ព័ត៌មានជាតិ

ក្រសួងប្រៃសណីយ៍បញ្ចេញកម្មវិធី AI ចំនួន ៨ អភិវឌ្ឍដោយអ្នកជំនាញក្នុងស្រុក

បានផុស

១ year មុន

នៅ

ថ្ងៃអង្គារ ១១ កុម្ភៈ ២០២៥

ដោយ

ក្រសួងប្រៃសណីយ៍ និងទូរគមនាគមន៍ បានបង្ហាញសមិទ្ធផលក្នុងការអភិវឌ្ឍបច្ចេកវិទ្យាបញ្ញាសិប្បនិម្មិត (AI) ចំនួន ៨ នៅក្នុងសន្និបាតបូកសរុបលទ្ធផលការងាររយៈពេល ៥ ឆ្នាំរបស់ក្រសួងកាលពីសប្ដាហ៍មុននេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ិន សុវណ្ណ ប្រធាននាយកដ្ឋានបរិវត្តកម្មរដ្ឋាភិបាលឌីជីថល នៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល បានបង្ហាញពីបច្ចុប្បន្នភាពនៃការអភិវឌ្ឍបច្ចេកវិទ្យាបញ្ញាសិប្បនិម្មិត (AI) ដែលបានដាក់ឲ្យប្រើប្រាស់រហូតមកដល់ពេលនេះមានដូចជា៖

-កម្មវិធីបកប្រែភាសាខ្មែរប្រៃយ៍ Braille

កម្មវិធីបកប្រែភាសាខ្មែរប្រៃយ៍ គឺជាបច្ចេកវិទ្យាដែលប្រើប្រាស់បញ្ញាសិប្បនិម្មិត ដើម្បីបកប្រែពីភាសាខ្មែរ ទៅភាសាខ្មែរប្រៃយ៍ ហើយត្រូវបានបង្កើតឡើងជាពិសេសដើម្បីផ្ដល់ភាពងាយស្រួលដល់គ្រូបង្រៀន ក្នុងការរៀបចំឯកសារអានជាអក្សរខ្មែរប្រៃយ៍ជូនដល់កុមារ និងសិស្សានុសិស្សដែលពិការភ្នែកឬខ្សោយគំហើញឱ្យកាន់តែបានលឿន និងមានប្រសិទ្ធភាពខ្ពស់។ កម្មវិធីនេះ ទទួលបានពានរង្វាន់មាសអាស៊ាន និង ពានរង្វាន់ Best Accessibility Award ពី ITU)។

-កម្មវិធីសារិកា (https://t.me/SarikaTTSBot) ជំនួយការបំប្លែងអត្ថបទទៅជាសំឡេងភាសាខ្មែរ

កម្មវិធីបញ្ញាសិប្បនិម្មិតបំប្លែងអត្ថបទទៅជាសំឡេងសារិកា “SARIKA” ជាកម្មវិធីបញ្ញាសិប្បនិម្មិត ដែលដំណើរការនៅលើបណ្តាញសង្គមតេឡេក្រាម (Telegram Bot) សម្រាប់បំប្លែងអត្ថបទទៅជាសំឡេងភាសាខ្មែរ។ កម្មវិធីនេះអាចប្រើប្រាស់ ដើម្បីធ្វើមាតិកានិងផ្សព្វផ្សាយព័ត៌មាន ព្រមទាំងអាចអានឯកសារនានាជាសំឡេងផងដែរ។

-កម្មវិធីបកប្រែភាសារខ្មែរ-អង់គ្លេស TranslateKH (https://t.me/TranslateKH_bot)

ម៉ាស៊ីនបកប្រែ TranslateKh ជាជំនួយការឆ្លាតមានលទ្ធភាពអាចជួយដល់ការបកប្រែពាក្យ ឃ្លាប្រយោគ ឬអត្ថបទ ពីភាសាខ្មែរទៅភាសាអង់គ្លេស និងពីភាសាអង់គ្លេសមកភាសាខ្មែរវិញ។

