ក្រសួងសង្គមកិច្ច គ្រោងបើកវគ្គបណ្ដុះបណ្ដាលជំនាញម៉ាស្សា និងស្ប៉ាកម្រិតអាស៊ាន ដល់ជនមានពិការភាពភ្នែក

ក្រសួងសង្គមកិច្ច អតីតយុទ្ធជន និងយុវនីតិសម្បទា សហការជាមួយក្រសួងទេសចរណ៍ គ្រោងនឹងបើកវគ្គបណ្ដុះបណ្ដាលវិក្រឹត្យការដល់ជនមានពិការភាពភ្នែក លើជំនាញម៉ាស្សា និងស្ប៉ា កម្រិតអាស៊ាន ដើម្បីបំប៉នសមត្ថភាពបន្ថែមដល់ជនមានពិការភាពភ្នែកប្រកបមុខរបរផ្នែកម៉ាស្សា នៅសមាគមសំនៀងជនពិការឱ្យពួកគាត់មានជំនាញច្បាស់លាស់ស្របតាមស្ដង់ដា និងឱកាសទទួលបានការងារនៅតាមបណ្ដាលប្រទេសក្នុងតំបន់អាស៊ាន។

នេះបើតាមការបញ្ជាក់របស់ លោក ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងឱកាសជួបសំណេះសំណាលជាមួយជនមានពិការភាពភ្នែក ប្រកបមុខរបរផ្នែកម៉ាស្សាដៃទេព នៅមន្ទីរសង្គមកិច្ចខេត្តសៀមរាប នាថ្ងៃទី២៩ ខែមេសា ដោយមានការចូលរួមពី លោកស្រី ញ៉ែម មរកត រដ្ឋលេខាធិការក្រសួងកិច្ចការនារី និងថ្នាក់ដឹកនាំជាច្រើនរូបទៀត។

លោក ចាប តូ មានប្រសាសន៍ថា ដើម្បីជំរុញការយកចិត្តទុកដាក់ចំពោះបងប្អូនជាជនមានពិការភាព រាជរដ្ឋាភិបាលកម្ពុជា បានរៀបចំ និងបង្កើតគោលនយោបាយ យន្តការច្បាប់នានាជាច្រើន ដើម្បីជួយសម្រួលដល់ជីវភាពជនមានពិការភាព ដូចជាផ្ដល់បណ្ណមូលនិធិសមធម៌សុខាភិបាល កម្មវិធីអត្តសញ្ញាណកម្មគ្រួសារក្រីក្រ ការស្នើសុំសេវាសុខាភិបាលដោយឥតគិតថ្លៃ ការបង្កើតបេឡាជាតិអតីតយុទ្ធជន ជាពិសេសផ្ដល់នូវកម្មវិធីនានាពាក់ព័ន្ធជំនាញវិជ្ជាជីវៈ ដើម្បីឱ្យពួកគាត់មានការងារ មុខរបរ ជួយដល់ជីវភាពរស់នៅប្រចាំថ្ងៃរបស់ពួកគាត់។

សូមជម្រាបថា ក្នុងឱកាសនោះ លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានផ្ដល់អំណោយដល់ជនមានពិការភាពភ្នែកប្រកបមុខរបរផ្នែកម៉ាស្សាដៃទេព ចំនួន ២២នាក់ ដោយក្នុងម្នាក់ទទួលបាន អង្ករ ១០គីឡូ  ត្រីខ ១យួរ ទឹកស៊ីអ៊ីវ ១យួរ មី ១កេស សារុង១ ឈើច្រត់១ និងថវិកា ៥០ ០០០រៀល។

បើតាមលោក គង់ សំអឿន ប្រធានមន្ទីរសង្គម កិច្ចអតីតយុទ្ធជន និងយុវនីតិសម្បទាខេត្តសៀមរាប បានឱ្យដឹងថា ជនពិការភាពផ្នែកកាយសម្បទា ពិការញ្ញាណដឹង ពិការសតិបញ្ញា ពិការផ្លូវចិត្ត និងពិការផ្សេងៗទៀត នៅទូទាំងខេត្តសៀមរាប មានចំនួន ១៨ ៩៣៨នាក់ ក្នុងនោះជនមានពិការភាពចំនួន ២ ៦៥១នាក់ ទទួលបានប្រាក់ឧបត្ថម្ភពីកម្មវិធីជាតិជំនួយសង្គមផងដែរ៕

ដោយ៖ គឿន វេត