ក្រសួងបរិស្ថាន ឱ្យក្រុមហ៊ុនផលិតដំណាប់ស្វាយ ឈប់បង្ហូរសំណល់រាវចូលស្ទឹង ក្រោយពលរដ្ឋត្អូញថាជះក្លិនស្អុយ ប៉ះពាល់ការរស់នៅ

ក្រសួងបរិស្ថាន ព្រមានឲ្យក្រុមហ៊ុនផលិតដំណាប់ស្វាយ KRR Processing Food Co., Ltd. បញ្ឈប់សកម្មភាពបង្ហូរសំណល់រាវគ្រប់ប្រភេទ ចូលក្នុងស្ទឹងសែនជ័យ ភ្ជាប់ទៅស្ទឹងស្រែខ្លុង ស្ថិតនៅភូមិទី៣ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ជាបន្តទៀត បើមិនដូច្នេះក្រសួងនឹងចាត់វិធានការច្បាប់ជាធរមាន។

ការព្រមានដូច្នេះ ធ្វើឡើងបន្ទាប់ពីអនុរដ្ឋលេខាធិការក្រសួងបរិស្ថាន លោក ខ្វៃ អាទិត្យា ដឹកនាំ ក្រុមការងារអធិការកិច្ចចុះត្រួតពិនិត្យករណីបង្ហូរសំណល់រាវ ពីរោងចក្រផលិតដំណាប់ស្វាយ របស់ក្រុមហ៊ុន KRR Processing Food Co., Ltd. ចូលស្ទឹងស្រែខ្លុង។

តាមលោក ខ្វៃ អាទិត្យា នៅក្នុងប្រឡាយដីស្ថិតនៅចំហៀងខាងកើត និងខាងក្រោយអគាររោងចក្រ គឺឃើញមានស្នាមទឹកសំណល់រាវ ហូរចូលទៅក្នុងស្ទឹងសែនជ័យ ចាប់ពីចំណុចក្រោយទីតាំងរោងចក្រ រហូតដល់ចំណុចស្ពានសែនជ័យ (ចម្ងាយពីរោងចក្រប្រមាណ ៣០០ម) បន្ទាប់មកក្រុមការងារបានយកសំណាកទឹក នៅតាមដងស្ទឹងសែនជ័យចំនួន៣ ទីតាំង មកធ្វើការវិភាគនៅមន្ទីរពិសោធន៍។

គួរជ្រាបថា ការចុះធ្វើការអធិការកិច្ចនៅជុំវិញរោងចក្រផលិតដំណាប់ស្វាយនេះ ធ្វើឡើងក្រោយទទួលបានសេចក្តីរាយការណ៍ពីពលរដ្ឋថា ក្រុមហ៊ុន KRR Processing Food Co., Ltd បង្ហូរកាកសំណល់ចូលទៅក្នុងស្ទឹង បណ្ដាលឱ្យទឹកស្ទឹងដែលសេសសល់តិចតួចនៅតាមបាតស្ទឹងប្រើប្រាស់មិនកើត សត្វផឹកមិនកើត ក៏ដូចជាក្លិននៃកាកសំណល់ដែលបង្ហូរចូលស្ទឹងជះក្លិនស្អុយពិបាកដល់ការដកដង្ហើម និងពិបាកសម្រាក។

ក្នុងបទសម្ភាសន៍ជាមួយតំណាងប្រជាពលរដ្ឋ ដែលរស់នៅក្នុងតំបន់កើតហេតុ ពួកគាត់បានឱ្យដឹងថា ជារឿយៗក្រុមហ៊ុនលួចបង្ហូរសំណល់រាវចេញពីរោងចក្រស្វាយចូលស្ទឹង បង្កឱ្យមានក្លិនស្អុយ និងទឹកប្រើប្រាស់ពុំកើត។ ពលរដ្ឋស្នើសុំក្រសួង ជួយពិនិត្យ និងដោះស្រាយបញ្ហាផលប៉ះពាល់។

ឆ្លងកាត់ការពិនិត្យ ប្រមូលសំណាកទឹក និងការសម្ភាសន៍ជាមួយពលរដ្ឋរួចមក ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន ដាក់ចេញវិធានការចំពោះមុខដូចជាតម្រូវឱ្យក្រុមហ៊ុនផលិតតំណាប់ស្វាយ ត្រូវអនុវត្តតាមច្បាប់ជាធរមាន ករណីក្រុមហ៊ុនមិនអនុវត្ត ក្រសួងនឹងមានវិធានការច្បាប់ដោយពុំមានការលើកលែងឡើយ។

ក្រុមការងារតម្រូវឱ្យ ក្រុមហ៊ុនពន្លឿនការរៀបចំរបាយការណ៍វាយតម្លៃហេតុប៉ះពាល់បរិស្ថានឱ្យបានរួចរាល់  ក៏ដូចជាកែសម្រួលអាងប្រព្រឹត្តិកម្មសំណល់រាវ ដោយត្រូវអនុលោមតាមស្តង់បរិស្ថាន។

បន្ថែមពីនេះ ក្រុមហ៊ុនត្រូវបញ្ឈប់ការបង្ហូរសំណល់រាវគ្រប់ប្រភេទ ចូលក្នុងស្ទឹងជាបន្តទៀត ដោយត្រូវធ្វើការចាក់ទប់ប្រឡាយដីដែលមានសំណល់រាវហូរចូលស្ទឹងកន្លងមកនេះ និងទុកដាក់សំណល់រឹងឱ្យបានត្រឹមត្រូវ។ ចំណែកការបញ្ចេញសំណល់អនុលោមតាមគោលការណ៍ច្បាប់ និងហាមដាច់ខាត ការដុតសំណល់រឹង សំរាមនៅទីវាល  និងត្រូវយកចិត្តទុកដាក់ និងត្រូវធ្វើការអនុវត្តតាមការណែនាំរបស់ក្រុមការងារនាពេលនេះ។

លោក ខ្វៃ អាទិត្យា អះអាងថា យោងលើភស្តុតាង នឹងផលប៉ះពាល់ខាងលើ ករណីការបំពុលបរិស្ថាននេះ បង្កឡើងដោយការបញ្ចេញ សំណល់រាវរបស់ក្រុមហ៊ុន បង្កឱ្យមានផលប៉ះពាល់ ដល់គុណភាពទឹកសាធារណៈ ជីវៈចម្រុះក្នុងទឹក និងការរស់នៅរបស់ប្រជាពលរដ្ឋ។ សកម្មភាពរបស់ក្រុមហ៊ុននេះ គឺល្មើសទៅនឹងមាត្រា១៥៦ ២៨៧ ២៨៩ និង២៩០ នៃក្រមបរិស្ថាន និងធនធានធម្មជាតិ និងមាត្រា៤ មាត្រា៦ និងមាត្រា៩ថ្មី នៃអនុក្រឹត្យ ស្តីពីការត្រួតពិនិត្យការបំពុលទឹក៕