ព័ត៌មានជាតិ

មន្ត្រីជាន់ខ្ពស់ ៖ គម្រោងធ្វើតេស្ត និងព្យាបាលជំងឺអេដស៍ដល់ពលករខ្មែរធ្វើការ នៅថៃ កំពុងសិក្សាកម្រិតបច្ចេកទេសនៅឡើយ

បានផុស

១ year មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

លោក ឈឹម ឃិនដារ៉េត អគ្គលេខាធិការ នៃអាជ្ញាធរជាតិប្រយុទ្ធនឹងជំងឺអេដស៍ (NAA) បានមានប្រសាសន៍នៅរសៀលថ្ងៃទី ១៧ កុម្ភៈ នេះថា គម្រោងកម្ពុជាសហការជាមួយភាគីថៃទៅលើការធ្វើតេស្តរកមេរោគអេដស៍ និងព្យាបាលជំងឺអេដស៍ជូនដល់ពលករខ្មែរកំពុងធ្វើការនៅប្រទេសថៃ រហូតមកដល់ពេលនេះកំពុងសិក្សាកម្រិតបច្ចេកទេសនៅឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអគ្គលេខាធិការ បានបន្តថា ប្រសិនបើគម្រោងនេះត្រូវបានអនុវត្តនោះនឹងជួយដល់ពលករខ្មែរធ្វើការនៅប្រទេសថៃអាចធ្វើតេស្ត និងទទួលការព្យាបាលជំងឺអេដស៍នៅមន្ទីរពេទ្យណាមួយនៅប្រទេសថៃ។ តែយ៉ាងណាគម្រោងនេះទាមទារឱ្យក្រុមការងារបច្ចេកទេសកម្ពុជា និងភាគីថៃ ត្រូវពិភាក្សាគ្នាជាមុនសិន ដើម្បីអាចឈានទៅចុះអនុស្សរណៈ នៃការយោគយល់គ្នា មុននឹងអនុវត្តជាផ្លូវការ។

គួរបញ្ជាក់ថា កាលពីថ្ងៃទី ១១ ខែតុលា ឆ្នាំ ២០២៤ លោកទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានដឹកនាំប្រតិភូអន្តរក្រសួងរួមមាន អាជ្ញាធរជាតិប្រយុទ្ធនឹងជំងឺអេដស៍ ទីស្ដីការគណៈរដ្ឋមន្ត្រី និងក្រសួងសុខាភិបាល ចុះទស្សនកិច្ចសិក្សានៅមន្ទីរពេទ្យផ្តល់សេវាថែទាំ ព្យាបាលជំងឺអេដស៍ នៅតាមខេត្តថៃ ជាប់ខេត្តបន្ទាយមានជ័យ និងខេត្តប៉ៃលិន រួមមានខេត្តស្រះកែវ និងខេត្តចន្ទបុរី ដើម្បីសិក្សាស្វែងយល់អំពីការងារទប់ស្កាត់មេរោគអេដស៍ និងជំងឺអេដស៍នៅប្រទេសថៃ ជាពិសេសនៅខេត្តជាប់ព្រំដែនកម្ពុជា-ថៃ។ ស្វែងរកយន្តការកិច្ចសហការជាមួយភាគីថៃ ដើម្បីផ្តល់សេវាធ្វើតេស្តរកមេរោគអេដស៍ និងថែទាំ ព្យាបាលជំងឺអេដស៍ដល់ពលករខ្មែរដែលទៅធ្វើការនៅប្រទេសថៃ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា គិតត្រឹមខែធ្នូ ឆ្នាំ ២០២៤ កម្ពុជា មានពលករខ្មែរដែលកំពុងស្នាក់នៅ និងធ្វើការនៅប្រទេសថៃ ចំនួន ១ ២៩២ ២៩៧ នាក់ ស្រី ៥២១ ៨៦២ នាក់ ដោយពួកគាត់ទៅធ្វើការនៅតាមបណ្តារោងចក្រ និងក្រុមហ៊ុននានាដូចជា តាមរោងចក្រចំណីអារហារ ផ្នែកឧស្សាហកម្ម ក្រុមហ៊ុនសំណង់ សេវាកម្ម និងកសិកម្ម ដោយជាមធ្យមទទួលបានប្រាក់ខែ ៤០០ ដុល្លារ ក្នុង ១ ខែ និងបានផ្ញើថវិកាមកក្រុមគ្រួសារវិញ ប្រមាណជាង ២ ពាន់លានដុល្លារ ក្នុង ១ ឆ្នាំ បានចូលរួមលើកស្ទួយសេដ្ឋកិច្ចគ្រួសារ ក៏ដូចជាសេដ្ឋកិច្ចជាតិកាន់តែរីកចម្រើន៕

អត្ថបទ ៖ សំអឿន