ផ្លូវថ្មើរជើងជាប់របងវិទ្យាល័យសន្ធម៉ុកប្រែជាស្រឡះល្អ សិស្សានុសិស្សអាចដើរដោយមិនភ័យខ្លាច

បន្ទាប់ពីមានវិធានការក្ដៅពីសំណាក់អាជ្ញាធរខណ្ឌទួលគោកលើម្ចាស់រថយន្ដមួយចំនួនដែលតែងយករថយន្ដមកចតនៅលើផ្លូវថ្មើរជើងជាប់របងវិទ្យាល័យសន្ធម៉ុករួចមក គិតត្រឹមថ្ងៃទី១៣ ខែមិថុនា ឆ្នាំ២០២៥នេះ នៅលើផ្លូវថ្មើជើងជាប់របងវិទ្យាល័យសន្ធម៉ុក ពុំមានការចតរថយន្តដូចមុនទៀតឡើយ សិស្សានុសិស្សអាចដើរលើផ្លូវថ្មើរជើងបានដោយសេរី និងសុវត្ថិភាព។ តាមការសង្កេត ផ្លូវថ្នើរជើងជាប់របងវិទ្យាល័យសន្ធម៉ុក នៅព្រឹកថ្ងៃទី១៣មិថុនា មានសភាពស្រឡះល្អ សិស្សានុសិស្សអាចដើរចេញ ចូលសាលាបានដោយសេរី និងសុវត្ថិភាព។

គួររំលឹកថា កាលពីថ្ងៃទី១១ ខែមិថុនា ឆ្នាំ២០២៥ លោក ជា ពិសី អភិបាលនៃគណអភិបាលខណ្ឌទួលគោក បានដឹកនាំកម្លាំងគណៈបញ្ជាការរដ្ឋបាលខណ្ឌ ចុះរៀបចំសណ្តាប់ធ្នាប់នៅផ្លូវលេខ១២៨ (របងវិទ្យាល័យសន្ធម៉ុក) និងបានប្រើវិធានការក្ដៅលើម្ចាស់រថយន្តចំនួន ២៣គ្រឿង ដើម្បីបញ្ឈប់ការយករថយន្ដមកចតបែបអនាធិបតេយ្យបែបនេះ ដែលករណីនេះ អាចបង្កគ្រោះថ្នាក់ដល់ប្រជាពលរដ្ឋ និងសិស្សានុសិស្សធ្វេីដំណេីរ។

លោកអភិបាលខណ្ឌបានសង្កត់ធ្ងន់ថា ក្នុងករណីម្ចាស់រថយន្ដណាមិនអនុវត្តតាមការណែនាំ អាជ្ញាធរនឹងអូសយករថយន្តទៅរក្សាទុកនៅអធិការនគបាលខណ្ឌ៕

អត្ថបទ៖​ ម៉េង