មេបញ្ជាការនាវាឆ្មាំសមុទ្រឥណ្ឌាចាប់អារម្មណ៍នឹងរូប«ព្រះថោងនាងនាគ»

មេបញ្ជាការនាវាឆ្មាំសមុទ្រឥណ្ឌាចំនួន២គ្រឿងដែលបានចូលចតនៅកំពង់ផែសមុទ្រក្រុងព្រះសីហនុកាលពីថ្ងៃទី១៤ ខែកុម្ភៈ លោក វរនាវីឯក អាស៊ុល ឃីសរ (ANSHOL KISHORE) បានថ្លែងពីចំណាប់អារម្មណ៍លោកទៅនឹងរូបសំណាក «ព្រះថោង នាងនាគ» នៅខេត្តព្រះសីហនុ ដោយថាបានបង្ហាញពីទំនាក់ទំនងផ្សារភ្ជាប់ផ្លូវទឹករវាងឥណ្ឌានិងកម្ពុជា។

ថ្លែងក្នុងជំនួបជាមួយអភិបាលរងខេត្តព្រះសីហនុលោក សាមុត សុធារិទ្ធ កាលពីរសៀលថ្ងៃទី១៤ ខែកុម្ភៈ វរនាវីឯក អាស៊ុល ឃីសរ បានថ្លែងថាប្រទេសកម្ពុជាគឺជាប្រទេសសំខាន់មួយរបស់កងទ័ពជើងទឹកឥណ្ឌា ហើយកម្ពុជាគឺជាប្រទេសទី២បន្ទាប់ពីសឹង្ហបុរីដែលនាវាទាំងពីររបស់ខ្លួនបានចូលចត។

លោកបានបន្ថែមថាទោះបីទំនាក់ទំនងការទូតត្រូវបានបង្កើតក្នុងឆ្នាំ១៩៥២ក្ដី តែទំនាក់ទំនងប្រវត្តិសាស្ត្ររវាងប្រទេសទាំងពីរមានជាយូរមកហើយ នឹងបានផ្សារភ្ជាប់ជាមួយរឿងព្រះថោងនាងនាគដែល ខេត្តព្រះសីហនុបានសាងសង់រូបសំណាកផងដែរ។ លោកសង្ឃឹមថា ភ្ញៀវទេសចរឥណ្ឌានឹងមកកាន់ខេត្តព្រះសីហនុកាន់តែច្រើន។

អភិបាលរងខេត្តព្រះសីហនុលោក សមុត សុធារិទ្ធ ក៏បានលើកឡើងដែរថាឆ្នាំ២០២៥នេះជាខួប៧៣ឆ្នាំនៃទំនាក់ទំនងកម្ពុជា-ឥណ្ឌា ហើយប្រទេសទាំងពីរមានទំនាក់ទំនងមិត្តភាព សាមគ្គីភាព សហប្រតិបត្តិការជាប្រពៃណីយូរលង់ណាស់មកហើយ តាមរយៈសាសនា ភាសា និងវប្បធម៌។

រូបសំណាក «ព្រះថោងនាងនាគ»មានកម្ពស់២១ម៉ែត្រ ស្ថិតនៅឃុំបិតត្រាំង ស្រុកព្រៃនប់ ខេត្តព្រះសីហនុ ជាចំណុចប្រសព្វគ្នារវាងមហាវិថីឆ្នេររាម និងមហាវិថីជំទាវម៉ៅ ត្រូវបានរៀបចំពិធីអភិសេកជាផ្លូវការនាព្រឹកថ្ងៃទី១៦  ខែមេសា ឆ្នាំ២០២២។

ក្នុងប្រវត្តិសាស្ត្រខ្មែរតាមការនិទានតៗគ្នាមកព្រះថោង និង នាងនាគ ជាឳពុកម្ដាយ ជា​ជីដូន​ជីតា ជា​អ្នក​បង្ក​បង្កើត​អោយ​មាន​ជាតិ មាន​កំណើត មាន​ទឹក​ដី​ខ្មែរ​មុន​គេ​ដំបូង​បង្អស់។

ព្រះថោងជាស្ដេចឥណ្ឌាមានឈ្មោះកោណ្ឌញ្ញៈដែលរត់ភៀសខ្លួនជាមួយបរិវាតាមសំពៅ​ដោយសារ​សង្គ្រាមតាមមហាមុទ្រឥណ្ឌា និងបានពើបប្រទះធ្វើសង្គ្រាមជាមួយអាណាចក្រភ្នំបន្ទាប់ពីទទួលជ័យជម្នះក៏បានប្រកាសខ្លួនឯងឡើងជាស្ដេច និង​បានអភិសេក​ជាមួយនឹងព្រះនាង បភាវតី ដែលយើងស្គាល់ថា នាងនាគ ហើយប្រជារាស្ត្របានហៅស្ដេចកោណ្ឌញ្ញៈថា ព្រះថោង និងហៅព្រះនាងបភាវតីថា នាងនាគ តាំងពីពេលនោះមក៕

អត្ថបទដោយ ហ៊ុន សិរីវឌ្ឍន៍