អភិបាលខេត្តកណ្ដាល ប្រាប់មន្ត្រីបន្តជួយសង្គ្រោះស្រូវប្រាំងពលរដ្ឋ ធ្វើយ៉ាងណាកុំឱ្យខូចដោយការខ្វះទឹកស្រោចស្រព

ក្នុងពេលចុះពិនិត្យស្ថានភាពស្រូវប្រាំងរបស់ប្រជាកសិករនៅក្នុងភូមិសាស្ត្រស្រុកស្អាង លោក គួច ចំរើន អភិបាលខេត្តកណ្ដាល បានផ្ដាំឱ្យមន្ត្រីជំនាញ រួមជាមួយអាជ្ញាធរមូលដ្ឋាន បន្តយកចិត្តទុកដាក់លើការបូមទឹកជួយសង្គ្រោះស្រូវប្រាំងរបស់ប្រជាកសិករ ធ្វើយ៉ាងណាកុំឱ្យស្រូវខូចខាតដោយសារការខ្វះទឹកស្រោចស្រព។

លោក គួច ចំរើន បានសង្កត់ធ្ងន់ដល់អាជ្ញាធរពាក់ព័ន្ធគ្រប់លំដាប់ថ្នាក់ ចុះពិនិត្យ និងតាមដានជាប្រចាំចំពោះបញ្ហាទឹកស្រោចស្រពជូនប្រជាកសិករ ធ្វើយ៉ាងណាឱ្យស្រូវរបស់ប្រជាកសិករមានទឹកគ្រប់គ្រាន់សម្រាប់ការស្រោចស្រាព ហើយមិនត្រូវឱ្យស្រូវរបស់ប្រជាកសិករខូចខាតដោយការខ្វះខាតទឹកស្រោចស្រពនៅក្នុងភូមិសាស្ត្រខេត្តកណ្ដាលឡើយ។

លោកអភិបាលខេត្ត គូសបញ្ជាក់ថា បញ្ហាខ្វះទឹកសម្រាប់ស្រោចស្រពស្រូវប្រាំងរបស់ប្រជាកសិករ ត្រូវបានប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត យកចិត្តទុកដាក់ខ្ពស់ ព្រមទាំងបានចាត់តាំងឱ្យអាជ្ញាធរមូលដ្ឋានគ្រប់លំដាប់ថ្នាក់ ចុះពិនិត្យ តាមដាន និងដោះស្រាយជូនប្រជាពលរដ្ឋឱ្យបានទាន់ពេលវេលា និងមានប្រសិទ្ធភាពខ្ពស់។

ទោះបីអាជ្ញាធរបានធ្វើការដោះស្រាយឱ្យមានទឹកគ្រប់គ្រាន់សម្រាប់ការស្រោចស្រពស្រូវប្រាំង ដែលកំពុងប្រឈមពេលនេះក្ដី ក៏លោក គួច ចំរើន បានទទូចសុំប្រជាកសិករធ្វើស្រែតែម្តងក្នុងវស្សានេះ ពីព្រោះបើសិនជាប្រជាពលរដ្ឋបន្តធ្វើនៅលើកទី២ គឺអាចប្រឈមនឹងការខ្វះខាតទឹកប្រើប្រាស់តែម្តង មិនថាតែស្រោចស្រពដំណាំទេ សូម្បីតែមនុស្ស និងសត្វ ក៏មិនមានទឹកសម្រាប់ផឹក និងបរិភោគផងដែរ។

គួរជម្រាបថា កាលពីថ្ងៃទី២ ខែកុម្ភៈ ឆ្នាំ២០២៥ លោក គួច ចំរើន អភិបាលខេត្តកណ្ដាល និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានដឹកនាំកងកម្លាំង មន្ទីរជំនាញពាក់ព័ន្ធ និងអាជ្ញាធរស្រុកស្អាង ចុះពិនិត្យទីតាំងបូមទឹក ជួយសង្គ្រោះស្រូវប្រាំងរបស់ប្រជាកសិករ និងបន្តពិនិត្យស្ថានភាពស្រូវប្រាំងរបស់ប្រជាកសិករ ដែលកន្លងមកប្រឈមក្នុងការខ្វះទឹកស្រោចស្រព ស្ថិតក្នុងឃុំចំនួន៣ រួមមាន ឃុំព្រែកអំបិល ឃុំកោះខែល និងឃុំក្រាំងយ៉ូវ។

តាមការឱ្យដឹងដោយលោក ប្រាក់ ឡាក់ ប្រធានមន្ទីរធនធានទឹក និងឧតុនិយមខេត្តកណ្ដាល ទូទាំងខេត្តកណ្ដាលមានផ្ទៃដីស្រូវប្រាំងប្រមាណជាង៥ពាន់ហិកតា ដែលប្រឈមក្នុងការខ្វះខាតទឹកស្រោចស្រព ដែលក្នុងនោះ ស្រុកស្អាង មានផ្ទៃដីស្រែប្រាំងប្រមាណជាង២ពាន់ហិកតា ដែលប្រឈមក្នុងការខ្វះការទឹកស្រោចស្រព។

លោកប្រធានមន្ទីរ បន្ថែមថា ដោយមានការយកចិត្តទុកដាក់ពីប្រមុខរាជរដ្ឋាភិបាល រដ្ឋបាលខេត្តកណ្ដាល និងអាជ្ញាធរគ្រប់លំដាប់ថ្នាក់ បានធ្វើការចុះអន្តរាគមន៍បូមទឹកសង្គ្រោះស្រូវប្រាំងរបស់ប្រជាពលរដ្ឋ ដោយគិតមកដល់ពេលនេះ មិនទាន់មានស្រូវប្រាំងរបស់ប្រជាពលរដ្ឋមួយគ្រួសារណាក្នុងខេត្តកណ្ដាល រងការខូចខាតដោយខ្វះខាតទឹកស្រោចស្រពឡើយ៕

ដោយ៖ ធឿន វ៉ាន់សុង