មនុស្សជាង២០ម៉ឺននាក់ដើរលេងកម្សាន្តនៅខេត្តស្វាយរៀងនៅថ្ងៃទី២ នៃពិធីបុណ្យចូលឆ្នាំ

មនុស្ស​ជាង២០ម៉ឺននាក់បានទៅដើរលេងកម្សាន្តនៅក្នុងខេត្តស្វាយរៀងនាថ្ងៃទី១៥ ខែមេសា ឆ្នាំ២០២៥ ចំថ្ងៃទី២ នៃពិធីបុណ្យចូលឆ្នាំខ្មែរ​។

តាមសេចក្ដីរាយការណ៍ភ្នាក់ងារកម្ពុជាថ្មីនៅខេត្តស្វាយរៀងបានឱ្យដឹងថា ថ្ងៃទី២នៃ ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់នាថ្ងៃទី១៥ ខែមេសា ឆ្នាំ២០២៥ ភ្ញៀវទេសចរណ៍និងបងប្អូនប្រជាពលរដ្ឋមកលេងកម្សាន្តនៅតាមគោលដៅទេសចរណ៍សំខាន់ៗ និងកម្មវិធីសង្ក្រាន្តនានាក្នុងខេត្តស្វាយរៀង មានចំនួនសរុប ២៣៧ ២៥២ ក្នុងនោះភ្ញៀវទេសចរបរទេសចំនួន ១ ៧៣៥នាក់។

រាល់​ឆ្នាំជនជាតិ​ខ្មែរ​និយម​រៀបចំ​ពិធីបុណ្យ​ចូល​ឆ្នាំ​ថ្មី​ប្រពៃណី​ជាតិ​នៅ​ថ្ងៃ​ទី ១៣ ខែ​មេសា​ (យូរ​ៗម្ដង ថ្ងៃ​ទី ១៤ ខែ មេសា) ត្រូវ​​នឹង​ខែចេត្រ នៃ​ចន្ទគតិ។ ឆ្នាំ២០២៥នេះពិធីបុណ្យចូលឆ្នាំខ្មែរប្រារព្ធទៅនៅថ្ងៃទី១៤ ១៥ និង១៦ខែមេសា។ ពិធី បុណ្យចូលឆ្នាំថ្មីមានអត្ថន័យ​ជ្រាលជ្រៅក្នុងដួចចិត្តខ្មែរដោយ​មានជំនឿថា ក្នុងមួយឆ្នាំនៃការរស់នៅ គេតែងជួបប្រទះអពមង្គល​ ឧបទ្រព្យ​ចង្រៃផ្សេងៗ​ ជូនកាលមានទុក្ខសោក ជួនកាលមានគ្រោះអាសន្ន ជួនកាលមានជំងឺរូបរឹតរាងកាយ ជូនកាលទៀត បាន​ប្រព្រឹត្ដ​អំពើ​សៅហ្មង មិនគប្បី។​ លុះផុតឆ្នាំចាស់ទៅ គេនាំគ្នាធ្វើបុណ្យ គេស្លៀកពាក់ថ្មីៗ គេនាំគ្នាដើរលេងកំសាន្ដ ដើម្បីឲ្យ​អស់​កង្វល់ ហើយ​ឲ្យ​មាន​សិរី​សួស្ដី មានសិរី​សូស្ដីមានសុភមង្គលនៅក្នុងឆ្នាំថ្មីនេះ៕

រាយការណ៍បន្ថែមដោយ៖ ភក្ដី