ចំណីអាហារ និងការរៀបចំនៅផ្លូវថ្មើរជើងកាន់តែសម្បូរបែបពីមួយសប្តាហ៍ទៅមួយសប្តាហ៍

ផ្លូវថ្មើរជើង(Walk Street) បើទោះបីនៅសប្តាហ៍នេះ មិនមានការបន្ថែមការសម្តែងសិល្បៈប្រពៃណីក៏ពិតមែន ប៉ុន្តែប្រជាពលរដ្ឋ និងភ្ញៀវជាតិ អន្តរជាតិនៅតែសម្រុកទៅដើរលែងកម្សាន្តយ៉ាងកុះករ ក្នុងទឹកមុខសប្បាយរីករាយជាមួយនឹងចំណីអាហារ ត្រូវបានរៀបចំកាន់តែសម្បូរបែបពីមួយសប្តាហ៍ទៅមួយសប្តាហ៍។

នារាត្រីថ្ងៃសៅរ៍ ទី១៧ឧសភា លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រី អមដំណើរដោយមន្ត្រីរដ្ឋបាលរាជធានីភ្នំពេញជាច្រើនរូបបានអញ្ជើញចុះត្រួតពិនិត្យ និងដើរលេងកម្សាន្តនៅលើផ្លូវថ្មើរជើង(Walk Street)នេះផងដែរ។ ការអញ្ជើញចុះត្រួតពិនិត្យ និងដើរលេងកម្សាន្តនៅលើផ្លូវថ្មើរជើង(Walk Street) ពីសំណាក់លោក ឃួង ស្រេង គឺដើម្បីជំរុញឱ្យអាជ្ញាធរមានសមត្ថកិច្ចទាំងអស់ រក្សាសន្តិសុខ សណ្តាប់ធ្នាប់នៅទីតាំងនេះឱ្យកាន់តែល្អប្រសើរ ជាមួយនឹងការរិះរកចំណុចបំពេញបន្ថែម បើទោះបីផ្លូវថ្មើរជើង(Walk Street) ទទួលការពេញនិយមពីប្រជាពលរដ្ឋ ភ្ញៀវជាតិ និងអន្តរជាតិហើយក្តី។

ពាក់ព័ន្ធនឹងផ្លូវថ្មើរជើង(Walk Street) នេះ បើតាមសំណេរក្នុងបណ្តាញហ្វេសបុករបស់លោក ឃួង ស្រេង បានសរសេរថា ចំណីអាហារ និងការរៀបចំនៅផ្លូវថ្មើរជើង(Walk Street) កាន់តែសម្បូរបែបពីមួយសប្តាហ៍ទៅមួយសប្តាហ៍។

គួរបញ្ជាក់ថា ផ្លូវថ្មើរជើង (Walk Street) ត្រូវបានរដ្ឋបាលរាជធានីភ្នំពេញដាក់ឱ្យដំណើរការសាកល្បង២ថ្ងៃ ក្នុង១​សប្ដាហ៍ គឺថ្ងៃសៅរ៍ និងថ្ងៃអាទិត្យ ចាប់ពីម៉ោង៦ល្ងាចដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង។ ក្រោយការបើកឱ្យដំណើរការផ្លូវថ្មើរជើង (Walk Street) ទទួលបានប្រជាប្រិយ៍ភាពយ៉ាងខ្លាំង រហូតទទួលបានការកោតសរសើរពីសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ នេះជាការខិតខំប្រឹងប្រែងអនុវត្តផ្ទាល់ពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ ដែលធ្វើឱ្យរាជធានីភ្នំពេញមួយនេះ ជាប់ចំណាក់ថ្នាក់លេខ២លើពិភពលោក ឈ្មោះថា ជា«ទីក្រុងប្រជុំដោយភាពរីករាយនៅពេលរាត្រី»៕

អត្ថបទ៖ ស្រីរ័ត្ន