នាយករដ្ឋមន្ត្រីឱ្យបញ្ឈប់ការប្រើពាក្យសម្ដីអសីលធម៌ ខ្វះការគោរពចំពោះស្រ្តី

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី០៤ ខែមីនា ឆ្នាំ២០២៥នេះ បានអំពាវនាវឱ្យបញ្ឈប់ជាបន្ទាន់នូវទង្វើ ឬការប្រើប្រាស់ពាក្យសម្ដីអសីលធម៌ ដោយខ្វះការគោរពចំពោះតម្លៃ និងសេចក្តីថ្លៃថ្នូររបស់ស្ត្រី។

ការអំពាវនាវរបស់សម្ដេចធិបតី នាយករដ្ឋមន្ត្រី គឺបានធ្វើឡើងបន្ទាប់ពីសង្កេតឃើញថា ក្នុងមួយរយៈនេះ មានសកម្មភាព ឬការបញ្ចេញមតិរបស់បុគ្គលមួយចំនួន ដែលធ្វើឱ្យប៉ះពាល់ទៅដល់អារម្មណ៍ និងសេចក្តីថ្លៃថ្នូររបស់អ្នកដទៃ ជាពិសេសស្ត្រីភេទ ពោលគឺបាននិយាយសម្តីលេបខាយ មើលងាយ អត់ឱ្យតម្លៃលើស្ត្រី។

សកម្មភាព ឬនិយាយរបស់បុគ្គលមួយចំនួនបែបនេះ ប្រហែលជាមិនមានចេតនាអាក្រក់ ហើយគ្រាន់តែចង់បានការចាប់អារម្មណ៍ពីអ្នកមើល ឬអ្នកស្ដាប់ចំពោះសកម្មភាព ឬពាក្យសម្តីរបស់ខ្លួន និងអាចចាត់ទុកថា​ជារឿងលេងសើចធម្មតាមិនមានអ្វីធ្ងន់ធ្ងរនោះក្ដី ក៏ប៉ុន្តែសម្ដេចធិបតី ហ៊ុន ម៉ាណែត ថា សកម្មភាព ឬពាក្យសម្ដីទាំងនោះអាចប៉ះពាល់យ៉ាងខ្លាំងទៅដល់អារម្មណ៍ ក៏ដូចជាសេចក្តីថ្លៃថ្នូររបស់អ្នកដែលត្រូវទទួលរងនូវសកម្មភាព ឬពាក្យសម្ដីទាំងនោះទេ។

ក្នុងន័យនេះ តាមរយៈសារលើបណ្ដាញទំនាក់ទំនងសង្គម សម្ដេចធិបតី បានអំពាវនាវដល់ប្រជាពលរដ្ឋខ្មែរទាំងអស់ ជាពិសេសយុវជនធ្វើសកម្មភាព ឬប្រើប្រាស់ពាក្យសម្ដីជាមួយអ្នកដទៃដោយការគោរពគ្នាទៅវិញទៅមក និងប្រកាន់ខ្ជាប់នូវសីលធម៌ គុណធម៌ និងសេចក្តីថ្លៃថ្នូររបស់ខ្មែរយើង ឱ្យស័ក្តិសមជាប្រជាពលរដ្ឋដែលរស់នៅក្នុងសង្គមស៊ីវិល័យ។

សម្ដេច សង្កត់ធ្ងន់ថា បើទោះបីជាសកម្មភាពស្របច្បាប់ ឬការបញ្ចេញមតិជាសិទ្ធិរបស់បុគ្គល ក៏ប៉ុន្តែការគោរពសិទ្ធិ និងសេចក្តីថ្លៃថ្នូររបស់អ្នកដទៃ ជាកាតព្វកិច្ចសីលធម៌របស់ទាំងអស់គ្នា និងដែលត្រូវប្រកាន់ខ្ជាប់គ្រប់ពេលវេលា ដើម្បីចូលរួមថែរក្សាសុខដុមនីយកម្មសង្គម៕