ក្នុងស្ថានភាពតានតឹងផ្នែកពាណិជ្ជកម្ម ជប៉ុនប្រកាសប្រកៀកស្មាជាមួយកម្ពុជា ដើម្បីពង្រឹងទំនាក់ទំនងប្រទេសទាំងពីរ

ស្ថិតនៅក្នុងស្ថានការណ៍ដែលពិភពលោកកំពុងជួបភាពតានតឹងផ្នែកពាណិជ្ជកម្ម ជប៉ុនបានប្រកាសប្រកៀកស្មាជាមួយកម្ពុជា ដើម្បីពង្រឹងទំនាក់ទំនងប្រទេសទាំងពីរឱ្យបានតែរឹងមាំបន្ថែមទៀត ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន។

ការប្រកាសនេះ បានធ្វើឡើងតាមរយៈឯកអគ្គរាជទូតជប៉ុនប្រចាំកម្ពុជា លោក អ៊ូអិណុ អាត់ស៊ូស៊ី ក្នុងជំនួបទទួលទានអាហារជាមួយលោកបណ្ឌិត ធន់ វឌ្ឍនា អនុប្រធានទី២ព្រឹទ្ធសភានៃកម្ពុជា នាល្ងាចថ្ងៃទី៧ ខែមេសា ឆ្នាំ២០២៥ នៅវិមានព្រឹទ្ធសភា រាជធានីភ្នំពេញ។ ជំនួបរវាងភាគីទាំងពីរ គឺបានជជែកគ្នាពីការពង្រឹងមិត្តភាពកម្ពុជា-ជប៉ុន។

លោកបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមមិត្តភាពព្រឹទ្ធសភាកម្ពុជា-ជប៉ុន បានគូសរំលឹកអំពីទំនាក់ទំនងការទូតរវាងប្រទេសទាំងពីរ ដែលមានឡើងតាំងពីឆ្នាំ១៩៥៣ និងបានវាយតម្លៃខ្ពស់ចំពោះទំនាក់ទំនងកម្ពុជា-ជប៉ុន ដែលបានពង្រឹងពង្រីកឥតឈប់ឈរ តាមរយៈការផ្លាស់ប្តូរទស្សនកិច្ចរវាងថ្នាក់ដឹកនាំកំពូលនៃប្រទេសទាំងពីរ និងជាពិសេសតាមរយៈកំណើនពាណិជ្ជកម្មនៃប្រទេសទាំងពីរ។

លោកអនុប្រធានព្រឹទ្ធសភា និងលោកឯកអគ្គរាជទូតជប៉ុន ក៏បានពិភាក្សាគ្នាពីស្ថានភាពពិភពលោក ជាពិសេសសង្រ្គាមពាណិជ្ជកម្ម ដែលកំពុងតែតឹងតែងក្នុងពេលបច្ចុប្បន្ន។ ជុំវិញបញ្ហាពាណិជ្ជកម្មនេះ លោកបណ្ឌិត ធន់ វឌ្ឍនា បានបញ្ជាក់ពីភាពចាំបាច់នៃការពង្រឹងបន្ថែមទៀតនូវភាពជាដៃគូរវាងកម្ពុជា-ជប៉ុន។

លោកអនុប្រធានព្រឹទ្ធសភា បានលើកឡើងទៅកាន់លោកឯកអគ្គរាជទូតជប៉ុន ដូច្នេះថា «នៅក្នុងស្ថានភាព ដែលពិភពលោកកំពុងតែជួបការធ្លាក់ចុះនៃពហុភាគីនិយម និងភាពមិនច្បាស់លាស់នៃភូមិសាស្រ្តនយោបាយ កម្ពុជា និងជប៉ុន ចាំបាច់ត្រូវតែពង្រឹងទំនាក់ទំនង និងមិត្តភាព ឱ្យកាន់តែខ្លាំងឡើងជាងពេលណាៗទាំងអស់»។ នេះជាសម្រង់សម្ដីដែលបានចុះផ្សាយលើទំព័រហ្វេសប៊ុកផ្លូវការរបស់ព្រឹទ្ធសភាកម្ពុជា។

ឯកភាពនឹងការលើកឡើងរបស់មន្ត្រីជាន់ខ្ពស់កម្ពុជា លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានសម្តែងការគាំទ្រ ដោយបញ្ជាក់ពីជំហររបស់ជប៉ុន ដែលនឹងឈរជាប់ជាមួយកម្ពុជា ដើម្បីវិបុលភាពរបស់ប្រទេសទាំងពីរផង និងតំបន់ផង។

ជាការកត់សម្គាល់ ស្ថិតក្នុងបរិការណ៍ ដែលប្រធានាធិបតី​អាមេរិក លោក ដូណាល់ ត្រាំ បានប្រកាសដាក់​ពន្ធគយ​លើ​ទំនិញ​នាំ​ចូល​ពីប្រទេសនានា រាប់ទាំង​កម្ពុជា ដែលមាន​កម្រិត​ខ្ពស់​បំផុតនោះ លោកអនុប្រធានទី២ព្រឹទ្ធសភា ក៏បានបង្ហាញក្ដីរំពឹងថា ប្រធានាធិបតី ត្រាំ នឹងបន្ធូរពន្ធសម្រាប់កម្ពុជា និងប្រទេសជាច្រើនទៀត តាមរយៈការចចារគ្នា៕