តំណាងព្រះសហគមន៍កាតូលិក ​ចាត់ទុកកម្ពុជាជាគំរូសន្តិភាពសម្រាប់តំបន់ និងពិភពលោក

លោក អូលីវីយេ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ បានលើកឡើងថា ប្រទេសកម្ពុជា គឺជាគំរូយ៉ាងពិសេស សម្រាប់តំបន់ និងក្នុងសាកលលោកដែលជាប្រទេសមួយមានសុខសន្តិភាពខាងផ្នែកសាសនា និងសន្តិភាព សុវត្ថិភាពគ្រប់ទីកន្លែង។

ក្នុងនាមព្រះសហគមន៍កាតូលិកនៅកម្ពុជា លោក អូលីវីយេ បានថ្លែងអំណរគុណយ៉ាងស្មោះស្ម័គ្រចំពោះថ្នាក់ដឹកនាំកម្ពុជាដែលអនុញ្ញាតឱ្យមានការរៀបចំ “កិច្ចសន្ទនាអន្តរសាសនាអន្តរជាតិលើកទី ៨រវាងពុទ្ធសាសនា និងគ្រីស្តសាសនា”។ វេទិកានេះរៀបចំឡើង ដោយផ្តោតលើប្រធានបទ “ពុទ្ធបរិស័ទ និងគ្រីស្តបរិស័ទ រួមគ្នារក្សាសុខដុមនីយកម្មដោយភាពធន់” ចាប់ពីថ្ងៃទី ២៦-៣០ ខែ ឧសភា ឆ្នាំ ២០២៥ ដើម្បីចែករំលែកអំពីគុណតម្លៃរួម ភាពផ្សេងគ្នា ការយោគយល់គ្នា លើកកម្ពស់ សាមគ្គីធម៌ក្នុងនាមជាបងប្អូនរួមជាតិ និងរួមចំណែកធ្វើឱ្យមានសុខដុមរមនាសាសនា។

តាមរយៈវេទិកានេះ លោកបានលើកសរសើរថា នៅក្នុងប្រទេសកម្ពុជាផ្លូវសន្តិភាពនេះមិនត្រឹមតែនិយាយទេ គឺវារស់រវើក និងមានសុខសន្តិភាពពេញលេញ ជាពិសេសការសន្ទនាអន្តរសាសនា។ លោកថ្លែងថា៖«សូមអរគុណសន្តិភាពសម្រាប់ប្រទេសកម្ពុជា ដែលជាគំរូយ៉ាងពិសេស សម្រាប់តំបន់ និងក្នុងសាកលលោកដែលជាប្រទេសមួយមានសុខសន្តិភាពខាងផ្នែកសាសនា និងសន្តិភាពសុវត្ថិ ភាពគ្រប់ទីកន្លែង»។

កិច្ចសន្ទនាអន្តរសាសនាអន្តរជាតិលើកទី៨ បានប្រមូលផ្តុំអ្នកចូលរួមប្រមាណជា ២០០នាក់ មកពីស្ថាប័ន ផ្សេងៗ ប្រតិភូអន្តរជាតិដែលជាតំណាងប្រទេសទាំង ២០ ក្នុងតំបន់ ដែលរួមមានបណ្ឌិត សាស្ត្រាចារ្យ តំណាងសម្តេចសង្ឃតាមប្រទេសសរុបចំនួន ៤១អង្គ/នាក់ បានចែករំលែក និងបង្ហាញលទ្ធផលស្រាវជ្រាវទាក់ទងជាមួយសន្តិភាព និងការសម្រុះសម្រួលក្នុងបរិបទអន្តរសាសនាក្នុងតំបន់ និងក្នុងពិភពលោក។

លោក ចាយ បូរិន រដ្ឋមន្រ្តីក្រសួងធម្មការ និងសាសនា ដែលបានអញ្ជើញជាអធិបតីក្នុងពិធីនោះ មានប្រសាសន៍ថា កិច្ចសន្ទនានេះប្រព្រឹត្តទៅក្នុងបរិការណ៍ដែលកម្ពុជាកំពុងស្ថិតក្រោមម្លប់សន្តិភាព និងការអភិវឌ្ឍប្រកបដោយចីរភាព ព្រមទាំងស្ថិរភាពនយោបាយ សន្តិសុខ សុវត្ថិភាព និងសណ្តាប់ធ្នាប់សាធារណៈត្រូវបានធានា និងលើកកម្ពស់ជាបន្តបន្ទាប់។

លោកបន្ថែមថា៖«កិច្ចសន្ទនានេះ ពិតជាមានសារៈសំខាន់ណាស់ មិនគ្រាន់តែបានចូលរួមចំណែកធ្វើឱ្យមានការយល់ដឹងអំពីគុណតម្លៃរួម ភាពផ្សេងគ្នា ការយោគយល់គ្នា លើកកម្ពស់ សាមគ្គីធម៌ក្នុងនាមជាបងប្អូនរួមជាតិ និងរួមចំណែកធ្វើឱ្យមានសុខដុមរមនាសាសនានៅព្រះរាជាណាចក្រកម្ពុជាប៉ុណ្ណោះទេ ប៉ុន្តែកិច្ចសន្ទនានេះនឹងផ្តល់វិភាគទានដ៏សំខាន់ដល់សុខដុមរមនាសាសនានៅក្នុងតំបន់ និងពិភពលោកផងដែរ»៕