អ្នកនាំពាក្យព្រមានអង្គការបរិស្ថានមួយដែលថាបានបំពានសមត្ថកិច្ចក្រសួង

អ្នកនាំពាក្យក្រសួងបរិស្ថានលោក ខ្វៃ អាទិត្យា បានព្រមាន​ដល់អង្គការថែរក្សាបរិស្ថាន និងកសិកម្ម ដែលតែងតែផ្ដល់បណ្ណមេត្រីបរិស្ថានជូនអ្នកធ្វើការងារ​ទាក់ទងនឹងបរិស្ថាន។ លោក ខ្វៃ អាទិត្យា បញ្ជាក់ថាមានតែក្រសួងបរិស្ថានមួយបណ្ណោះដែលមានសិទ្ធិផ្ដល់​បណ្ណសរសើរនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិកម្មរបស់អ្នកនាំពាក្យក្រសួងបរិស្ថាននេះគឺបន្ទាប់ពីអង្គការថែរក្សាបរិស្ថាន និងកសិកម្មបាន​ផ្ដល់បណ្ណសរសើមេត្រីភាពបរិស្ថានជាបន្តបន្ទាប់ដល់ក្រុមហ៊ុន និងមនុស្សមួយចំនួនកាលពីកន្លងទៅ។

លោក ខ្វៃ អាទិត្យា នៅថ្ងៃទី១០ ខែមេសា ឆ្នាំ២០២៥នេះបានព្រមានថាក្រសួងនឹងចាត់វិធានការច្បាប់ប្រសិនជាអង្គការខាងលើនៅតែមិនបញ្ឈប់សកម្មភាពរបស់ខ្លួន។ លោកបានសំណូមពរដល់ម្ចាស់ក្រុមហ៊ុន សហគ្រាស ដែលបានប្រតិបត្តិល្អ ចំពោះបរិស្ថាន និងធនធនធម្មជាតិ និងបានគោរពតាមច្បាប់នៃព្រះរាជាណាចក្រកម្ពុជា សូមមេត្តាពិនិត្យឱ្យបានច្បាស់អំពីសមត្ថកិច្ច និងការទទួលខុសត្រូវ ចៀសវាងការចាញ់បោក ក្រុមឬអង្គការណាមួយនោះ ដែលឆ្លៀតឱកាស យកបញ្ហាបរិស្ថាន ដើម្បីកេងប្រវ័ញ្ញ និងលាភសក្ការៈ ព្រមទាំងបានប្រព្រឹត្តអំពើល្មើសច្បាប់ថែមទៀត។

កាលពីថ្ងៃទី១០ ខែមីនា ឆ្នាំ២០២៥ ក្រសួងបរិស្ថានក៏បានចេញសេចក្ដីជូនដំណឹងមួយផងដែរដល់អង្គការថែរក្សាបរិស្ថាន និងកសិកម្ម ឱ្យបញ្ឈប់សកម្មភាពរបស់ខ្លួន​ក្នុងការផ្ដល់បណ្ណសរសើរមេត្រីភាពបរិស្ថានជៀសវាងធ្វើឱ្យមានការភ័ន្តច្រលំដល់សាធារណជនពីស្ដង់ដារ និងការវាយតម្លៃគុណសម្បត្តិដែលក្រសួងកំពុងដំណើរការអនុវត្ត។

បុគ្គលិកផ្នែករដ្ឋបាលនៃអង្គការថែរក្សាបរិស្ថាន និងកសិកម្ម លោក ជា សក្ខរា បានប្រាប់កម្ពុជាថ្មីថាអង្គការលោកបានទទួលលិខិតពីក្រសួងនិងបានបញ្ជូនទៅឱ្យប្រធានអង្គការរួចហើយ។ លោកបញ្ជាក់ថាអង្គការលោកមិនបានចែកបណ្ណសរសើរមេត្រីភាពបរិស្ថានទៀតនោះទេតាំងពីខែមីនាមក។

លោកថា៖ «យើងបានធ្វើលិខិតសរសើរតាំងពីខែ៣មកហើយមកដល់ឥឡូវយើងអត់មានធ្វើអីថ្មីទេ ហើយក៏ទើបតែទទួលលិខិតពីក្រសួងបរិស្ថានពីសប្ដាហ៍មុន អ៊ីចឹងខ្ញុំបានដាក់ជូនថ្នាក់លើគាត់មើលហើយ»។

មាត្រា ៧៤៨  នៃក្រមបរិស្ថាន និងធនធានធម្មជាតិ បានចែងថា «សមត្ថកិច្ចផ្តល់ការទទួលស្គាល់ និងលើកទឹកចិត្ត» ការទទួលស្គាល់ និងការលើកទឹកចិត្តដល់បុគ្គល ដែលបានចូល រួមប្រតិបត្តិសកម្មភាពមេត្រីបរិស្ថាន និងប្រើប្រាស់បច្ចេកវិទ្យាទ្រទ្រង់បរិស្ថាន ត្រូវកំណត់ដោយលិខិតបទដ្ឋានគតិយុត្ត ដែលរៀបចំដោយ ក្រសួងទទួលបន្ទុកវិស័យបរិស្ថាន និងធនធានធម្មជាតិ»។ ជាមួយគ្នានេះ អនុលោមតាមក្រមព្រហ្មទណ្ឌ (មាត្រា៦២៨ និងមាត្រា៦២៩) ដែលបានចែង អ្នកក្លែងឯកសារ និងអ្នកប្រើប្រាស់ឯកសារក្លែងបន្លំ គឺមានទោសដូចគ្នា៕

អត្ថបទដោយ ហ៊ុន សិរីវឌ្ឍន៍