ម៉ាស៊ីនបកប្រែ TranslateKH គឺជាបច្ចេកវិទ្យាបញ្ញាសិប្បនិម្មិត (AI) មួយ ដែលត្រូវបានបង្កើតឡើងប្រើប្រាស់វិធីសាស្ត្រសិក្សាស៊ីជម្រៅ(Deep Learning)។

–កម្មវិធីវាយអត្ថបទ Khmer FastType ជាជំនួយការឆ្លាតវៃក្នុងការវាយអត្ថបទជាភាសាខ្មែរក្នុងកម្មវិធី Microsoft Word

កម្មវិធីនេះអភិវឌ្ឍឡើងដោយប្រើបច្ចេកវិទ្យាបញ្ញាសិប្បនិម្មិត (Artificial Intelligence) សម្រាប់អ្នកប្រើប្រាស់កាន់តែងាយស្រួលវាយអត្ថបទ និងត្រឹមត្រូវជាងមុន។

ក្រៅពីនេះ ក្រសួងបានដាក់ឲ្យដំណើរការ សំណុំទិន្នន័យសម្រាប់បង្រៀនដោយប្រើប្រាស់បច្ចេកវិទ្យាបញ្ញាសិប្បនិមិត្ត (LLMS), ការកែលម្អសមត្ថភាពវិភាគអតិសុខុមប្រាណ និងការបង្កើនប្រសិទ្ធភាពនៃការប្រើប្រាស់ថ្នាំអង់ទីប៊ីយោទិច តាមរយៈម៉ាស៊ីនស្វ័យសិក្សា (ក្រោមកិច្ចសហការជាមួយមន្ទីរពេទ្យកាល់ម៉ែត), ការបកប្រែភាសាគថ្លង់ និងកម្មវិធីសម្គាល់ស្លាកលេខឡាន។

លោក អ៊ិន សុវណ្ណ ប្រធាននាយកដ្ឋានបរិវត្តកម្មរដ្ឋាភិបាលឌីជីថលបានបញ្ជាក់ថា ការអភិវឌ្ឍបច្ចេកវិទ្យាបញ្ញាសិប្បនិមិត្ត ត្រូវការចាំបាច់បំផុតគឺទិន្នន័យ។ ក្រសួងកំពុងរៀបចំសេចក្តីព្រាងបទបញ្ញត្តិពាក់ព័ន្ធទិន្នន័យដូចជា ច្បាប់ការពារទិន្នន័យផ្ទាល់ខ្លួន (សេចក្តីព្រាង) ច្បាប់ស្តីពីសន្តិសុខសាយប័រ (សេចក្តីព្រាង) ច្បាប់រដ្ឋាភិបាលឌីជីថល (សេចក្តីព្រាង) គោលនយោបាយទិន្នន័យបើកចំហ (សេចក្តីព្រាង) គោលនយោបាយអភិបាលកិច្ចទិន្នន័យ (សេចក្តីព្រាង)។

រដ្ឋាភិបាលបានដាក់ចេញផែនទីបង្ហាញផ្លូវជំនាញឌីជីថល (ឆ្នាំ២០២៤-២០៣៥) ដោយដាក់គោលដៅក្នុងការបណ្តុះបណ្តាលធនធានមនុស្សផ្នែកបច្ចេកវិទ្យាបញ្ញាសិប្បនិម្មិតឲ្យបាន ១០ ម៉ឺននាក់ត្រឹមឆ្នាំ ២០៣៥ ខណៈបច្ចុប្បន្ននៅបណ្ឌិត្យសភាបច្ចេកវិទ្យាឌីជីថលកម្ពុជា ក៏បានបើកថ្នាក់បណ្តុះបណ្តាលបរិញ្ញាបត្រជាន់ខ្ពស់ផ្នែកបញ្ញាសិប្បនិមិត្ត និងវិទ្យាសាស្ត្រទិន្នន័យចាប់ពីឆ្នាំ ២០២៣៕