លោក​ លី ធុជ៖ ក្រោយ៩០ថ្ងៃ សង្ឃឹមអាមេរិកនឹងផ្តល់ជំនួយឡើងវិញដល់ការបោសសម្អាតមីន

រដ្ឋបាលថ្មីរបស់សហរដ្ឋអាមេរិក ក្រោមការដឹកនាំរបស់លោកប្រធានាធិបតី Donald Trump បានប្រកាសផ្អាកជំនួយជាបណ្តោះអាសន្ននៅទូទាំងពិភពលោក រួមទាំងដល់ប្រទេសកម្ពុជា ដែលអាចប៉ះពាល់ដល់គម្រោងសំខាន់ៗដូចជាការបោសសម្អាតមីនជាដើម។ ទោះជាយ៉ាងនេះក្តី មន្ត្រីជាន់ខ្ពស់កម្ពុជានៅតែមានសុទិដ្ឋិនិយមថា សហរដ្ឋអាមេរិកនឹងបន្តការគាំទ្រសម្រាប់វិស័យមីនឡើងវិញបន្ទាប់ពីការផ្អាករយៈពេល ៩០ ថ្ងៃ។

ថ្លែងទៅកាន់អ្នកសារព័ត៌មាន នៅថ្ងៃទី៣០ ខែមករា ឆ្នាំ២០២៤ លោកទេសរដ្ឋមន្ត្រី លី ធុជ ដែលជាអនុប្រធានទី១ នៃអាជ្ញាធរមីនកម្ពុជា បានទទួលស្គាល់ថា ដំណឹងនៃការផ្អាករបស់សហរដ្ឋអាមេរិកនាពេល
ថ្មីៗនេះ មិនត្រឹមតែប៉ះពាល់ដល់កម្ពុជាប៉ុណ្ណោះទេ ថែមទាំងគម្រោងផ្សេងៗជាសកល ដែលទទួលផលប្រយោជន៍ពីសហរដ្ឋអាមេរិកផងដែរ។

លោកបានគូសបញ្ជាក់ថា សហរដ្ឋអាមេរិកផ្តល់វិភាគទានប្រមាណ ១០ លានដុល្លារជារៀងរាល់ឆ្នាំ សម្រាប់កិច្ចខិតខំប្រឹងប្រែងបោសសម្អាតមីននៅកម្ពុជា ដោយថវិកាត្រូវបានបែងចែកដោយផ្ទាល់ទៅឱ្យប្រតិបត្តិករបោសសម្អាតមីន។ លោកពន្យល់ថា៖«គោលនយោបាយថ្មីរបស់អាមេរិក នឹងផ្អាកថវិកាមួយរយៈ គឺ ៩០ ថ្ងៃ ចឹងគម្រោងដែលត្រូវដំណើរការត្រូវផ្អាក។ យើងមាន ៩៣ ក្រុមអ្នកដោះមីន គិតជាបុគ្គលិក និងអ្នកដោះមីនជាង ១ ០០០​ នាក់ត្រូវបានប្រឈមផ្អាកការងារ ដូចនេះអាចប៉ះពាល់ដល់លទ្ធផលដែលរំពឹងទុក ឆ្នាំ ២០២៥ ដែលនឹងត្រូវផ្អាក ៣ខែ »។

ទោះបីជាមានការប្រឈមបែបនេះក៏ដោយ លោកទេសរដ្ឋមន្ត្រី បានសម្តែងក្តីសង្ឃឹមថា សហរដ្ឋអាមេរិក ដែលបានគាំទ្រវិស័យដោះមីនជាច្រើនទសវត្ស នឹងផ្តល់ជំនួយឡើងវិញបន្ទាប់ពីការផ្អាករយៈពេល៩០ថ្ងៃ។លោកថា៖«ក្រោយ ៩០ ថ្ងៃ យើងសង្ឃឹមថា ជំនួយនឹងវិលត្រឡប់មកវិញ កសាងភាពជាដៃគូដ៏ល្អនេះ ក្នុងវិស័យមីន រវាងកម្ពុជា និងអាមេរិក»។

ការផ្អាកជំនួយបណ្តោះអាសន្ននឹងប៉ះពាល់យ៉ាងខ្លាំងដល់ជីវភាពរស់នៅរបស់អ្នកដោះមីនជាង ១ ០០០ នាក់។ អាជ្ញាធរ​កម្ចាត់​មីន ​កំពុង​រិះរក​មធ្យោបាយ​ផ្សេងៗ​ដើម្បី​ជួយ​ដល់​អ្នក​ដោះ​មីន​កម្ពុជា​ក្នុង​អំឡុង​ពេល​នេះ ដោយលោក លី ធុជ បញ្ជាក់ថា យើងតែងតែគិតគូរជីវភាពរស់នៅ ពីដំណើរបំពេញការងាររបស់អ្នកដោះមីនយើង។

លោកមានប្រសាសន៍ថា៖«យើងពុំមានប្រាក់បៀវត្ស ប្រគល់ជូនដល់អ្នកដោះមីនជំនួសថវិកា តាមរយៈការជួយរបស់សហរដ្ឋអាមេរិកនេះទេ។ ដូច្នេះ ប្រតិបត្តិការនីមួយៗ ដែលទទួលថវិកាដោយផ្ទាល់ និងគ្រប់គ្រងធនធានមនុស្សផ្ទាល់នោះ នឹងបន្តខិតខំរកធនធានពីផ្សេង និងមធ្យោបាយគ្រប់បែបយ៉ាងដើម្បីគាំទ្រដល់ជីវភាពរបស់បងប្អូនអ្នកដោះមីន»។ នេះជាការសំណូមពររបស់អាជ្ញាធរមីនដែលបានស្នើទៅដល់ភាគីពាក់ព័ន្ធទាំងអស់ ធ្វើម៉េចរក្សាឱ្យបានអ្នកដោះមីនដែលមានបទពិសោធ ក្នុងរយៈពេល ៩០ ថ្ងៃនេះ៕