Barcelona ដាក់ផែនការយកខ្សែប្រយុទ្ធ​សញ្ជាតិ អាហ្សង់ទីន​ម្នាក់មក​ជំនួស Lewandowski

ក្លិបអ្នកមានបុណ្យ FC Barcelona ចាប់អារម្មណ៍ចង់បានខ្សែប្រយុទ្ធ Julian Alvarez របស់ Atletico Madrid មកជំនួស Robert Lewandowski។

Barcelona កំពុងរៀបចំគម្រោងយ៉ាងហ្មត់ចត់អំពីគម្រោងអនាគត ដោយស្វែងរកខ្សែប្រយុទ្ធថ្មី ដែលមានសក្តានុពលម្នាក់មកជំនួស Robert Lewandowski ក្នុងរយៈពេលវែង។

Lewandowski បានចាកចេញពី Bayern Munich មកចូលរួមជាមួយ Barcelona កាលពីរដូវក្តៅឆ្នាំ ២០២២។ ខ្សែប្រយុទ្ធសញ្ជាតិ ប៉ូឡូញ វ័យ ៣៦ ឆ្នាំរូបនេះ បានដើរតួជាខ្សែប្រយុទ្ធស្នូលដ៏សំខាន់របស់ក្រុមអ្នកមានបុណ្យក្នុងរយៈពេលជិត ៣ រដូវកាលមកនេះ ខណៈកិច្ចសន្យារបស់គាត់ នៅសល់តែ ១ រដូវកាលទៀតប៉ុណ្ណោះ ពោលគឺត្រឹមខែ មិថុនា ឆ្នាំ ២០២៦។

ដកស្រង់ប្រភពចេញពី beIN SPORTS បានឱ្យដឹងថា ក្រុមប្រឹក្សាភិបាលរបស់ Barcelona បានណែនាំទៅប្រធានក្លិបលោក Joan Laporta និងគ្រូបង្វឹកថ្មីលោក Hansi Flick ឱ្យតាមដានលើ Alverez ព្រោះពួកគេជឿជាក់ថា ខ្សែប្រយុទ្ធសញ្ជាតិ អាហ្សង់ទីន វ័យ ២៥ ឆ្នាំរូបនេះនឹងក្លាយជាអ្នកជំនួស Lewandowski ដ៏សក្តិសម​បំផុត​នា​ពេល​បច្ចុប្បន្ន។ រូប​គេ​នឹង​ក្លាយ​ជា​​ដៃ​គូ​ដ៏​មាន​សក្តានុពល​ជា​មួយ Lamine Yamal, Pedri និង Pau Cubarsi ជាដើម។ ថ្នាក់ដឹកនាំរបស់ Barcelona នឹងជម្រុញលើការផ្ទេរនេះនៅឆ្នាំ ២០២៦ ប្រសិនបើមានភាពអំណោយផល លើ កត្តាហិរញ្ញវត្ថុ។

សូមបញ្ជាក់ថា Alvarez ដែលជាម្ចាស់ជើងឯក World Cup ២០២២ ជាមួយអាហ្សង់ទីន គឺនៅសល់កិច្ចសន្យារយៈពេល ៥ ឆ្នាំទៀតជាមួយ At Madrid ពោល គឺដល់ខែ មិថុនា ឆ្នាំ ២០៣០៕

ប្រែសម្រួល៖ សេម កុសល
ប្រភព៖ beIN SPORTS