អ្នកទេសចរជាង២ម៉ឺននាក់ មកលេងកម្សាន្តនៅខេត្តកោះកុងក្នុងឱកាសពិធីបុណ្យចូលឆ្នាំចិន

កោះកុង ៖ ៣ថ្ងៃក្នុងឱកាសពិធីបុណ្យចូលឆ្នាំចិនវៀតណាម មានភ្ញៀវទេសចរជាតិ និងបរទេស ស្នាក់នៅ និងកម្សាន្តតាមរមណីយដ្ឋានទេសចរណ៍ក្នុងភូមិសាស្រ្តខេត្តជាង២ម៉ឺននាក់។

គិតចាប់ពីថ្ងៃទី ២៩ ដល់ ៣១ ខែមករា ឆ្នាំ២០២៥ ខេត្តកោះកុងបានទទួលស្វាគមន៍ភ្ញៀវទេសចរសរុប២១,៥២៨ នាក់ កើនឡើង៥,១២៩ នាក់បើធៀបនឹងរយៈពេលដូចគ្នាឆ្នាំ២០២៤។

ក្នុងនោះ មានទេសចរជាតិ២០.៨១៣ នាក់ និងទេសចរបរទេសចំនួន ៧១៥ នាក់។ លោក សាគុណ ភក្តី ប្រធានការិយាល័យព័ត៌មានផ្សព្វផ្សាយនៃមន្ទីរទេសចរណ៍ខេត្តកោះកុង បានឱ្យដឹងនៅថ្ងៃទី១ ខែកុម្ភៈ ឆ្នាំ២០២៥ថា តំបន់ទេសចរកម្សាន្តដែលអ្នកទេសចរចាប់អារម្មន៍ទៅលេងច្រើនជាងគេ តំបន់ឆ្នេរនេសាទ ស្រុកស្រែអំបិល និងកោះស្តេច ស្រុកគិរីសាគរ។

បើតាមលោក សាគុណ ភក្តី មូលហេតុដែលធ្វើឱ្យមានសន្ទុះទេសចរងើបឡើងវិញយ៉ាងដូច្នេះ ក៏ព្រោះតែអាកាសធាតុអំណោយផលល្អនិងស្ថានភាពផ្លូវជាតិ១០និងផ្លូវជាតិលេខ៤៨ស្ថាបនាបានជាង៨០ភាគរយ។

ដោយឡែកលោក សៀក សាប៊ុន ប្រធានសហគមន៍តំបន់អេកូទេសចរណ៍ធម្មជាតិព្រៃកោងកាងពាមក្រសោប លើកឡើងថា ៤ថ្ងៃអំឡុងពិធីបុណ្យចូលឆ្នាំចិនវៀតណាម មានអ្នកទេសចរចម្រុះជាតិសាសន៍ជិត៧ពាន់នាក់ បានកម្សាន្តនៅតំបន់អេកូទេសចរណ៍របស់លោក។

លោក សៀក សាប៊ុន បន្តថា ភ្ញៀវទេសចរដែលមកលេងកម្សាន្ត ភាគច្រើនមកពីខេត្តពោធិសាត់ បាត់ដំបង សៀមរាប និងរាជធានីភ្នំពេញ ក៏ដូចបណ្តាខេត្តដទៃ។ លោកយល់ថា ស្ថានភាពផ្លូវជាតិលេខ១០ និងផ្លូវជាតិលេខ៤៨ ស្ថាបនាបញ្ចប់រួចរាល់ អត្រាអ្នកទេសចរនឹងកើនឡើងវិញជាមិនខាន។

ឆ្នាំ២០២៥នេះ តំបន់អេកូទេសចរធម្មជាតិព្រៃកោងកាងពាមក្រសោប គ្រោងកែលម្អសោភ័ណ្ឌ និងកសាងហេដ្ឋារចនាសម្ព័ន្ធបន្ថែម ដើម្បីបង្កើនភាពទាក់ទាញអ្នកទេសចរមកកម្សាន្ត និងស្នាក់នៅកាន់តែច្រើនបន្ថែមទៀត៕

អត្ថបទ ៖ សិរីវឌ្ឍនៈ