ព័ត៌មានជាតិ

ថៅកែ ឬ ម្ចាស់សហគ្រាស ត្រូវមានកាតព្វកិច្ចចុះបញ្ជីបុគ្គលិក កម្មករ និងបង់ភាគទានជាមួយ ប.ស.ស

បានផុស

២ ខែ មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា ថៅកែ ឬ ម្ចាស់សហគ្រាស គ្រឹះស្ថាន ត្រូវមានកាតព្វកិច្ចចុះបញ្ជីបុគ្គលិក ឬ កម្មករ-និយោជិតរបស់ខ្លួនជាមួយ ប.ស.ស និងបង់ភាគទានជូនពួកគាត់ទៅលើរបបសន្តិសុខសង្គមផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត បានពន្យល់ថា ក្នុងនោះ ថៅកែ ឬ ម្ចាស់សហគ្រាស គ្រឹះស្ថាន ត្រូវបង់ភាគទានជូនបុគ្គលិក និងកម្មករ-និយោជិតរបស់ខ្លួនទៅលើ ✅ ផ្នែកថែទាំសុខភាព ✅ ផ្នែកហានិភ័យការងារ និងផ្នែកប្រាក់សោធន បង់ ៤ ភាគរយ ក្នុងនោះមានការចូលរួមរវាងថៅកែ ឬម្ចាស់សហគ្រាស គ្រឹះស្ថាន ២ ភាគរយ និងសាមីខ្លួនផ្ទាល់ ២ ភាគរយ។

លោកបណ្ឌិត បានបន្តទៀតថា ✨សម្រាប់កម្មករ-និយោជិត បុគ្គលិក ឬ អ្នកបម្រើក្នុងផ្ទះ ដែលបានកំពុងបម្រើការឱ្យនិយោជក (ថៅកែ) ឬ ម្ចាស់រោងចក្រ សហគ្រាស គ្រឹះស្ថាន និងម្ចាស់ផ្ទះទាំងអស់ ដែលបានចុះបញ្ជិកាជាមួយ ប.ស.ស និងបានបង់ភាគទានប្រចាំខែមក ប.ស.ស ហើយបានស្នើសុំប័ណ្ណ ប.ស.ស រួចរាល់ នោះពួកគាត់នឹងមានសិទ្ធិប្រើប្រាស់សេវានៅមន្ទីរពេទ្យដៃគូ ប.ស.ស ដោយឥតគិតថ្លៃ ដែលជាការជួយកាត់បន្ថយចំណាយរបស់សាមីខ្លួន រួមទាំងទទួលបានអត្ថប្រយោជន៍ផ្សេងៗ ពី ប.ស.ស ផងដែរ។

លោកបណ្ឌិត បានអំពាវនាវដល់ថៅកែ ឬ ម្ចាស់សហគ្រាស គ្រឹះស្ថាន ទាំងអស់ ដែលមានបុគ្គលិក និងកម្មករ-និយោជិត ចាប់ពី ១ នាក់ ឡើងទៅ ចូលរួមបំពេញកាតព្វកិច្ចនេះ ដើម្បីគាំពារបុគ្គលិក និងកម្មករ-និយោជិតរបស់ខ្លួន។

លោកបណ្ឌិត ហេង សុផាន់ណារិទ្ធ បានបញ្ជាក់ថា គិតមកត្រឹមខែមេសា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ០៦០ ៣៩២ នាក់ ស្រី ១ ៦៨៦ ៨៨៧ នាក់ ក្នុងនោះ បុគ្គលដែលស្ថិតក្នុងវិស័យសាធារណៈចំនួន ៥០៨ ៦៦៩ នាក់ ស្រី ១៥០ ៩០៨ នាក់ បុគ្គលស្ថិតក្នុងវិស័យឯកជន ចំនួន ១ ៨៦៦ ១២២ នាក់ ស្រី ១ ១២៤ ៨០១ នាក់ បុគ្គលស្វ័យនិយោជន៍ចំនួន ៤៩៨ ៥៤៦ នាក់ ស្រី ៣០៣ ៤១៩ នាក់ និងអ្នកក្នុងបន្ទុក ១៨៧ ០៥៥ នាក់ ស្រី ១០៧ ៧៥៩ នាក់៕

អត្ថបទ ៖ សំអឿន