ព័ត៌មានជាតិ

ប៉ូលីស . ប៉េអឹម នឹងចាប់ខ្លួនមនុស្សដែលដើរបំផុសអ្នកដទៃកុំឲ្យចាក់វ៉ាក់សាំងកូវីដ១៩

បានផុស

៥ years មុន

នៅ

ថ្ងៃពុធ ២៤ មីនា ២០២១

ដោយ

លោក ហេង សួរ រដ្ឋលេខាធិការនិងជាអ្នកនាំពាក្យក្រសួងការងារបានលើកឡើងក្នុងបណ្តាញសង្គមនៅព្រឹកនេះថា ប៉ូលីសនិងប៉េអឹម នឹងចាប់ខ្លួនមនុស្សដែលដើរបំផុសអ្នកដទៃកុំឲ្យចាក់វ៉ាក់សាំងកូវីដ១៩។

លោកបានបន្តថា «សូមបងប្អូនជួយថតរូបនិងប្ដឹងប៉ូលីសជាបន្ទាន់បើឃើញនរណាម្នាក់បំផុសអ្នកដទៃកុំឲ្យចាក់វ៉ាក់សាំងកូវីដ១៩»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា ការវែកមុខនិងចាប់ខ្លួនមនុស្សដែលបំផុសគេកុំឲ្យចាក់វ៉ាក់សាំងកូវីដ១៩ គឺបានបុណ្យច្រើន និងរួចផុតពីគ្រោះថ្នាក់នៃជំងឺកូវីដ១គ្រួសារ។

លោក ហេង សួរ បានអំពាវនាវដល់បងប្អូនកម្មករនិងជនរួមជាតិរួមគ្នាចូលរួមយុទ្ធនាការចាក់វ៉ាក់សាំងការពារជំងឺកូវីដ-១៩ទាំងអស់គ្នា ព្រោះថាការចាក់វ៉ាក់សាំងការពារកូវីដ១៩ គឺជាគន្លឹះក្នុងការការពារអាយុជីវិតរបស់បងប្អូន និងក្រុមគ្រួសារនិងចាក់វ៉ាក់សាំងការពារកូវីដ គឺជាផ្លូវតែមួយគត់ដែលឲ្យយើងអាចចេញធ្វើការ រកស៊ី និងជួបជុំគ្នាដោយសុវត្ថិភាពជាងមុន។

លោកបានបន្ថែមថា ជនដែលឃោសនាបំផុសបំផុលអ្នកដទៃកុំឲ្យចាក់វ៉ាក់សាំង នឹងទទួលទណ្ឌកម្ម និងបាបកម្មយ៉ាងធ្ងន់ធ្ងរពីអាជ្ញាធរ និងមហាជន អំពើបាបនេះអាចឲ្យអ្នកចុះនរក។

លោកបានបញ្ជាក់ថា «សូមបងប្អូនជឿជាក់លើវិទ្យាសាស្ត្រនិងវ៉ាក់សាំងគ្រប់ប្រភេទដែលរាជរដ្ឋាភិបាល បានខិតខំស្វែងរកមក ខ្ញុំនិងមិត្តភ័ក្ដិបានចាក់វ៉ាក់សាំងទាំងនោះរួចហើយនិងមិនឃើញមានផលប៉ះពាល់អ្វីដល់សុខភាពយើងខ្ញុំទេ!»

ទន្ទឹមនឹងនេះ សូមបងប្អូននៅតាមរោងចក្ររាយការណ៍ជូនរដ្ឋបាលរោងចក្រជាបន្ទាន់ ប្រសិនជាឃើញឬស្តាប់ឮអ្នកណាម្នាក់ឃោសនាបំផុសកុំឲ្យចាក់វ៉ាក់សាំងកូវីដនិងសូមថ្នាក់ដឹកនាំសហជីពទាំងអស់មេត្តាចូលរួមជាមួយរាជរដ្ឋាភិបាល ក្នុងការលើកទឹកចិត្តនិងបំផុសឲ្យបងប្អូនកម្មករចូលរួមចាក់វ៉ាក់សាំងការពារកូវីដ១៩ទាំងអស់គ្នា៕

អត្ថបទ ៖ សំអឿន