សម្ដេចធិបតី៖ លោក សម រង្ស៊ី ស្រេកឃ្លានតំណែងនាយករដ្ឋមន្ត្រីណាស់ តែមិនបានធ្វើ ក៏តាំងខ្លួនជានាយករដ្ឋមន្ត្រីតែម្ដង

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា លើកឡើងថា មួយជីវិតរបស់ទណ្ឌិត សម រង្ស៊ី គឺចង់បានតំំណែងជានាយករដ្ឋមន្ត្រីខ្លាំងណាស់ ប៉ុន្តែជាអកុសលមិនអាចឡើងកាន់តំណែងនេះបាន តែដោយហេតុតែចង់បានពេកក៏រៀបគម្រោងបង្កើតរដ្ឋាភិបាលនិរទេសជ្រកកោនលើដីបរទេស  ហើយតាំងខ្លួនជានាយករដ្ឋមន្ត្រី នៃរដ្ឋាភិបាលនិរទេសនោះតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា លើកឡើងបែបនេះ តាមរយៈគណនីហ្វេសប៊ុកផ្លូវការ នាល្ងាចថ្ងៃទី១៤ ខែកុម្ភៈ ភ្ជាប់ជាមួយវីដេអូដែលស្ត្រីម្នាក់ធ្លាប់ជាសកម្មជនស្និទ្ធជាមួយទណ្ឌិត សម រង្ស៊ី តែពេលនេះបានចាកចេញពីទណ្ឌិតរូបនេះ មកគាំទ្រគណបក្សប្រជាជនកម្ពុជាវិញ។ 

សម្ដេចធិបតី ហ៊ុន ម៉ាណែត សង្កត់ធ្ងន់ដូច្នេះ៖«ក្តីស្រមៃរបស់គាត់មានតែមួយគត់តាំងពីដើមរហូតដល់ដំណាក់កាលចុងក្រោយនៃជីវិតរបស់គាត់ គឺចង់អង្គុយលើកៅអីនាយករដ្ឋមន្ត្រី។ បើដណ្ដើមមិនបានតាមការបោះឆ្នោត គឺមានតែជំរុញមនុស្សអោយទៅដណ្តើមយកឲ្យគាត់ ក្រោមរូបភាពបដិវត្តន៍ប្រឆាំងរដ្ឋអំណាច។ តាមពត៌មានក្រៅផ្លូវការដែលទទួលបានចុងក្រោយនេះ គឺថាលោក សម រង្សី ចង់បង្កើតរដ្ឋាភិបាលនិរទេសមួយ ហើយចាត់តាំងខ្លួនឯងធ្វើជានាយករដ្ឋមន្ត្រីនៃរដ្ឋាភិបាលនិរទេសនោះ »។

ក្នុងវីដេអូរយៈពេល៤នាទីដែលសម្ដេចធិបតី ហ៊ុន ម៉ាណែត ផ្សព្វផ្សាយ គឺទណ្ឌិត សម រង្ស៊ី បាននិយាយចោទប្រកាន់ថា​សម្ដេចធិបតី ហ៊ុន ម៉ាណែត ជាមនុស្សគ្មានសមត្ថភាព និងថែមទាំងចោទប្រកាន់ផ្ទុយពីប្រវត្តិសាស្ត្រថាសម្ដេចតេជោ ហ៊ុន សែន ជាខ្មែរក្រហមកាប់សម្លាប់ប្រជាពលរដ្ឋខ្មែរ ប៉ុន្តែនៅក្នុងវីដេអូដដែល ស្ត្រីដែលធ្លាប់ស្និទ្ធនឹងទណ្ឌិត សម រង្ស៊ី ដែលមានឈ្មោះថា​ សុំ សុខា ឆ្លើយតប និងចាត់ទុកការលើកឡើងរបស់ទណ្ឌិត សម រង្ស៊ី ជាការលើកឡើងបែបកុហកបោកប្រាស់ពលរដ្ឋកម្ពុជា។

ភ្ជាប់នឹងវីដេអូ សម្ដេចធិបតី ហ៊ុន ម៉ាណែត សរសេរអំពីការយល់ឃើញថា ប្រហែលជាមកពីទណ្ឌិត សម រង្ស៊ី គ្មានមុខរបរប្រចាំថ្ងៃពិតប្រាកដ ទើបបានជាទណ្ឌិតរូបនេះ ឃើញតែដើរកាន់មេក្រូច្រៀងតាមហាង និងតាមវត្តនៅក្រៅប្រទេស ដើម្បីរៃអង្គាសលុយផ្គត់ផ្គង់ការចំណាយរបស់ខ្លួន។ សម្ដេចធិបតី ថា បទចម្រៀងរបស់ទណ្ឌិតរូបនេះ មានខ្លឹមសារដដែលៗ គឺគ្មានអ្វីក្រៅពីការវាយប្រហារនិងមើលងាយអ្នកផ្សេង ជាពីសេសមកលើសម្ដេចនិងក្រុមគ្រួសារ ក៏ដូចជាអំពាវនាវឲ្យប្រជាពលរដ្ឋផ្ដួលរដ្ឋាភិបាល។

ផ្អែកលើខ្លឹមសាក្នុងវីដេអូ សម្ដេចធិបតី អះអាងថា​ បន្ទាប់ពីបានឃើញវីដេអូអ្នកស្រី សុំ សុខា ដែលធ្លាប់ជាអ្នកដើរតាមលោក សម រង្ស៊ី និយាយក្នុងវីដេអូខ្លីមួយនេះ គឺសំដីរបស់អ្នកស្រី សុំ សុខា ហាក់ធ្វើឱ្យសម្ដេចមានអារម្មណ៍អាណិតលោក សម រង្ស៊ី ទៅវិញ ព្រោះទណ្ឌិតរូបនេះ ហាក់ដូចជាមានការស្រមើស្រមៃនិងវិលវល់ច្រើន រហូតដល់មានមោទនភាពលើខ្លួនឯងពេក ដូចពាក្យខ្មែរមួយឃ្លាថា មនុស្សអង្គុយលើចង្អេរ លើកខ្លួនឯង ឮ ព្រមទាំងមើលងាយគេដូចគ្មានអ្នកណាចេះដល់ខ្លួន។

សម្ដេចធិបតី ហ៊ុន ម៉ាណែត បានចាត់ទុកការលើកឡើងរបស់ទណ្ឌិត សម រង្ស៊ី បែបនេះ ថាជារឿងមួយដែលគួរសង្វេគដែរ សម្រាប់អ្នកនយោបាយចាស់វស្សាម្នាក់ដែលតែងបរាជ័យក្នុងសង្វៀននយោបាយកម្ពុជា៕

ដោយ៖ង៉ិល ណារ៉ាត់