ចាប់ពីពេលនេះទៅព្រះសង្ឃអាចស្នើសុំធ្វើអត្តសញ្ញាណបណ្ណបានហើយ

អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ បាន​សម្រេចផ្ដល់អត្តសញ្ញាណបណ្ណសញ្ញាតិខ្មែរជូនបុគ្គលមានសញ្ជាតិខ្មែរគ្រប់រូប​ដែលមានអាយុចាប់ពី១៥ឆ្នាំឡើង រាប់ទាំងព្រះសង្ឃ បុព្វជិតសាសនា ជនជាប់ឃុំ ឬជនវិបល្លាសស្មារតី។

ក្នុងសេចក្ដីជូនដំណឹងចុះថ្ងៃទី​២៤ ខែមេសា ឆ្នាំ២០២៥នេះ អគ្គនាយកដ្ឋានអត្ដសញ្ញាណកម្មបានបញ្ជាក់ថាការសម្រេចនេះដើម្បីលើកកម្ពស់ការផ្ដល់សេវាសាធារណៈឱ្យកាន់តែប្រសើរជូនប្រជាពលរដ្ឋ ដោយបន្ថែមនូវចំណុចសំខាន់ៗចំនួន៣គឺនឹងរៀបចំធ្វើអត្តសញ្ញាណបណ្ណដែលមានទម្រង់ជាសន្លឹកប្លាស្ទិក និង/ឬជាទម្រង់អេឡិចត្រូនិក ផ្ដល់អត្តសញ្ញាណបណ្ណដល់ពលរដ្ឋខ្មែរគ្រប់រូប​រាប់ទាំងព្រះសង្ឃ បព្វជិតសាសនា ជនជាប់ឃុំ ឬជនវិបល្លាសស្មារតី ។ល។ បន្ថែមលើនោះអ្នកដែលមានអាយុចាប់ពី៦០ឆ្នាំឡើងនឹងត្រូវផ្ដល់អត្តសញ្ញាណបណ្ណអចិន្ត្រៃយ៍ជូនផងដែរ។

តាមរយៈសេចក្ដីជូនដំណឹងនេះក៏បានឱ្យដឹងផងដែរថា ប្រជាពលរដ្ឋខ្មែរទាំងអស់ដែលកាន់អត្តសញ្ញាណបណ្ណ​អស់សុពលភាព ឬសុពលភាពតិចជាង១៨០ថ្ងៃ សូមរួសរាន់ដាក់ពាក្យស្នើសុំអត្តសញ្ញាបណ្ណថ្មីបាន។

អត្តសញ្ញាណបណ្ណសញ្ញាតិខ្មែរមានសារៈសំខាន់ជាច្រើនដែលបញ្ជាក់ពីអត្តសញ្ញាណរបស់ពលរដ្ឋនិងអាចប្រើប្រាស់ក្នុងគោលបំណងផ្សេងៗដូចជា ការចុះឈ្មោះចូលរៀន ការបំពេញបែបបទចូលបម្រើការងារ ការ​ចុះបញ្ជីអចលវត្ថុ ការចុះបញ្ជីយានយន្ត ការបើកគណនីធនាគារ ការចុះបញ្ជីពាណិជ្ជកម្ម ការចុះកិច្ចសន្យា ឬការប្រើប្រាស់សេវារដ្ឋបាលផ្សេងទៀត៕

អត្ថបទដោយ ហ៊ុន សិរីវឌ្ឍន៍