ព័ត៌មានជាតិ

ស្នងការរាជធានីច្រានចោលព័ត៌មានថា សមត្ថកិច្ចផាកពិន័យអ្នកបើកបរម៉ូតូមិនពាក់ម៉ាស់ចំនួន២០ម៉ឺនរៀល

បានផុស

៥ years មុន

នៅ

ថ្ងៃសុក្រ ២៦ មីនា ២០២១

ដោយ

ស្នងការដ្ឋាននគរបាលរាជធានីភ្នំពេញ សូមធ្វើការបដិសេធទាំងស្រុងចំពោះវីដេអូរបស់បុរស់ម្នាក់មិនស្គាល់អត្តសញ្ញាណ ដែលបានចែកចាយជាបន្តបន្ទាប់លើបណ្តាញសង្គមហ្វេសប៊ុក ដោយបាននិយាយថា សមត្ថកិច្ចបានធ្វើការផាកពិន័យប្រជាពលរដ្ឋបើកបរម៉ូតូតាមផ្លូវដែលមិនពាក់ម៉ាស់ចំនួន ២០ម៉ឺនរៀល នេះគឺជាការចុះផ្សាយខុសពីការពិតទាំងស្រុង ដែលអាចធ្វើឲ្យប្រជាពលរដ្ឋមានការយល់ច្រឡំ។

ក្រុមការងារព័ត៌មាន និងប្រតិកម្មរហ័ស នៃស្នងការនគរបាលរាជធានីភ្នំពេញបានបញ្ជាក់ថា កាលពីវេលាម៉ោង០៩និង៣០នាទីព្រឹក ថ្ងៃទី២៤ ខែមីនា ឆ្នាំ២០២១ នៅចំណុចមុខផ្សារអូឬស្សី សមត្ថកិច្ចចរាចរណ៍នៃអធិការដ្ឋាននគរបាលខណ្ឌ៧មករា បានធ្វើការផាកពិន័យបុរសម្នាក់ដែលបើកបរម៉ូតូដោយមិនមានពាក់មួកសុវត្ថិភាព គឺមិនមានការផាកពិន័យ ដោយមិនពាក់ម៉ាស់ឡើយ។

សមត្ថកិច្ចគ្រាន់តែធ្វើការណែនាំ អប់រំគាត់ឲ្យបានយល់ និងអនុវត្តតាមការណែនាំរបស់ក្រសួងសុខាភិបាលតែប៉ុណ្ណោះ ដោយបានប្រាប់ប្រជាពលរដ្ឋទូទៅដែលធ្វើដំណើរតាមដងផ្លូវត្រូវតែពាក់ម៉ាស់ជាប្រចាំ ដើម្បីចូលរួមបង្ការ និងទប់ស្កាត់ការឆ្លងរាលដាលវីរុសកូវីដ-១៩ ។

ពាក់ករណីនេះ សមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ កំពុងស្រាវជ្រាវ និងស្វែងរកម្ចាស់វីដេអូនេះ ដើម្បីចូលខ្លួនមកបំភ្លឺពីការផ្សាយខុសពីការពិតនេះ៕