បានអន្តរាគមន៍​ទាន់​ពេល ស្រូវប្រាំងកសិករនៅ​ស្រុក​បាណន់ ​ស្វិតស្រពោនមានភាព​ស្រស់​បំព្រង​ឡើងវិញ

ដំណាំ​ស្រូវ​ប្រាំង​របស់​ប្រជាកសិករ ដាំដុះ​ក្នុងដំណាក់​កាល​លើកទី២ នៅ​តាម​ស្រុកគោលដៅមួយ​ចំនួននៅ​ខេត្តបាត់ដំបង បាន​ប្រឈម​ការ​ខ្វះ​ទឹក​ស្រោចស្រព ប៉ុន្តែ​ដោយសារ​មាន​កិច្ច​អន្តរាគមន៍​ពីមន្ត្រីមូលដ្ឋានផ្តើម​ពីថ្នាក់ស្រុកដល់ថ្នាក់ខេត្ត ក៏ដូច​ជាមន្ទីរពាក់ព័ន្ធ​នានា​ បាន​ជួយរក​ដំណោះស្រាយ​ក្នុងការ​សង្គ្រោះ​ស្រូវបានទាន់ពេល ដើម្បីទប់ស្កាត់ការខូចខាតទាំងស្រុង។

ប្រជា​កសិករ​នៅ​ក្នុង​ឃុំស្នឹង ​​ស្រុកបាណន់ បាន​អះអាង​ថា ដំណាំស្រូវ​របស់ពួកគាត់​អាច​ខូចខាត​ទាំងស្រុង​បើគ្មាន​កិច្ច​អន្តរាគមន៍​ពីមន្ត្រីពាក់ព័ន្ធ​បានទាន់ពេល ខណៈ​ប៉ុន្មានថ្ងៃចុងក្រោយនេះអាកាសធាតុបានបង្កើនកម្តៅ បង្កឲ្យ​ទឹកតាម​ប្រភពមួយចំនួនដែលកសិករ​​បម្រុង​រីងស្ងួត​អស់។

ប្រជាក​​សិករបានឲ្យដឹងថា ក្រោយ​បាន​សុំកិច្ចអន្តរាគមន៍ អាជ្ញាធរខេត្តបាត់ដំបង និងស្រុក រួមក្រុមការងាររាជរដ្ឋាភិបាល​ចុះជួយក្នុងមូលដ្ឋានស្រុកផង រហូតមកដល់ត្រឹមពេលនេះ បានកំពុង​ខ្នះខ្នែងដោះ​ស្រាយ​ទឹក​ដើម្បី​ជួយសង្រ្គោះ​ផល​ដំណាំ​ស្រូវ​កសិករ​ឲ្យបានទាន់ពេល។

​បើ​តាម​មន្ត្រី​មូលដ្ឋាន​ស្រុក​បាណន់​ថា ការ​ជួយ​អន្តរាគមន៍​ភ្លាម​ៗ​នេះ រដ្ឋបាល​ខេត្ត និង​​ក្រុម​ការងារ បាន​សម្រេច​បើក​ទ្វារ​ប្រភព​ទឹក​ចំនួន ២ សំខាន់​ៗ ក្នុង​នោះ​មានទ្វារ​ទឹក​ប្រភព​ពី​អាង​កំពីង​ពួយ និង​ទ្វារ​ទឹក​ពី​ប្រភពទំនប់ទឹកកង្ហត ដើម្បី​ជួយ​សង្គ្រោះ​ដំណាំ​ស្រូវ​ទាំង​នោះ ដែល​ជា​កិច្ច​អន្តរាគមន៍​បន្ទាន់។

​លោកស្រី កឹម គឹមអាន មេឃុំស្នឹង បានប្រាប់អ្នកសារព័ត៌មាន​ថា ឃុំស្នឹងគឺជា​ឃុំមួយរបស់ស្រុកបាណន់ មានសក្តានុពល​ទៅ​លើផ្នែកវិស័យ​កសិកម្ម ហើយ​បច្ចុប្បន្ន​ផល​ដំណាំស្រូវ​​ប្រាំង​ដំណាក់កាល​ទី២ របស់កសិករ បាន​ក្រៀមស្វិត​ជាបណ្តើរៗស្ទើរអស់ ខណៈ​អាកាសធាតុប៉ុន្មានថ្ងៃចុងក្រោយ​នេះក្តៅខ្លាំង ផ្ទៃដី​បែក​ក្រហែង បង្ក​ក្តី​បារម្ភ​ដល់កសិករគ្រប់គ្នា។

យ៉ាងណាក្រោយពីការ​ជួយអន្តរាគមន៍​ជា​បន្តបន្ទាប់ពី​អាជ្ញាធរខេត្ត ក៏ដូចជា​ប្រធាន​ក្រុមការងារ​ចុះមូលដ្ឋាន​ស្រុកបាណន់ និងក្រុមការងារ​ឃុំស្នឹង​ផង ពេល​នេះ​ដំណាំ​ស្រូវប្រាំង​ដែល​ស្វិតស្រពោននោះ មានភាព​ស្រស់បំព្រង​ឡើងវិញហើយ ដែល​ធ្វើឲ្យកសិករសប្បាយចិត្ត និងមានទំនុកចិត្តយ៉ាងខ្លាំង។

លោក ខៃ សុដា អនុប្រធានក្តាប់​រួមមន្ទីរធនធានទឹក និង​ឧតុនិយមខេត្តបាត់ដំបង បានឱ្យដឹងថា សម្រាប់ឆ្នាំ​២០២៥ នេះ ខេត្ត​បាត់ដំបង មាន​​ផែនការ​ធ្វើ​ស្រូវប្រាំង ត្រឹម​តែ ២៧ ០០០ ហិកតា ប៉ុណ្ណោះ តែការអនុវត្ត​ជាក់ស្តែងបាន​កើនដល់ ៨៦ ១១៥ ហិតា លើសផែនការ​ចំនួន ៥៩ ១១៥ ហិតា។ ផ្ទៃដីដែល​អាចផ្គត់ផ្គង់​ទឹកស្រូវ​រដូវប្រាំង​បានចំនួន ៣១ ៦៩៤ ហិតា ហើយផ្ទៃដីដែលមិនអាចសង្គ្រោះបានមានចំនួន ២៧ ៤២១ ហិតា៕

អត្ថបទ៖ សៅ សារិទ្ធ