម្រាប់​នវានុវត្តន៍​ឌីជីថល។

ក្រោយ​បាន​ឆ្លងកាត់​វគ្គ​ជម្រុះ​ជាច្រើនលើក គម្រោង​ទាំងពីរ ត្រូវបាន​ជ្រើសរើស​ដើម្បី​ប្រកួតប្រជែង​ជាមួយ​បេក្ខភាពផ្ដាច់ព្រ័ត្រ​ផ្សេងទៀត ហើយ​ជា​លទ្ធផល កម្មវិធី​បកប្រែ​ភាសា​ប្រៃ​យ៍​ខ្មែរ ទទួលបាន​ជ័យលាភី មេដាយមាស លើដំណោះស្រាយ​សម្រាប់​បរិ​យាប​ន្ន​ឌីជីថល​ល្អ​បំផុត​របស់​អាស៊ាន និង – Tenbox – ទទួលបាន​ជ័យលាភី មេដាយប្រាក់ លើ​ដំណោះស្រាយ​សម្រាប់​ធុរកិច្ច​ថ្មី​ឌីជីថល​ល្អ​បំផុត​របស់​អាស៊ាន។

ក្រសួង​ប្រៃសណីយ៍ បន្ថែមថា “​កម្មវិធី​បកប្រែ​ភាសា​ប្រៃ​យ៍​ខ្មែរ​” គឺជា​បច្ចេកវិទ្យា​ដែល​ប្រើប្រាស់​បញ្ញា សិប្បនិម្មិត​ដើម្បី​បកប្រែ​ពី​ភាសា​ខ្មែរ​ទៅ​ភាសា​ខ្មែរ​ប្រៃ​យ៍ ដែល​ត្រូវបាន​បង្កើតឡើង​ក្រោម​កិច្ច​សហការ​ជាមួយ​វិទ្យាស្ថាន​ជាតិ​អប់រំ​ពិសេស ដើម្បី​លើកកម្ពស់​គុណភាព​សិក្សា​របស់​កុមារ ​និង​សិស្សានុសិស្ស​ដែល​ពិការភ្នែក ​ឬ​ ខ្សោយ​គំហើញ ព្រមទាំង​ផ្តល់​ភាពងាយស្រួល​ដល់​គ្រូបង្រៀន​ក្នុងការ​រៀបចំ​ឯកសារ​អាន​ជា​អក្សរ​ខ្មែរ​ប្រៃ​យ៍​ឱ្យ​កាន់តែ​បាន​លឿន និង មាន​ប្រសិទ្ធភាព​ខ្ពស់។

គួរ​បញ្ជាក់​ផងដែរ​ថា កន្លងមក “​កម្មវិធី​បកប្រែ​ភាសា​ខ្មែរ​ប្រៃ​យ៍​” ក៏​ធ្លាប់​បានឈ្នះ​ពានរង្វាន់​ទាំង​ក្នុង​ថ្នាក់​ជាតិ ​និង​អន្តរជាតិ ដូចជា​ ជ័យលាភី “Best Digital Research and Innovation of the Year” ក្នុង​កម្មវិធី ពានរង្វាន់​ឌីជីថល​កម្ពុជា​ឆ្នាំ​ ២០២៤ និង​ទទួល​ជ័យលាភី “Best Accessibility Award” ក្នុង​កម្មវិធី “AI for Good” នៃ​សន្និសីទ​បញ្ញា​សិប្បនិម្មិត​ពិភពលោក (World AI Conference) ឆ្នាំ​ ២០២៤ នៅ​ទីក្រុង​សៀង​ហៃ សាធារណរដ្ឋប្រជាមានិត​ចិន ដែល​រៀបចំ​ដោយ​សហភាព​ទូរគមនាគមន៍​អន្តរជាតិ (ITU)។

ចំពោះ “​កម្មវិធី Tenbox” ជា​ផលិតផល នវានុវត្តន៍​ឌីជីថល សម្រាប់​សហគ្រាស​ធុន​តូច​ និង​មធ្យម​ក្នុង​វិស័យ​ម្ហូបអាហារ​ និង​បដិសណ្ឋារកិច្ច ប្រើប្រាស់​ដើម្បី​ស្វែងរក ជ្រើសរើស និង​ធ្វើ​ការបញ្ជាទិញ​នូវ​ផលិតផល​ពី​អ្នកផ្គត់ផ្គង់​ដោយ​ស្វ័យប្រវត្តិ ងាយស្រួល និង​ឆាប់រហ័ស​។

គូស​បញ្ជាក់​ថា “​កម្មវិធី Tenbox” ក៏​ជា​ម្ចាស់​ជ័យលាភី​ធុរកិច្ច​ថ្មី​ឌីជីថល​ល្អ​បំផុត​ប្រចាំឆ្នាំ ក្នុង​កម្មវិធី​ពានរង្វាន់​ឌីជីថល​កម្ពុជា​ឆ្នាំ ២០២៣ ផង​ដែរ៕

អត្ថបទ ៖ សំអឿន