គិត​ត្រឹម​ខែ​មករា ឆ្នាំ ២០២៥ មន្រ្តីរាជការស៊ីវិលទូទាំងប្រទេស​ សរុប​មាន​ចំនួន​ប្រមាណ ២៣ ម៉ឺននាក់

របាយការណ៍​របស់ក្រសួង​មុខងារ​សាធារណៈ​ បាន​បង្ហាញទិន្នន័យ​មន្ត្រីរាជការស៊ីវិល​នៅទូទាំងប្រទេស គិត​ត្រឹម​​ខែ​មករា​​ឆ្នាំ ២០២៥ មាន​សរុបចំនួន ២៣២ ០៣៤នាក់។ ក្នុង​នោះ​ថ្នាក់ជាតិ​មាន​ចំនួន ៥៤ ៥៨៥នាក់ (ស្ត្រី ១៦ ៦៧៦នាក់) ស្មើ ២៣.៥២% និងថ្នាក់ក្រោមជាតិ​មាន​ចំនួន ១៧៧ ៤៤៩នាក់ (ស្ត្រី ៨១ ៣១២នាក់) ស្មើ នឹង ៧៦.៥៣%។

មន្រ្តី​រាជការស៊ីវិលត្រូវ​បាន​បែងចែក​ទៅតាមក្របខ័ណ្ឌ​​។ ក្នុងរបាយការណ៍​បាន​បង្ហាញ​ថា មន្ត្រីរាជការក្របខ័ណ្ឌ “ក” នៅថ្នាក់ជាតិ មាន​ចំនួន ៣៣ ៤៣៧នាក់ (ស្ត្រី ៩ ៨៥២នាក់) ស្មើនឹង ៤៦.១៨% និងថ្នាក់ក្រោមជាតិ​មាន​ចំនួន ៣៨ ៩៦៩ នាក់ (ស្ត្រី ១២ ៧០៣នាក់) ស្មើនឹង ៥៣.៨២%។ ក្របខ័ណ្ឌ “ខ” នៅថ្នាក់ជាតិ​មាន​ចំនួន ៨ ៤៦៧ នាក់ (ស្ត្រី ៣ ៧៧៤នាក់) ស្មើនឹង ១១.៣០% និង ថ្នាក់ក្រោមជាតិ​មាន​ចំនួន ៦៦ ៤៦៨នាក់ (ស្ត្រី ២៩,៧៧៤នាក់) ស្មើនឹង ៨៨.៧០%។

ក្របខ័ណ្ឌ “គ” នៅថ្នាក់ជាតិ​មាន​ចំនួន ៣ ៤៣១ នាក់ (ស្ត្រី ១,២៦៣នាក់) ស្មើនឹង ៤.៥៥% និងថ្នាក់ក្រោមជាតិ​មាន​ចំនួន ៧១ ៩៨១ នាក់ (ស្រ្តី ៣៨,៨២៤នាក់) ស្មើនឹង ៩៥.៤៥% និងប្រភេទផ្សេងៗនៅថ្នាក់ជាតិ​មាន​ចំនួន ៩ ២៥០ នាក់ (ស្ត្រី ១,៦៨៧នាក់) ស្មើនឹង ៩៩.៦៧% និងថ្នាក់ក្រោមជាតិ​មាន​ចំនួន ៣១នាក់ (ស្រ្តី ១១នាក់) ស្មើនឹង ០.៣៣%។

ថ្លែង​នៅក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារឆ្នាំ២០២៥ របស់ក្រសួងមុខងារសាធារណៈ កាលពី​ព្រឹកថ្ងៃទី២០ ខែមិថុនា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា​បាន​លើក​ពីការ​ធ្វើកំណែទម្រង់រដ្ឋបាលសាធារណៈ តាមបណ្តា​ប្រទេស​មួយ​ចំនួន​​មាន​អាមេរិក​ អង់គ្លេស ប៉ាគីស្ថាន ម៉ាឡេស៊ី វៀតណាម និងអាហ្សង់ទីន ដោយបាន​កាត់បន្ថយក្រសួងនិងមន្ត្រី ដោយ​ប្រើអភិក្រម «បង្រួម ដើម្បីពង្រឹង»។

សម្តេច​នាយករដ្ឋមន្រ្តី​បាន​បញ្ជាក់​ថា រាជរដ្ឋាភិបាលនីតិកាលទី ៧ នៃរដ្ឋសភា បានធ្វើការកែទម្រង់ដើម្បីប្រសិទ្ធភាពនិងនិរន្តរភាពការងារ ដោយផ្អែកលើគោលការណ៍ពង្រឹងជាជាងពង្រីក ប៉ុន្តែមិនបង្រួមក្រសួងស្ថាប័នដូចប្រទេស​មួយ​ចំនួន​នោះ​ឡើយ​។

សម្រាប់បរិបទប្រទេសកម្ពុជាវិញ នាយករដ្ឋមន្រ្តី​បាន​ថ្លែង​ថា មានការអនុវត្តវិធីសាស្រ្ដផ្សេង ដើម្បីដឹកនាំឱ្យវិស័យមុខងារ​សាធារណៈ​​ឲ្យ​មានប្រសិទ្ធភាព គឺអនុវត្តអភិក្រម «ពង្រឹង ជាជាងពង្រីក» គឺមិនឱ្យមានការពង្រីកចំនួនមន្រ្ដីរាជការដែលមិនចាំបាច់ឡើយ។

បើតាមប្រមុខ​រដ្ឋាភិបាល ប្រសិទ្ធភាពនៃការកែទម្រង់តាមប្រទេសនីមួយៗ មានភាពខុសគ្នា ស្របតាមស្ថានភាពជាក់ស្តែង​នៃប្រទេសរៀងៗខ្លួន។ ការប្រើអភិក្រម «រៀបចំផ្ទះឲ្យរៀបរយ» គឺធ្វើឲ្យមន្ត្រីមានឱកាស និងមានការងារធ្វើស្មើគ្នា៕