ព័ត៌មានជាតិ

មន្ត្រីជាន់ខ្ពស់ ជំរុញលើកទឹកចិត្តមន្ត្រី ប.ស.ស បង្កើនការផ្សព្វផ្សាយ ការអនុវត្តរបបសន្តិសុខសង្គម ឱ្យកាន់តែទូលំទូលាយ

បានផុស

១ year មុន

នៅ

ថ្ងៃពុធ ៥ មីនា ២០២៥

ដោយ

មន្ត្រីជាន់ខ្ពស់បេឡាជាតិសន្តិសុខសង្គម(ប.ស.ស.) បានជំរុញលើកទឹកចិត្តមន្ត្រី ប.ស.ស បង្កើនការផ្សព្វផ្សាយការអនុវត្តរបបសន្ដិសុខសង្គម ឱ្យកាន់តែទូលំទូលាយ ដើម្បីឱ្យប្រជាពលរដ្ឋចូលរួមគាំទ្រ និងចូលរួមមកប្រើប្រាស់សេវា ប.ស.ស កាន់តែច្រើនបន្ថែមទៀត។

កិច្ចប្រជុំបូកសរុបលទ្ធផលការងារប្រចាំខែកុម្ភៈ និងទិសដៅអនុវត្តការងារបន្តខែមីនា ឆ្នាំ២០២៥ របស់នាយកដ្ឋានសេវាអតិថិជន និងទំនាក់ទំនងសាធារណៈ នៃប.ស.ស ដើម្បីត្រួតពិនិត្យលទ្ធផលការងារសម្រេចបាន, លើកឡើងបញ្ហាប្រឈម សំណូមពរ និងផែនការការងារអនុវត្តបន្តកាលពីថ្ងៃទី ០៤ មីនា លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រី និងបុគ្គលិក នៃនាយកដ្ឋានសេវាអតិថិជន និងទំនាក់ទំនងសាធារណៈ ដែលខិតខំប្រឹងប្រែងយ៉ាងមមាញឹកក្នុងផ្ដល់ព័ត៌មាន ផលិតមាតិកាផ្សព្វផ្សាយ និងចុះផ្សព្វផ្សាយអំពីការអនុវត្តរបបសន្តិសុខសង្គមជូនដល់សមាជិក ប.ស.ស. និងសាធារណជន ជាពិសេសកិច្ចសហការជាមួយស្ថាប័ន អង្គការដៃគូនានាប្រកបដោយការទទួលខុសត្រូវខ្ពស់ និងប្រកបដោយប្រសិទ្ធភាព។

ក្នុងឱកាសជាមួយគ្នានេះ លោកបណ្ឌិតអគ្គនាយករង បានបន្ដជំរុញលើកទឹកចិត្តដល់ថ្នាក់ដឹកនាំ មន្ត្រី និងបុគ្គលិកទាំងអស់ នៃនាយកដ្ឋានសេវាអតិថិជន និងទំនាក់ទំនងសាធារណៈ ត្រូវបន្ដកិច្ចសហការជាមួយអង្គភាពក្រោមឱវាទ ប.ស.ស. ក៏ដូចជាស្ថាប័ន អង្គការនានា ទាំងក្នុង និងក្រៅប្រទេស ដើម្បីបន្ដបង្កើនការផ្សព្វផ្សាយការអនុវត្តរបបសន្តិសុខសង្គម ឱ្យកាន់តែទូលំទូលាយ និងមានការទទួលស្គាល់កាន់តែច្រើនបន្ថែមទៀតផងដែរ៕

អត្ថបទ ៖ សំអឿន