ស្នងការខេត្តមណ្ឌលគិរី៖ កម្លាំងនគរបាលឈរជើងតាមព្រំដែន ជាភ្នែកច្រមុះរបស់រាជរដ្ឋាភិបាល ដាច់ខាតមិនឱ្យបរទេសឈ្លានពានដីខ្មែរឡើយ

លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានអះអាងឱ្យដឹងថា កម្លាំងនគរបាលដែលឈរជើងការពារតាមខ្សែបន្ទាត់ព្រំដែន គឺជាភ្នែក ជាច្រមុះរបស់រាជរដ្ឋាភិបាលកម្ពុជា ដែលការពារថែរក្សាព្រំដែនដោយមិនអនុញ្ញាតឱ្យប្រទេសណាឈ្លានពានទឹកដីកម្ពុជាបានឡើយ។ លោកស្នងការនគរបាលខេត្តមណ្ឌលគិរី បានអះអាងបែបនេះនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគា​រស្នាក់នៅប៉ុស្តិ៍នគរបាលការពារព្រំដែនគោកក្បាលដំរី ដែលជាអំណោយរបស់អគ្គស្នងការនគ​របា​ល​ជាតិកាលពីថ្ងៃទី០៣ ខែមេសា ឆ្នាំ២០២៥។

លោកស្នងការ បានលើកឡើងថា ដោយមានការយកចិត្តទុកដាក់ខ្ពស់ នាយ​ឧត្តមសេនីយ៍ ស ថេត អគ្គស្នងការនគរបាលជាតិ បានចាត់ឱ្យថ្នាក់ដឹកនាំស្នងការដ្ឋាននគរបាលខេត្តមណ្ឌលគិរី ចុះសាក​សួរសុខទុក្ខកង​កម្លាំ​ង​ន​គរបាលការពារព្រំដែនទាំងអស់ មុនឱកាសបុណ្យចូលឆ្នាំថ្មីប្រពៃណីជាតិខ្មែរចូលមកដល់ឆាប់ៗខាងមុខនេះ និងបាននាំយកអំណោយចែកជូនដល់កង​កម្លាំងតាមបណ្តាប៉ុស្តិ៍ការពារព្រំដែនគោកទាំង៦ ដែលកំពុងឈរជើងបំពេញការងារតាមខ្សែបន្ទាត់ព្រំដែនចាប់ពីស្រុកពេជ្រាដា រហូតដល់ស្រុកកោះញែក ទល់ជាមួយខេត្តរតនគិរី។

ជាមួយគ្នានេះ ដើម្បីបង្កើនប្រសិទ្ធភាពការងារ និងកិច្ចការការពារដែនបូរ​ណ​ភាពទឹកដី ជាពិសេស បញ្ហាជីវភាពរស់នៅរបស់កងកម្លាំងឈ​រជើងប្រ​ចាំការនៅតាមខ្សែបន្ទាត់ព្រំដែនកម្ពុជា-វៀតណាម ក្នុងភូមិសាស្ត្រស្រុក​ពេជ្រាដា និងស្រុកកោះញែក អគារស្នាក់នៅ និងធ្វើការ ត្រូវបានសាងសង់ និងដាក់​ឱ្យប្រើប្រាស់មានចំនួន៤ប៉ុស្តិ៍រាប់ទាំងអគារសម្ពោធពេលនេះ ចំណែកប៉ុស្តិ៍ការពារព្រំដែនម្រើច និងប៉ុស្តិ៍អូររ៉ូ កំពុងសាងសង់ជូនដល់កងកម្លាំងជាបន្តទៀត។

ក្នុងឱកាសនោះ លោកស្នងការខេត្តមណ្ឌលគិរី បានគូសបញ្ជាក់ប្រាប់កងកម្លាំងថា៖ «កម្លាំងនគរបាលដែលឈរជើងតាមខ្សែបន្ទាត់ព្រំដែន គឺជាភ្នែកច្រមុះរបស់រាជរដ្ឋាភិបាល ត្រូវតែភាពស្វាហាប់ ស្មារតីរឹងមាំ ក្នុងការបំពេញតួនាទីភារកិច្ចរបស់ខ្លួន ដាច់ខាតមិនអនុញ្ញាតឱ្យបរទេសណាឈ្លានពានដែនបូរណភាពទឹកដីខ្មែរ១មីលីម៉ែត្រឡើយ»។

សូមបញ្ជាក់ថា អគារស្នាក់នៅ​ដែលជាអំណោយដ៏ថ្លៃថ្លារបស់នាយឧត្តម​សេ​នីយ៍ ស ថេត អគ្គ​ស្នងការនគរបាលជាតិ និងលោកជំទាវ​ ជូនដល់ប៉ុស្តិ៍នគរបាលការពារព្រំដែនគោកក្បាលដំរីនៃវរសេនាតូចនគរបាលការពារព្រំដែនគោកលេខ​៣០៣​ ​មានអគារស្នាក់នៅមានទំហំ ៧,៥០ x ២១,១៤ ម៉ែត្រ អគារផ្ទះបាយទំហំ ៨,២០ x ១០,២៥ ម៉ែត្រ និងបន្ទប់ទឹកទំហំ ៤x៤,២៥ម៉ែត្រ។​

ជាមួយនឹងការសម្ពោធអគារថ្មីនេះ លោកស្នងការនគរ​បាលខេត្ត​មណ្ឌលគិរី ក៏បាននាំយកអំណោយជាថវិកា គ្រឿងឧប​ភោគបរិភោគ ជូនដល់ប៉ុស្តិ៍នគ​របាលព្រំដែ​នគោកទាំង៦ដែលកំពុងបំពេញបេសកម្មរបស់ខ្លួន រួមមាន ភេជ្ជៈចំនួន ៦០កេស​ ក្នុងមួយប៉ុស្តិ៍​ទទួល​បាន​១០កេស។​ ត្រីខចំនួន៦កេសធំ​ ក្នុងមួយប៉ុស្តិ៍​ទទួលបាន​១កេស មីចំនួន៦កេសធំ​ ក្នុងមួយប៉ុស្តិ៍​ទទួលបាន​១កេស ឃីតចំនួន៤០កញ្ចប់ អង្ករចំនួន៩០០គីឡូក្រាម​ ក្នុងមួ​យប៉ុស្តិ៍​ទទួលបាន​១៥០គីឡូក្រាម និងថវិកាចំនួន៣លានរៀល ក្នុងមួយប៉ុស្តិ៍​ៗទទួលបាន​៥០ម៉ឺនរៀល។ លោកស្នងការនគរបាលខេត្ត ក៏បានថ្លែងអំណរអរគុណយ៉ាងជ្រាល​ជ្រៅដល់កងកម្លាំងនគរបាលការពារព្រំដែន ឱ្យមាន​សុខ​ភាពល្អ​ និងទទួ​ល​បានជ័យជម្នះគ្រប់ភារកិច្ចក្នុងបុព្វហេតុការពារជាតិមាតុភូមិកម្ពុជា៕

អត្ថបទ៖ រៀម សុខហេង