រដ្ឋបាលរាជធានី ទទួលអំណរសាទរទេវតាឆ្នាំថ្មីនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ

រដ្ឋបាលរាជធានីភ្នំពេញ និងក្រុមប្រឹក្សារាជធានីភ្នំពេញ អាជ្ញាធរដែនដី ក្រោមឱវាទបានរៀបចំពិធីទទួលអំណរសាទរទេវតាឆ្នាំថ្មីឆ្នាំម្សាញ់ សប្តស័ក ព.ស ២៥៦៩ គ.ស ២០២៥ នៅរមណីយដ្ឋានវប្បធម៌ប្រវត្តិសាស្ត្រ វត្តភ្នំដែលជានិមិត្តរូបនៃការកកើតរាជធានីភ្នំពេញ។

ពិធីនេះប្រព្រឹត្តទៅក្រោមអធិបតីភាពលោក ហួត ហៃ អភិបាលរងរាជធានីភ្នំពេញ និងលោកស្រីតំណាងឱ្យលោក
ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រី និងលោក កែ ប៊ុនឡេង តំណាងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ។

ពិធីនេះធ្វើឡើងទៅតាមប្រពៃណីទំនៀមទម្លាប់ជាតិដែលប្រជាពលរដ្ឋគ្រប់លំនៅដ្ឋាន អង្គភាព ស្ថាបន័ សាលារៀន ក្រុមហ៊ុនទាំងរដ្ឋ និងឯកជនសុទ្ធតែបានរៀបចំគ្រឿងសក្ការៈបូជា ផ្លែឈើ ផ្កាភ្ញី គ្រឿងក្រអូបសំរាប់ទទួលទេវតាឆ្នាំថ្មី ព្រះនាម គោរាគៈទេវី ជាបុត្រីទី២ នៃកបិលមហាព្រហ្មដែលចុះមកឃុំគ្រងដែនជម្ពូរទ្វីបជំនួសទេវតាឆ្នាំចាស់ទៅតាមប្រពៃណីទំនៀមទម្លាប់ខ្មែរ។

បុណ្យចូលឆ្នាំថ្មី បានរំលឹកឱ្យយើងម្នាក់ៗដឹងថា អាយុកាលនៃការរស់នៅកាន់តែវិវត្តន៍ទៅមុខឥតឈប់ឈរ និងកាន់តែឆាប់រហ័ស ដូច្នេះតម្រូវអោយបុគ្គលគ្រប់រូបព្យាយាមប្រព្រឹត្តតែអំពើល្អ អំពើជាកុសល សំរាប់ខ្លូនឯង សំរាប់គ្រួសារនិងសម្រាប់សង្គមជាតិ។ ទេវតាឆ្នាំថ្មីបានចុះមកគ្រប់គ្រងផែនដីជំនួសទេវតាឆ្នាំចាស់ គឺឆ្នាំម្សាញ់ សង្គ្រាន្តចូលនៅថ្ងៃចន្ទ័ ២រោច ខែចេត្រ ត្រូវនឹងថ្ងៃទី១៤មេសា ឆ្នាំ២០២៥ វេលាម៉ោង៤និង៤៨នាទីទៀបភ្លឺ។ រដ្ឋបាលរាជធានីភ្នំពេញបានរៀបចំតុបតែងលំអរសោភណ្ឌភាពយ៉ាងស្រស់ឆើតឆាយសក្ត័សមជាបេះដូងនៃព្រះរាជាណាចក្រកម្ពុជាតាមរយៈការលំអរភ្លើងចម្រុះ ការដាក់តាំងលំអររូបពស់វែកជានិមិត្តរូបឆ្នាំម្សាញ់ដ៏ធំ រូបម្កុដ រូបពិណ្យបុរាណខ្មែរ ព្រះរាជរតន៍ មានការដាក់តាំងរូបសត្វតំណាងឆ្នាំទាំង១២, កន្លែងប្រគុំតន្ត្រី កន្លែងលេងល្បែងរបាំប្រជាប្រិយ៍ដែលរៀបចំឡើងដោយមន្ទីរវប្បធម៌ និងវិចិត្រសិល្បៈរាជធានីភ្នំពេញសម្រាប់សង្គ្រាន្ត វត្តភ្នំឱ្យមានភាពអធិកអធមជាងបណ្តាឆ្នាំមុនៗ។

អ្វីដែលពិសេសជាងនេះទៀត រដ្ឋបាលរាជធានីភ្នំពេញបានបង្កើតឱ្យមានផ្លូវថ្មើរជើងតាមតេរៈវិថីព្រៈស៊ីសុវត្ថិ មុខព្រះបរមរាជវាំងដែលតភ្ជាប់លំហូរប្រជាពលរដ្ឋពីសង្គ្រាន្តវត្តភ្នំទៅកាន់ផ្លូវថ្មើរជើងដែលកំពុងពេញនិយមពីសំណាក់ភ្ញៀវទេសចរជាតិ អន្តរជាតិពីមួយសប្តាហ៍ទៅមួយសប្តាហ៍ដែលរដ្ឋបាលរាជធានីភ្នំពេញបើកឱ្យដំណើរការ២ថ្ងៃនាចុងសប្តាហ៍គឺថ្ងៃសៅរ៍ និងថ្ងៃអាទិត្យ។ ដោយឡែកសំរាប់ថ្ងៃបុណ្យចូលឆ្នាំរដ្ឋបាលរាជធានីភ្នំពេញ នឹងបើកឱ្យដំណើរការកំសាន្តសប្បាយ៣ថ្ងៃបន្ថែមទៀតនៅផ្លូវថ្មើរជើង។ ជាមួយគ្នានេះ រដ្ឋបាលរាជធានីភ្នំពេញបានចេញសេចក្តីណែនាំជាបន្តបន្ទាប់ស្តីពីការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងរាជធានីភ្នំពេញនាឧិកាសបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័ក ព.ស២៥៦៩ គ.ស២០២៥ ក្នុងន័យលើកកម្ពស់សន្តិសុខ សណ្តាប់ធ្នាប់ក្នុងទី ក្រុង និងបានអំពាវនាវដល់បងប្អូនប្រជាពលរដ្ឋត្រូវលើកកម្ពស់ការយកចិត្តទុកដាក់ការពារគ្រោះអគ្គិភ័យដែលអាចកើតមានជាយថាហេតុដោយសារការធ្វេសប្រហែស។ ត្រូវចូលរួមគោរពច្បាប់ចរាចរណ៍ផ្លូវគោក និងមិនត្រូវបើកបរក្នុង ស្ថានភាពស្រវឹងដើម្បីជៀសវាងគ្រោះថ្នាក់ផ្សេងៗ៕

អត្ថបទ៖ ស្រីរ័ត្ន