ក្នុងពេលពិភពលោកពោរពេញដោយអំពើហិង្សា កម្ពុជារៀបចំកិច្ចសន្ទនាអន្តរសាសនា ដើម្បីស្ថាបនាសន្តិភាព

ព្រះសហគមន៍កាតូលិកភូមិភាគភ្នំពេញនៅកម្ពុជា បានរៀបចំ កិច្ចសន្ទនាអន្តរសាសនាអន្តរជាតិរវាងពុទ្ធសាសនា និងគ្រីស្តសាសនាលើកទី ៨ នៅរាជធានីភ្នំពេញ ដោយផ្តោតលើប្រធានបទ “ពុទ្ធបរិស័ទ និងគ្រីស្តបរិស័ទ រួមគ្នារក្សាសុខដុមនីយកម្មដោយភាពធន់” ចាប់ពីថ្ងៃទី ២៦-៣០ ខែ ឧសភា ឆ្នាំ ២០២៥។ កិច្ចសន្ទនានេះ ​មានការ និមន្ត/អញ្ជើញចូលរួមពីសម្តេចព្រះសង្ឃកម្ពុជា សម្តេចសង្ឃអន្តរជាតិ រដ្ឋមន្រ្តីក្រសួងធម្មការ និងសាសនាលោក ចាយ បូរិន និងតំណាងព្រះសហគមន៍កាតូលិកផងដែរ។

សេចក្តីប្រកាសព័ត៌មានរបស់ព្រះសហគមន៍កាតូលិកភូមិភាគភ្នំពេញនៅកម្ពុជា បានឱ្យដឹងថា ក្នុងពិភពលោកដែលពោរពេញដោយអំពើហិង្សា ភាពបែកបាក់ និងវិបត្តិនៃបរិស្ថាន កិច្ចសន្ទនានេះនឹងស្វែងយល់ពីការប្រៀនប្រដៅរបស់ព្រះពុទ្ធសាសនានិងគ្រីស្តសាសនា ដែលផ្អែកលើមេត្តាករុណា សេចក្តីស្រឡាញ់ និងយុត្តិធម៌ អាចចូលរួមព្យាបាលសង្គម ដែលកំពុងបែកបាក់ កសាងសេចក្តីថ្លៃថ្នូររបស់មនុស្សជាតិ និងបង្កើតសហគមន៍ដែលមានភាពធន់។

កិច្ចសន្ទនាអន្តរសាសនាអន្តរជាតិលើកទី៨ រវាងពុទ្ធសាសនានិងគ្រីស្តសាសនានេះ ជាការអញ្ជើញសកលមួយដ៏មានអត្ថន័យ ដើម្បីអំពាវនាវឱ្យមានការសហប្រតិបត្តិការជាថ្មីម្តងទៀតរវាងសាសនាដើម្បីកសាងពិភពលោកមួយដែលពោរពេញដោយយុត្តិធម៌ និងមេត្តាករុណា។ ប្រទេសកម្ពុជា ដែលក្នុងអតីតកាលធ្លាប់ជាប្រទេសដែលរងការខូចខាតដោយសង្គ្រាមក្នុងតំបន់ ពេលនេះបានក្លាយជាសក្ខីភាពរស់មួយបញ្ជាក់ថា ការសន្ទនា ការគោរពគ្នាទៅវិញទៅមក និងសាមគ្គីផ្លូវវិញ្ញាណអាចយកឈ្នះការលំបាក និងកសាងសន្តិភាពជាអចិន្ត្រៃយ៍បាន។

នាយករដ្ឋមន្រ្តី សម្តេចធិបតី ហ៊ុន ម៉ាណែត ធ្លាប់ថ្លែងថា រាជរដ្ឋាភិបាល តែងតែយកចិត្តទុកដាក់ និងផ្តល់សេរីភាព លើជំនឿសាសនាយ៉ាងទូលំទូលាយ​ ដល់ប្រជាជនទូទៅដែលឈរលើមូលដ្ឋាន នៃការពង្រឹងសុខដុមនីយកម្មសាសនិក នៃគ្រប់និកាយសាសនា និងប្រឆាំងនូវរាល់ទង្វើរើសអើង សំដៅទប់ស្កាត់ការយកសាសនាធ្វើអាជីវកម្ម ដែលអាចបង្កវិបត្តិសាសនានៅកម្ពុជា។ សម្តេចគូសបញ្ជាក់ថា៖«សុខដុមនីយកម្មជាតិសាសន៍ និងសាសនា ដែលកម្ពុជាទទួលបានគឺជាសម្បត្តិដែលត្រូវថែទាំឱ្យបានគង់វង្ស»។

កិច្ចសន្ទនាអន្តរសាសនាអន្តរជាតិនេះចាប់ផ្តើមក្នុងឆ្នាំ ១៩៩៥ នៅកោះតៃវ៉ាន់ និងបានរៀបចំឡើងជាបន្តបន្ទាប់នៅប្រទេស ជាច្រើន ដូចជា ឥណ្ឌា ជប៉ុន អ៊ីតាលី និង ថៃ។ ក្នុងឆ្នាំ ២០២៣ កិច្ចសន្ទនាលើកទី៧បានប្រព្រឹត្តឡើងនៅទីក្រុងបាងកក ដោយផ្តោតលើប្រធានបទ “សេចក្តីករុណា និងសេចក្តីស្រឡាញ់ ដើម្បីព្យាបាលរបួសមនុស្សលោក និងភពផែនដី” ខណៈឆ្នាំ ២០២៥ ធ្វើឡើងនៅកម្ពុជា។

ក្នុងក្តីសង្ឃឹម និងការសហការរវាងជំនឿ ខណៈពេលដែលពិភពលោកកំពុងប្រឈមនឹងអំពើហិង្សា និងជម្លោះសាសនាជាច្រើន កិច្ចសន្ទនាអន្តរសាសនានេះ ត្រូវបានគេចាត់ទុកថាជាជំហានសំខាន់មួយក្នុងការស្ថាបនាសន្តិភាពនិងការគាំទ្រការរួមរស់ដោយ គោរពគ្នាទៅវិញទៅមក៕